Alaksandru Fiadutu — 60. Svoj jubilej jon sustrakaje za kratami
Pa abvinavačvańni ŭ padrychtoŭcy zamachu na Łukašenka palitołah i litaraturaznaŭca adbyvaje 10-hadovy termin źniavoleńnia.
Žurnalist, palitołah, litaraturaznaŭca Alaksandr Fiaduta adznačaje za kratami svajo 60-hodździe. U źniavoleńni jon znachodzicca z krasavika 2021 hoda.
Uradženiec Hrodna, Fiaduta paśla zakančeńnia fiłfaka miascovaha ŭniviersiteta pracavaŭ nastaŭnikam ruskaj movy ŭ škole. U 1990 hodzie jon byŭ abrany sakratarom CK kamsamołu respubliki.
U 1994-m Fiaduta ŭvajšoŭ u pieradvybarčy štab Alaksandra Łukašenki. Jak paźniej zhadvaŭ žurnalist i palitołah Juryj Drakachrust, pierad vybarami 1994 hoda Fiaduta dzialiŭsia ź im płanami adnosna taho, što «Łukašenka budzie razmaŭlać z narodam, a my za jaho śpinaj — rabić reformy».
Paśla pieramohi Fiaduta staŭ u Administracyi Łukašenki načalnikam upraŭleńnia hramadska-palityčnaj infarmacyi. Ale ŭžo praź niekalki miesiacaŭ pajšoŭ u adstaŭku — uziaŭ na siabie adkaznaść za «biełyja plamy» ŭ hazietach: tam musiŭ źjavicca antykarupcyjny dakład deputata ad BNF Siarhieja Antončyka.
Fiaduta zajmaŭsia žurnalistykaj, napisaŭ knihu «Alaksandr Łukašenka. Palityčnaja bijahrafija», miemuary pra maładość, a taksama — jak litaraturaznaŭca — niekalki daśledavańniaŭ pra 19 stahodździe (naprykład, pra tvorčaść Puškina). U 2017 hodzie jon atrymaŭ doktarskuju stupień u Jahiełonskim univiersitecie ŭ Polščy.
U čas vybarčaj kampanii 2010-ha hoda Fiaduta ŭvajšoŭ u štab Uładzimira Niaklajeva. Paśla brutalnaha razhonu Płoščy adbyŭ niekalki miesiacaŭ u SIZA KDB, byŭ pryznany viaźniem sumleńnia.
Z 2013 hoda žyŭ i pracavaŭ u Kijevie. U 2016 hodzie viarnuŭsia ŭ Biełaruś.
Alaksandr Fiaduta byŭ zatrymany ŭ Maskvie 11 krasavika 2021 hoda ŭ vyniku sumiesnaj apieracyi FSB Rasii i KDB Biełarusi ŭ miežach spravy «ab sprobie dziaržaŭnaha pieravarotu». Paralelna schapili palityka Ryhora Kastusiova i jurysta Jurasia Ziankoviča. Usim vystavili abvinavačańnie pavodle č. 1 art. 357 Kryminalnaha kodeksa — «Zmova z metaj zachopu ŭłady niekanstytucyjnym šlacham».
5 vieraśnia 2022 hoda sudom Minskaha rajona Alaksandr Fiaduta prysudžany da 10 hadoŭ źniavoleńnia ŭ kałonii ŭzmocnienaha režymu.
Byłyja kalehi Alaksandra Fiaduty pa źniavoleńni na ŭmovach ananimnaści raskazvali, što ŭ vyniku šmatlikich chraničnych i nabytych zachvorvańniaŭ mužčyna byŭ etapavany ŭ kałoniju №15 Mahilova ŭžo z kijkom, jaki dapamahaŭ jamu i ŭ dalejšym pierasoŭvacca.
U vieraśni hetaha hoda były palitviazień Alaksiej Kirejeŭ raskazaŭ «Radyjo Svaboda», što Alaksandr Fiaduta pachudzieŭ za kratami na 30 kiłahramaŭ.
«Viedaju, što ŭ jaho cisk, serca. Raniej naziraŭ, jak ranicaj, kali ŭsie vyjšli na pracu, jamu raptam stanaviłasia błaha, chapaŭsia za aharodžu, kab nie ŭpaści. Potym jaho viali ŭ miedčastku, na try dni davali vyzvaleńnie ad pracy, na «promcy» jaho nie było», — raskazvaŭ Kirejeŭ.
Ciapier čytajuć
Pamiatajecie paru studentki i vykładčyka, dzie jon starejšy na 31 hod? Akazvajecca, jon byŭ śviatarom, a jana vučyłasia na rehientku3
Kamientary