Iłan Mask sastupiŭ patrabavańniam Brazilii. Paśla hetaha ŭłady krainy razbłakavali Ch
Sudździa Viarchoŭnaha suda Brazilii Alešandra dzi Marais u aŭtorak skasavaŭ zabaronu na pracu ŭ krainie sacsietki X (byłoha Tvitara), jakaja naležyć Iłanu Masku. Niadaŭna kiraŭnictva sietki sastupiła patrabavańniam sudździ i pačało błakavać akaŭnty ekstremistaŭ, a taksama vypłačvać štrafy brazilskamu ŭradu, piša Bi-bi-si.
Dzi Marais abviaściŭ, što admiena zabarony na pracu X ustupaje ŭ siłu nieadkładna, i daručyŭ viedamstvu, što adkazvaje za telekamunikacyi ŭ krainie, na praciahu sutak zabiaśpiečyć razbłakavańnie byłoha tvitara dla ŭsich brazilskich karystalnikaŭ.
Jak patłumačyŭ sudździa, sietka Ch na patrabavańnie ŭładaŭ Brazilii zapłaciła štraf 28 młn reałaŭ (blizu 5,1 młn dalaraŭ) i pryznačyła aficyjnaha kiraŭnika miascovaha pradstaŭnictva.
U žniŭni sudździa Dzi Marais zabaraniŭ byłomu Tvitaru pracavać u krainie za admovu vydalić akaŭnty pravych radykałaŭ, abvinavačanych u raspaŭsiudzie dezynfarmacyi.
Mask, jaki nazyvaje siabie absalutystam u halinie svabody słova, ustupiŭ u supraćstajańnie z brazilskim pravasudździem jašče ŭ krasaviku, kali Marais abaviazaŭ sacsietku spynić dziasiatki akaŭntaŭ, jakija raspaŭsiudžvali, na jaho dumku, dezynfarmacyju.
U advarotnym vypadku pradstaŭniku kampanii ŭ Brazilii, jak śćviardžała X, pahražaŭ aryšt.
U žniŭni kampanija zakryła svajo pradstaŭnictva ŭ krainie i zajaviła, što nie stanie skaracca cenzury. Mask pry hetym nazvaŭ sudździu tyranam, dyktataram i «Valdemortam» (admoŭnym piersanažam knižnaj epapiei pra Hary Potera).
U vieraśni, zrešty, Mask pamianiaŭ svajo rašeńnie i znoŭ pryznačyŭ aficyjnaha pradstaŭnika ŭ krainie.
Jak nahadvała ahienctva Reuters sa spasyłkaj na sajt Statista, Brazilija źjaŭlajecca dla sietki Ch šostym pa vieličyni rynkam u śviecie. Pa stanie na krasavik u płatformy ŭ krainie było kala 21,5 młn karystalnikaŭ.
Za čas zabarony mnohija brazilskija ŭładalniki akaŭntaŭ u Ch zarehistravalisia na inšych płatformach, takich jak sietka Bluesky i Threads (apošniaja naležyć kampanii Meta, jakaja taksama vałodaje sietkami Facebook i Instagram).
U Brazilii taksama rezka vyrasła papularnaść VPN, jakija dazvalajuć abyjści błakavańnie.
Ciapier čytajuć
«Što, hrochnuć dziaciej Cichanoŭskaj, kab źviarnuli ŭvahu na maju prablemu?» Jak tupy kamientar aktyvista Dzianisa Daškieviča stvaryŭ jamu prablemy ŭ Polščy21
Kamientary