Łatuška vykazaŭsia pra ideju viarnuć zachodnich pasłoŭ u Biełaruś
«Chtości dumaje, što ambasadary buduć chadzić i ŭltymatumy vystaŭlać Łukašenku, pratesty zajaŭlać?»
Apošnim časam niekatoryja vykazvajucca za toje, kab u Minsk viarnulisia zachodnija pasły. Heta hučała ŭ artykule palityka i byłoha palitźniavolenaha Andreja Dźmitryjeva, pra heta kazaŭ Valer Kavaleŭski.
Kiraŭnik Narodnaha antykryzisnaha ŭpraŭleńnia Pavieł Łatuška maje inšuju pazicyju. U intervju «Jeŭraradyjo» jon patłumačyŭ:
«Jak były ambasadar, ja mahu skazać: absalutna dastatkova dla siońniašniaha dnia kamunikacyi z režymam Łukašenki ŭzroŭniu časovych pavieranych u spravach kožnaj krainy ŭ Biełarusi. Absalutna dastatkova, bo ŭ hetym kantekście jany vykonvajuć funkcyju pasiarednikaŭ. Jany atrymlivajuć infarmacyju i pieradajuć».
Łatuška adznačyŭ, što dla viartańnia pasłoŭ zachodnich krain pavinien być peŭny mesedž z boku režymu Łukašenki. Jon spasłaŭsia na pazicyju Hiermanii, vykazanuju dziaržministram MZS hetaj krainy Tobijasam Lindnieram, što takim mesedžam pavinna stać vyzvaleńnie ŭsich palityčnych źniavolenych, adnaŭleńnie svabody ŚMI ŭ Biełarusi, mahčymaść pravieści demakratyčnyja vybary.
«Jon hatovy na heta? Nie. Voś, kali łaska, umovy, jakija my pastavili ŭ 2020 hodzie. Hetyja ŭmovy padtrymlivaje na siońniašni dzień Hiermanija», — zaŭvažaje Łatuška.
«Toje, što ambasadary paŭpłyvajuć na štości — nie. Chtości dumaje, što ambasadary buduć chadzić i ŭltymatumy vystaŭlać Łukašenku? Nie buduć. Pratesty zajaŭlać? Nie buduć», — ličyć palityk i tłumačyć:
«Pa-pieršaje, u dypłamatyčnaj praktycy heta vielmi redkija historyi. A ź inšaha boku, upłyvać heta ni na što nie budzie. Heta prosta biessensoŭnyja dziejańni. Tamu časovy pavierany jak pasiarednik u hetaj kamunikacyi absalutna dastatkovy».
Łatuška adznačaje, što adsutnaść pasłoŭ krain Zachadu nie aznačaje pahrozy straty niezaležnaści. Tym bolš što jość pasły inšych krain:
«Fakt pasolstvaŭ jość. Dypłamatyčnyja adnosiny jość. Časovyja pavieranyja — pradstaŭniki dziaržaŭ jość. Heta nie pytańnie straty ci nie straty niezaležnaści. Niama ŭ hetym kantekście pahrozy stracić niezaležnaść. Bo jość pasoł Kitaja, jość pasoł Indyi, jość pasoł Japonii, Šviejcaryi. Pasłoŭ vyšej za hałavu».
Pa słovach Łatuški, nakiravańnie zachodnimi krainami svaich pasłoŭ u Minsk budzie aznačać, što jany pryznajuć lehitymnaść Łukašenki. «Heta ŭ pieršuju čarhu budzie zdrada nam usim, abraza nas usich», — ličyć palityk.
«Tyja, chto heta prapanoŭvaje, viedajecie, što jany robiać? Naprykład, pasoł Hiermanii ŭručaje davierčyja listy Łukašenku. Vy dumajecie, paśla hetaha Hiermanija pieradaść svaju aficyjnuju prapanovu ŭ ofis prakurora Mižnarodnaha kryminalnaha suda ab pačatku spravy kryminalnaj za złačynstvy suprać biełaruskaha narodu? Nie, niemahčyma», — patłumačyŭ Pavieł Łatuška.
Kamientary
Kolki plaskali u dałoni " rEvalucyjam" u Kirhyzstanie? 5 ci 6 razoŭ? Hruzija Armienija??
V Ukrainie majdanam?? 2 ci 3??
Kali ni viedaješ kudy jak na..vošta Meta Mara atrymlivajecca " idzi pracuj" bieh pa kołu ni vyńnika ničoha.Praca dźla pracy ..