Troje z abvinavačvanych asudžany na terminy ad troch da čatyroch hadoŭ pazbaŭleńnia voli, adzin — vyzvaleny.
Troje z abvinavačvanych pa hetak zvanaj »palaŭničaj spravie» asudžanyja na terminy ad troch da čatyroch hadoŭ pazbaŭleńnia voli, adzin — vyzvaleny. Takoje rašeńnie vynies 17 lutaha Viarchoŭny sud Biełarusi.
Słuchańni kryminalnaj spravy ŭ dačynieńni da słužbovych asob MUS prachodzili ŭ zakrytym režymie ŭ Viarchoŭnym sudzie z 12 kastryčnika 2009 hoda. Fihurantami źjaŭlajucca byłyja načalnik hałoŭnaha ŭpraŭleńnia pa baraćbie z karupcyjaj i ekanamičnymi złačynstvami MUS Viktar Jermakoŭ, načalnik UBKiEZ UUS Homielskaha abłvykankama Alaksandr Małajeŭ, načalnik UBKiEZ SN UUS Homielskaha abłvykankama Dźmitryj Baranaŭ i načalnik ABKiEZ Žłobinskaha RAUS Leanid Miniankoŭ. Usie jany abvinavačvajucca ŭ pieravyšeńni ŭłady (art. 426 KK). U kryminalnaj spravie fihurujuć taksama inšyja hramadzianie, jakija abvinavačvajucca ŭ niezakonnym palavańni (havorka idzie pra zdabyču jeŭrapiejskaj rysi, zaniesienaj u Čyrvonuju knihu) i biaździejnaści słužbovych asob. Spravy ab niezakonnym palavańni i pieravyšeńni ŭłady byli abjadnanyja ŭ adnu vytvorčaść.
Jermakova i Małajeva sud abvinavaciŭ pa častcy 2 artykuła 426 (pieravyšeńnie ŭłady), Dźmitryja Baranava i Leanida Miniankova — pa častcy 2 i 3 taho ž artykuła. Jermakoŭ, Baranaŭ i Miniankoŭ pryznanyja vinavatymi ŭ złoŭžyvańni słužbovym stanoviščam z asabistaj zacikaŭlenaści, u vyniku čaho byŭ naniesieny ŭron hramadskim i dziaržaŭnym intaresam.
17 lutaha Viarchoŭny sud pryhavaryŭ Jermakova i Baranava da troch hadoŭ pazbaŭleńnia voli, Miniankova — da čatyroch.Jany taksama pazbaŭlenyja na piać hadoŭ prava zajmać pasady, «źviazanyja z vykanańniem funkcyj pradstaŭnika orhanaŭ ułady».
Małajeŭ vyzvaleny ad kryminalnaj adkaznaści na padstavie zakona ab amnistyi.
Abvinavačvanyja admovilisia, kab u zale suda padčas abviaščeńnia pryhavoru viałasia fota‑ i videazdymka.
Upieršyniu biełaruskaja hramadskaść daviedałasia ab «palaŭničaj spravie» 29 krasavika 2009 hoda.
Na naradzie, pryśviečanaj pracy pravaachoŭnych orhanaŭ, prezident paviedamiŭ: «U pole zroku KDB niadaŭna trapiŭ načalnik adździeła pa baraćbie z karupcyjaj i ekanamičnymi złačynstvami Žłobinskaha RAUS Leanid Miniankoŭ, jaki stvaryŭ umovy dla palavańnia, rybałki i jašče taho‑siaho. Ustanoŭlena, što ŭ 2003 hodzie jon nabyŭ i aformiŭ na padstaŭnuju asobu siadzibu płoščaj bolš za dva hiektary na terytoryi Žłobinskaha rajona i zachapiŭ pry hetym jašče bolš jak adzin hiektar lasnych uhodździaŭ, samavolna ŭźvioŭ 14 pabudoŭ, abzavioŭsia zhrajaj z 29 parodzistych sabak i tryma dzikami. Usiu hetuju haspadarku absłuhoŭvali miascovyja žychary. Na ŭłasnaj bazie rehularna pravodzilisia palavańnie, rybałka z udziełam kiraŭnikoŭ, u tym liku Biełaruskaha mietałurhičnaha zavoda, i vyšejšych słužbovych asob orhanaŭ unutranych spraŭ, naprykład načalnika hałoŭnaha ŭpraŭleńnia pa baraćbie z karupcyjaj i ekanamičnymi złačynstvami Jermakova».
Jak raniej paviedamlałasia, 17 lutaha supracoŭniki milicyi kanfiskavali sistemny błok rabočaha kampjutera namieśnika hałoŭnaha redaktara haziety «Narodnaja vola» Maryny Koktyš. Ranicaj žurnalistku vyklikali va UUS Leninskaha rajona Minska na dopyt u suviazi ź jaje publikacyjami pa «palaŭničaj spravie», a zatym supracoŭniki milicyi pryjšli ŭ redakcyju ź pieratrusam.
Kamientary