«Krutyja lekcyi», ale «žyvie ŭ śviecie, jaki sam i stvaryŭ». Studenty raskazali pra vykładčyka BDUIR, jaki zapisaŭ zvarot da Łukašenki

«Takich vykładčykaŭ, jak jon, było vielmi mała»

Mark (imia źmieniena) pastupiŭ na fakultet kampjutarnych sietak i sistem BDUIR u 2018 hodzie. Jon vučyŭsia pa śpiecyjalnaści «prahramnaje zabieśpiačeńnie infarmacyjnych technałohij»:

— Dźmitryj Anoška vioŭ u nas samyja važnyja pradmiety pa prahramavańni pieršyja try siemiestry, heta značyć, da siaredziny druhoha kursa. U pieršym siemiestry byŭ pradmiet z bazavym uviadzieńniem u prahramavańnie, ałharytmami i h.d. Usio heta vykładałasia na prykładzie Delphi, kab byŭ nizki paroh uvachodu paśla školnaha Pascal. Druhi siemiestr byŭ užo bolš składany: my vyvučali, jak usio pracuje na nizkim uzroŭni. Asnoŭnymi temami było vyvučeńnie Asembler x16 (FASM), architektura vykanańnia instrukcyj u pracesary, kanviejer vykanańnia, nizkaŭzroŭnievyja aptymizacyi i źviazanyja z hetym rečy. I, narešcie, treci siemiestr byŭ pryśviečany movie C (zvyčajny C, bieź plusaŭ).

Na fonie inšych vykładčykaŭ Dźmitryj Anoška vyłučaŭsia. Jon sapraŭdy daŭ vielmi važnyja fundamientalnyja viedy Computer Science, a nie prosta raskazaŭ pa staroj mietadyčcy. Vielmi šmat raskazvaŭ ad siabie, adčuvaŭsia vialiki praktyčny dośvied.

Takich vykładčykaŭ, jak jon, było vielmi mała. Za ŭsie čatyry hady majho navučańnia — maksimum čałaviek 10-20, bolšaść prosta čytali kurs pa staroj mietadyčcy. Zaraz takich, chutčej za ŭsio, zastalisia ŭvohule adzinki.

Pamiataju, jon navat pravodziŭ dadatkovyja lekcyi pa-za raskładam dla tych, chto chacieŭ atrymać bolš hłybokija viedy.

Mnie vielmi padabalisia jaho lekcyi. Ale ja, chutčej, byŭ vyklučeńniem. U mnohich adnakurśnikaŭ było mierkavańnie, što Dźmitryj Anoška zališnie «dušyć» na ekzamienach i zalikach. Ja hetaha mierkavańnia nie padzialaŭ. Tut, chutčej, sprava ŭ tym, što ŭ moj čas mnohija pastupali prosta tamu, što biełaruski IT na toj čas byŭ na piku. Nie ŭsie razumieli, što prahramavańnie — heta nie tak prosta. Ja ž pryjšoŭ va ŭniviersitet užo z praktyčnym dośviedam, pisaŭ prostyja prahramy i botaŭ dla nievialikaha kamjunici ŭ Telegram, trochi zajmaŭsia alimpijadnym prahramavańniem u škole.

Za čas vučoby ja nie čuŭ pra jaho kanflikty z administracyjaj BDUIR. Ale i atmaśfiera ŭ BDUIR tych hadoŭ była zusim inšaja. IT było «na chajpie», dziaržava vielmi słaba ŭmiešvałasia ŭ praces IT-adukacyi. Užo paśla 2020—2022 hoda vielmi šmat dobrych ludziej, u tym liku z kiraŭnictva, zvolnilisia albo byli zvolnienyja.

U 2020‑m ja byŭ na trecim kursie, Anoška ŭ toj momant užo ničoha nie vioŭ u majho patoku. Nakolki ja čuŭ, unutry ŭniviersiteta jaho pohlady mała prajaŭlalisia. Asnoŭnyja palityčnyja vykazvańni Anoški byli na jaho staroncy ŭ VK.

Hetyja zapisy dahetul zachavalisia — tam jość najezdy na płatformu, jakaja źbirała fatahrafii biuleteniaŭ, na niezaležnyja miedyja, «paraleli» pamiž dziejańniami apazicyi i hienacydam u Ruandzie, krytyka aktyvistaŭ i ŭdzielnikaŭ pratestu, raskazy pra «mietadyčki ŭkrainskich majdanaŭ», reposty prapahandystaŭ.

U mianie tady vyklikała dysanans, što taki dobry vykładčyk i śpiecyjalist moža mieć takija dziŭnyja palityčnyja pohlady i pierakanańni.

«Na jaho lekcyjach zaŭsiody byli dyskusii, i było vielmi cikava»

Dzianis (imia źmieniena) vučyŭsia ŭ Dźmitryja Anoški paŭtara hoda. Heta było niekalki hadoŭ tamu:

— Dźmitryj Jaŭhienavič vielmi cikava i hłyboka vykładaŭ svaje pradmiety. Ale i patrabavaŭ na ekzamienach adpaviedna. Jaho pradmiety byli ŭvodnymi, bazavymi dla razumieńnia prahramavańnia ŭ cełym. Na ich zakranalisia jak pačatkovyja temy, tak i prasunutyja. Ź im možna było zaŭsiody abmierkavać što-niebudź padčas albo paśla zaniatkaŭ.

Asnoŭny jaho padychod zaklučaŭsia ŭ tym, kab my razhladali nie stolki kankretnuju movu prahramavańnia, kolki toje, jak vyhladajuć peŭnyja padychody ŭ napisańni koda, jak uładkavanyja «ŭnutranaści» moŭ i płatformaŭ prahramavańnia. Na jaho lekcyjach zaŭsiody byli dyskusii i było vielmi cikava. Viadoma, kali student chacieŭ atrymać karyść ad takich zaniatkaŭ.

Na ekzamienach i zalikach zvyčajna byli tearetyčnyja pytańni i nieskładanyja zadačy z zaćvierdžanych biletaŭ. Jon nikoha nie valiŭ. Naadvarot, časta išoŭ nasustrač i davaŭ šaniec padumać jašče. Ci padšturchoŭvaŭ da razvažańniaŭ u patrebny bok, i student razam ź im prychodziŭ da adkazu.

Ź cikavaha ŭzhadvajecca jašče mierapryjemstva «Blinčyki», jakoje jon ładziŭ: studenty mahli prademanstravać samastojna napisanyja na Asemblery prahramy, demasceny. Jon usialak dapamahaŭ i kuravaŭ takija prajekty.

Dźmitryj Jaŭhienavič hareŭ žadańniem navučać, asabliva «zaradžanych» studentaŭ. A tym, chto nie chacieŭ vučycca, usio roŭna pryjšłosia heta rabić, bo zdać ekzamien bieź viedaŭ u jaho było niemahčyma. Vodhuki pra jaho ŭ asnoŭnym byli vielmi pazityŭnyja. Mnie jašče da pastupleńnia rekamiendavali «prahramnaje zabieśpiačeńnie infarmacyjnych technałohij» u tym liku praź jaho jak vykładčyka.

Nijakich kanfliktaŭ pamiž im i administracyjaj BDUIR ja ŭ toj čas nie pamiataju. Ničoha niehatyŭnaha, prynamsi, nie vynosiłasia na publiku.

«Žyvie ŭ tym suśviecie, jaki sam i stvaryŭ»

Siarhiej (imia źmieniena), jak i papiarednija apaviadalniki, vučyŭsia ŭ Dźmitryja Anoški na pieršym i druhim kursach.

— Jon byŭ vielmi charyzmatyčny. Dla pieršakurśnikaŭ jon byŭ tady aŭtarytetam, pa-sapraŭdnamu cikavym vykładčykam, z pastajannymi prykołami i daścipnymi žartami na lekcyjach. U jaho zaŭsiody było šmat cikavych historyj. I ŭražańnie Anoška stvaraŭ takoje, natchnialnaje. Na kafiedry i ŭ dekanacie jaho lubili, jak takoha maładoha vykładčyka, za jakim nibyta budučynia kafiedry i ŭniviersiteta.

Zdavać jamu zalik/ekzamien — heta było niervova i strašna. Ale pravodzilisia jany z pavahaj, dakopvacca jon moh pa sutnaści, a nie praz asabistaje staŭleńnie.

Kaniešnie, było ŭ im niešta takoje, snobskaje, jak ad vykładčyka, jaki ličyć siabie hienijem. Ale nie takim hienijem, jaki pojdzie za ŭsimi. Naprykład, častka vykładčykaŭ pracavała ŭ IT-kampanijach, i pracavali va ŭniviersitecie albo ŭ jakaści adpracoŭki za mahistraturu/aśpiranturu, albo tamu, što prosta nie mahli biez vykładańnia. A Anoška pajšoŭ suprać bolšaści i supracoŭničaŭ nie ź IT-kampanijami, a ź niejkimi niezrazumiełymi dziaržaŭnymi prajektami ŭ halinach hramadskaj biaśpieki, enierhietyki.

U im zaŭsiody adčuvaŭsia «nietakusia». Tyja nie majuć racyi, hetyja nie majuć racyi, bolšaść nie maje racyi, a jon adzin d'Artańjan. Voś hetaja jahonaja admova ad usiaho papularnaha i pryviała jaho ŭ skieptyčnaje staŭleńnie da kavidu i na prałukašenkaŭskija pazicyi. U 2020 hodzie jon skardziŭsia ŭ dekanat mienavita na mianie za toje, što ja klikaŭ svaich adnahrupnikaŭ i adnapatočnikaŭ na pratesnyja akcyi va ŭniviersitecie.

Dekanaŭ [z tych časoŭ] źmianili, vykładčykaŭ pazvalniali, a jon usio zastavaŭsia. Voś ciapier jon i žyvie ŭ tym suśviecie, jaki sam i stvaryŭ.

«Voś łuchtoj pazajmalisia — i davajcie vučycca»

Dźmitryj (imia źmieniena) vučyŭsia pa śpiecyjalnaści PZIT na fakultecie KSiS BDUIRa z 2018 hoda:

— Dźmitryj Jaŭhienavič vioŭ u nas pieršyja try siemiestry, davaŭ uviadzieńnie ŭ prahramavańnie, Dełfi, C i Asembler. Jak vykładčyk jon byŭ vielmi dobry, vielmi mocna vyłučaŭsia na fonie inšych lektaraŭ.

Šmat vykładčykaŭ va ŭniviersitecie — albo ludzi navuki z fantastyčnymi viedami, ale pakutujuć ad ciažkaściaŭ ź pieradačaj hetych viedaŭ z-za roźnicy va ŭzroŭniach razumieńnia studenta i prafiesara, albo vykładčyki-retrahrady, jakija admaŭlajucca ad lubych inšaŭviadzieńniaŭ u pryncypie i vykładajuć pa mietadyčkach ~ 20‑hadovaj daŭniny. Dźmitryj Jaŭhienavič ža vioŭ svaje pradmiety žyva, zaŭsiody adkazvaŭ na pytańni, byŭ vielmi ŭciahnuty na lekcyjach, ładziŭ dla achvotnych niešta nakštałt alimpijady pa Asemblery i ŭ cełym vyhladaŭ vielmi zacikaŭlenym u tym, kab nas čamu-niebudź navučyć.

Jon patrabavaŭ, chutčej, razumieńnia svaich pradmietaŭ, a nie tupoha zavučvańnia aznačeńniaŭ, što nas tady vielmi radavała. Jaho zaliki/ekzamieny, choć i byli składanymi, zdać było całkam realna. U tym liku i tamu, što možna było demanstravać razumieńnie, a nie zubreńnie. Ja ŭ jaho ŭsio zakryŭ bieź pierazdač, choć i pierieniervavaŭsia.

U 2020 jon nie abvinavačvaŭ nas u «zdradnictvie radzimy», ale davaŭ zrazumieć, što pratesty studentaŭ ličyć u najlepšym vypadku moładzievaj duraściu, što nijakich padstaŭ dla pratestaŭ niama, što nas ŭvodziać u zman. Pieradavaŭ dumku «voś łuchtoj pazajmalisia — i chopić, para vučycca». Na svajoj asabistaj staroncy VK jon byŭ značna bolš žorstki i jarki.

Dla mnohich z nas heta akazałasia šokam, bo Dźmitryj Jaŭhienavič stvaraŭ uražańnie žyvoha, čałaviečnaha vykładčyka, zacikaŭlenaha nie ŭ farmaliźmie, a ŭ viedach.

• 3
• 0
• 1
• 4
• 0
• 1
• 0
• 0