Zialony hnom, jaki ŭryvaŭsia ŭ kramy i nadakučaŭ palakam, akazaŭsia zusim nie ź Biełarusi. Voś chto jon
Učora błohier Crawly pakinuŭ Polšču. Mnohija palaki, stomlenyja jahonymi vychadkami, spadziajucca, što nazaŭsiody. «Naša Niva» daviedałasia jaho sapraŭdnaje imia i adkul jon pryjechaŭ u Varšavu.
Uletku ŭ sacsietkach zavirusilisia videa chłopca, jaki ŭ vobrazie hnoma ŭryvajecca ŭ kramy i restarany. Tam jon pałochaŭ achoŭnikaŭ i naviedvalnikaŭ, a jašče inscenavaŭ bitvy z roznymi piersanažami.
Siońnia tyktok błohiera pad nikam Crawly maje 5,8 miljona padpisčykaŭ, a najpapularniejšyja roliki nabrali ŭžo bolš za sotniu miljonaŭ prahladaŭ.
Adnak, nie ŭsie ŭ Polščy byli radyja jahonym vychadkam, jakija davali nie najlepšy prykład pavodzinaŭ moładzi. Da taho ž jon časta rabiŭ supiarečlivyja zajavy.
Niezrazumieła, što z taho, što raskazvaje sam błohier, praŭda, a dzie jon žartuje. Učora jon u strymie raspavioŭ, što nibyta byŭ vymušany źjechać z Polščy i chacieŭ by žyć u Maskvie. A paśla adžartavaŭsia ŭ inšym roliku, što jaho byccam by ŭnieśli ŭ rejestr zamiežnych ahientaŭ i na 50 hadoŭ zabaranili ŭjezd u Rasiju.
Ciapier błohier, miarkujučy pa jahonych publikacyjach, znachodzicca ŭ Stambule. U sacsietkach palaki radujucca, što zialony hnom jašče nie chutka da ich vierniecca. «Nichto tak nie abjadnaŭ palakaŭ, jak jon», — zaŭvažyŭ adzin z kamientataraŭ.
U lipieni biełaruskija miedyja pisali, što chłopiec nibyta rodam ź Biełarusi. Adnak, ničoha nieviadoma było pra jaho asabistaje žyćcio. Navat sapraŭdnaje imia błohiera — u svaim tyktoku chłopiec pradstaŭlajecca jak Rej i kaža, što jamu 23 hady.
Fakty dietka.
U pačatku kastryčnika Crawly vykłaŭ rolik ź niekalkimi faktami pra siabie. Adnym z faktaŭ stała pryznańnie, što jon ruski. Ale ŭ citrach, nakładzienych na videa paśla zdymki, užo napisana, što jon ruskamoŭny. Naŭrad ci rasiejec staŭ by rabić takoje vypraŭleńnie.
«Našaj Nivie» ŭdałosia vyśvietlić, jak zavuć chłopca i dzie jon žyŭ da pierajezdu ŭ Polšču.
Akazałasia, što pad psieŭdanimam Rej chavajecca Uładzisłaŭ Alijničenka. Zrešty, pošuk takoha čałavieka pa sacsietkach ničoha nie daŭ.
Ale jaho fota adšukalisia na sajcie liceja №139 u horadzie Dnipro va Ukrainie. U sakaviku 2019 hoda jon razam ź inšymi vučniami vypusknoha 11-ha kłasa pravodziŭ navukova-chimičnaje šou «Truki navuki» dla vučniaŭ 3-ha kłasa.
Z ulikam taho, što ŭ 2019 hodzie jon vučyŭsia ŭ 11-m kłasie, jahony ŭzrost, chutčej za ŭsio, — 23 hady, jak jon sam i nazyvaje.
Taksama chłopiec trapiŭ u kadr, kali ŭ 2015 hodzie ŭ škołu zavitali aktyvisty «Baćkaŭščyna maładaja», jakija pavinšavali dziaciej voinaŭ Antyterarystyčnaj apieracyi (ATA) z nahody hadaviny vyvadu savieckich vojskaŭ z Afhanistana. ATA va Ukrainie nazyvali vajennyja dziejańni suprać rasijskaj ahresii na Danbasie z 2014 hoda. Na fota z zali, dzie prachodziła ŭračystaść, chłopiec siadzić u druhim radzie, nie vyklučana, što jaho baćki byli ŭdzielnikami ATA.
Taksama my adšukali stary profil Ułada na sajcie znajomstvaŭ. Tam, praŭda, jahony ŭzrost zavyšany na niekalki hadoŭ, vidać, kab vyhladać bolš stałym u vačach dziaŭčat. U profili paznačany horad Dnipro i adznačajecca, što chłopiec cikavicca tatuiroŭkami, ekstrymam i bieham — usie svaje zachapleńni jon zmoh realizavać u roli prankiera ŭ Polščy.
Niahledziačy na toje, što siońnia chłopiec adhadavaŭ vałasy, vusy dy barodku, zrabiŭ tatuiroŭki i pirsinh, a razdvojenaje bryvo chavaje za vyhalenymi mašynkaj pałoskami, paznać jahony tvar nie składana.
Ci źviazvaje jaje niešta z Rasijaj, ciažka skazać. Svoj pieršy rolik, vykładzieny na jutubie, chłopiec paznačyŭ hieateham «Maskva», choć heta moža nie značyć aničoha akramia žadańnia pryciahnuć ruskamoŭnuju aŭdytoryju z Rasii.
A voś nijakich faktaŭ, jakija b paćviardžali jaho poviaź ź Biełaruśsiu, my nie adšukali. Adzinaje, što dakładna viadoma — błohier Crawly žyŭ va Ukrainie i skončyŭ tam škołu.
Nie vyklučana, što jon moh pradstaŭlacca ŭ Polščy biełarusam, bo da biełarusaŭ u palakaŭ mienš histaryčnych pretenzij i praduziataha staŭleńnia, čym da rasiejcaŭ i ŭkraincaŭ. Jakuju nacyjanalnuju samaśviadomaść maje błohier, nasamreč viedaje tolki jon sam.
«Naša Niva» — bastyjon biełaruščyny
PADTRYMAĆ
Kamientary