U ZŠA spynili kryminalny pieraśled Trampa pa spravie šturmu Kapitolija
Sudździa Akružnoha suda pa akruzie Kałumbija Tania Čutkan zadavoliła prośbu śpiecyjalnaha prakurora Džeka Śmita spynić kryminalny pieraśled abranaha prezidenta ZŠA Donalda Trampa pa spravie ab sprobie admianić vyniki prezidenckich vybaraŭ 2020 hoda, piša Bi-bi-si.
«Sud zadavoliŭ chadajnictva prakuratury ab spynieńni razhladu spravy», — havorycca ŭ zajavie Čutkan, jakaja viała hety praces.
Śmit zajaviŭ, što sprava pavinna być zakryta z-za palityki Ministerstva justycyi, jakoje zabaraniaje sudovaje pieraśledavańnie dziejnaha prezidenta ZŠA.
«Pazicyja Miniusta zaklučajecca ŭ tym, što Kanstytucyja patrabuje, kab hetaja sprava była spyniena da taho, jak abvinavačany ŭstupić u pasadu», — padkreśliŭ Śmit, udakładniŭšy, što «pazicyja abvinavačvańnia pa sutnaści spravy nie źmianiłasia, ale źmianilisia abstaviny».
Śmit vioŭ dva rasśledavańni suprać Trampa — ab jaho sprobie admianić svaju parazu na vybarach 2020 hoda i ab abychodžańni z sakretnymi dakumientami. Pa druhoj spravie Śmit taksama prasiŭ zakryć jaje.
Kamanda Trampa nazvała heta «vialikaj pieramohaj viaršenstva zakona».
«Amierykanski narod pieraabraŭ prezidenta Trampa ź pierakanaŭčym mandatam, kab zrabić Amieryku znoŭ vialikaj», — skazaŭ pradstaŭnik Trampa Styvien Čanh (u novaj administracyi jon stanie dyrektaram pa kamunikacyjach). — «Amierykanski narod i prezident Tramp chočuć nieadkładna pakončyć z palityčnym vykarystańniem našaj sistemy pravasudździa, i my ź nieciarpieńniem čakajem abjadnańnia našaj krainy».
Tramp paabiacaŭ zvolnić Śmita, jak tolki ŭstupić u pasadu prezidenta. Pavodle najaŭnych danych, Śmit płanuje pajści ŭ adstaŭku ŭ nastupnym hodzie.
Pieramoha Trampa na vybarach pakinuła niekalki kryminalnych spraŭ suprać jaho ŭ padviešanym stanie.
Vyniasieńnie prysudu pa kryminalnaj spravie ŭ štacie Ńju-Jork było adkładziena na nieabmiežavany termin.
Trampu taksama vystaŭlenyja abvinavačvańni ŭ sproby admianić vyniki vybaraŭ u štacie Džordžyja, ale i hetaja sprava adkładajecca.
Pa słovach byłoha fiederalnaha prakurora Nimy Rachmani, z taho času, jak Tramp pieramoh na minułych prezidenckich vybarach, «jaho kryminalnyja prablemy źnikli».
«Absalutna viadoma, što dziejny prezident nie moža być pryciahnuty da adkaznaści», — skazaŭ jon.
Ciapier čytajuć
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?4
Kamientary