Ryta Dakota addaje fanatkam svaju viasielnuju sukienku. Ale zabirać treba na Bali
Śpiavačka zrabiła ažno try viasielli ŭ roznych krainach sa svaim rasijskim mužam.
Biełaruskaja artystka, jakaja ciapier sprabuje skaryć anhłamoŭnuju aŭdytoryju, u šlubie ŭžo druhi raz. Z rasijaninam Fiodaram Biełahajem (jon papularny ekśpiert pa miedytacyi i maje 515 tysiač padpisčykaŭ u instahramie) Ryta Dakota zładziła ažno try viasielli ŭ roznych krainach.
Pieršaje viasielle adbyłosia ŭ Maskvie. Maładziony ŭ spartyŭnych kaściumach prosta raśpisalisia ŭ ZAHSie. A potym arhanizavali śviata dla vychavancaŭ dziciačaha doma ŭ Ćviery. Para apłaciła ramont tam, padaryła dzieciam viełasipiedy i zładziła piknik.
Praź niekalki miesiacaŭ Dakota i Biełahaj paviančalisia ŭ Hruzii — cyrymonija prajšła ŭ adnoj z najstarejšych cerkvaŭ Tbilisi. Na śviata zaprasili samych blizkich ludziej — usiaho kala dziesiaci svajakoŭ. Nieviadoma, ci zmahła tam prysutničać maci niaviesty, bo raniej žančynu zatrymlivali biełaruskija siłaviki za ŭdzieł u pratesnych akcyjach i pahražali kryminalnaj spravaj.
Čym skončyłasia taja historyja, Dakota admaŭlajecca raspaviadać. Kaža, jaje mama sama heta zrobić, kali vyrašyć niekali viarnucca ŭ sacyjalnyja sietki.
Treciaje viasielle zładzili ŭžo dla siabroŭ na Bali — pryhožaja cyrymonija adbyłasia na bierazie akijanu. Sukienku mienavita z hetaha śviata Ryta Dakota prapanoŭvaje svaim padpisčycam.
Śpiavačka zapisała videa, u jakim nahadała, što ŭžo adnojčy padaryła hetuju viasielnuju sukienku fanatcy. Taja dziaŭčyna ščaśliva vyjšła zamuž u sukiency lubimaj artystki, ale vyrašyła ŭsio ž viarnuć jaje Dakocie — kab jašče ŭ kahości była takaja mahčymaść.
— Ci jość tut niaviesty na Bali? Daru ščaślivuju sukienku-talisman.
Achvotnych, zrazumieła, užo šmat. Niechta ź dziaŭčat cikavicca, ci možna ŭziać sukienku, kab namiaknuć chłopcu na toje, što nadyšoŭ čas padać na adno kalena i prapanoŭvać ruku i serca.
Nie abyšłosia i bieź niehatyvu. Niechta spytaŭ: «Dziaŭčaty, jakija vychodziać zamuž, navošta vam čužaja sukienka?» Zdajecca, śpiavačku pytańnie krychu aburyła.
«Pa-pieršaje, nie «čužoje», a Dakotkina. Pa-druhoje, navošta płacić za sukienku, kali artystka, jakaja tabie padabajecca, prapanuje padaryć svaju?» — napisała Ryta Dakota.
Ciapier čytajuć
Što Babaryka i Kaleśnikava adkazali na pytańni pra vajnu48
Kamientary