Polskaja prakuratura rasśleduje parušeńni ŭ vizavaj prahramie dla ajcišnikaŭ — joj karystalisia tysiačy biełarusaŭ

Mahčymyja złoŭžyvańni pry realizacyi prahramy rasśledavała parłamienckaja kamisija. Jak vyśvietliłasia, prahrama Poland. Business Harbour, jakaja była pryznačanaja dla pierajezdu IT-śpiecyjalistaŭ ź Biełarusi i šerahu inšych krain, była realizavanaja pa-za abaviazkovymi pracedurami, biez kansultacyi z MZS i biez zaklučeńnia śpiecsłužbaŭ.

U kamisii ličać, što prahrama naohuł była ŭviedziena niezakonna, piša Rzeczpospolita.

«Nie była pryniataja navat pastanova Savieta Ministraŭ, i MZS pastavili pierad faktam, jaki adbyŭsia. Akazvaŭsia cisk na konsułaŭ, kab jany navat nie praviarali kampietentnaść ludziej, jakija atrymali vizy PBH. Ich masava vydavali ŭsim achvotnym», — zajaviŭ staršynia parłamienckaj kamisii pa rasśledavańni vizavaha skandału Marek Sova.

Prahrama była ŭviedziena ŭ vieraśni 2020 hoda dla biełaruskich ajcišnikaŭ i členaŭ ich siemjaŭ. Viza PBH davała prava na pracu ŭ Polščy. Praz hod dziejańnie prahramy pašyryli na Ukrainu, Hruziju, Małdovu, Armieniju i Rasiju. Adnak, jak akazałasia, vizy vydavalisia i hramadzianam inšych krain, uklučajučy Indyju, Irak, Paŭdniovuju Kareju, Japoniju i Azierbajdžan.

«My nie viedajem čamu, ale heta była prahrama, arhanizavanaja ŭ śpiešcy, metaj jakoj była nie sama prahrama, a atrymańnie vizy. Choć viza PBH farmalna była nacyjanalnaj vizaj, jakaja dazvalaje pracavać tolki ŭ Polščy, jana davała jaje ŭładalniku prava pierasoŭvacca pa ŭsioj zonie Šenhiena.

Bolš za toje, nam viadomyja takija vypadki. Hramadzianie Indyi vykarystoŭvali vizu PBH, kab trapić u ZŠA praź Mieksiku», — raskazaŭ Sova.

Za try hady, da 30 vieraśnia 2023 hoda, MZS vydaŭ 93 512 viz PBH.

Bolšaść ź ich atrymali hramadzianie Biełarusi — 88 529 čałaviek, zatym ukraincy (1 471 čałaviek) i rasiejcy (2 524 čałavieki), uklučajučy tych, chto atrymaŭ vizy ŭžo paśla pačatku vajny va Ukrainie.

Pry hetym z 2020 hoda na padstavie viz PBH u Polšču ŭjechała ŭsiaho kala 13,5 tysiačy zamiežnikaŭ, heta značyć tolki kožny siomy ŭładalnik takoj vizy faktyčna pierasiek miažu. Dzie padzielisia astatnija 80 tysiač čałaviek, polskija ŭłady nie viedajuć.

Svajo rasśledavańnie praviało i Polskaje ahienctva inviestycyj i handlu, jakoje ŭdzielničała ŭ prahramie. Vyniki rasśledavańnia byli pieradadzienyja ŭ prakuraturu. Detali nie raskryvajucca, adnak viadoma, što ŭ ahienctvie nie było miechanizmaŭ realna prakantralavać los ludziej, jakija atrymlivali vizy PBH.

Pakul prakuratura rasśleduje spravu, parłamienckaja kamisija źbirajecca abvinavacić byłoha premjer-ministra ad «Prava i spraviadlivaści» Matevuša Maravieckaha i jašče niekalki eks-čynoŭnikaŭ u nienaležnym vykanańni abaviazkaŭ.

Prahramu PBH zakryli ŭ studzieni 2024 hoda pa rašeńni ministra zamiežnych spraŭ Radasłava Sikorskaha. U MZS tady zajavili, što prahrama nie apraŭdała čakańniaŭ, a vizy vykarystoŭvalisia nie pa pryznačeńni.

• 1
• 0
• 3
• 1
• 0
• 0
• 0
• 0