Servisu «Jandeks.Taksi» pahražajuć błakiroŭkaj: na ANT vyjšaŭ razhromny repartaž

Novy siužet pra rabotu taksi ŭ Biełarusi pa novych praviłach vyjšaŭ na telekanale ANT. Značnaja jaho častka była pryśviečana krytycy papularnaha ŭ biełarusaŭ servisu «Jandeks Go».

Z 1 listapada pracavać u taksi mohuć tolki kiroŭcy, jakija zarehistravalisia ŭ rejestry pieravozčykaŭ. Adnak aŭtary siužetu śćviardžajuć, što «Jandeks» praciahvaje davać zakazy nielehalnym taksistam. Pryčym vadzicieli raskazvajuć pra heta sami ŭ sacsietkach, niekatoryja paśla hetaha pazbaŭlajucca mašyn.

Jak śćviardžajecca ŭ siužecie, u niejki momant servis nakiravaŭ usim partnioram, u tym liku tym, kaho niama ŭ rejestry, paviedamleńnie «Zakazy dastupnyja — vychodźcie na liniju».

Z taksistami, jakija vyrašyli nie rehistravacca, zmahajecca transpartnaja inśpiekcyja. Ich znachodziać roznymi sposabami. Adzin ź ich — aficyjny. Usie dyśpietčary da 10 čysła kožnaha miesiaca pavinny pieradavać u inśpiekcyju infarmacyju ab usich zakazach i ich vykanańni. Akramia taho, šukajuć vadzicielaŭ nie z rejestra prosta na darozie: adsočvajuć pa kamierach i numarach.

Za nielehalnyja pieravozki abiacajuć karać nie tolki vadzicielaŭ, u jakich mohuć zabrać aŭto, ale i dyśpietčaraŭ. U siužecie ANT havorycca, što «Jandeks Go» naohuł mohuć zabłakavać, kali vyjaviać, što servis supracoŭničaje z taksistami-nielehałami.

Jašče adna pretenzija da «Jandeksu» — cenaŭtvareńnie. Telekanał abvinavačvaje servis u niadobrasumlennaj kankurencyi i manapalizacyi rynku. Aŭtary siužetu ličać, što «Jandeks» zachapiŭ rynak dziakujučy tamu, što źnižaŭ ceny na pasłuhi, a straty kampiensavaŭ za svoj košt. Hučać u siužecie i abvinavačvańni ŭ niedapłacie padatkaŭ i zboraŭ — z vusnaŭ dyrektara nienazvanaj transpartnaj kampanii, heta značyć kankurenta «Jandeksa».

Jak śćviardžajecca ŭ siužecie, zachapiŭšy rynak, «Jandeks» padniaŭ taryfy, čym vyklikaŭ niezadavolenaść karystalnikaŭ. Aŭtary zajavili, što ŭ Biełarusi zakanadaŭča ŭrehulavanyja praviły ŭstanoŭki taryfaŭ taksi pa kiłamietražy i časie, tamu, maŭlaŭ, pavyšeńnie koštaŭ nie abhruntavana. U efiry hučyć fraza «Čas płacić pa realnych cenach».

Tłumačeńni servisu, što paśla ŭviadzieńnia rejestra stała mienš kiroŭcaŭ, i heta paciahnuła za saboj rost cen, aŭtary siužetu adkidajuć. Pavodle źviestak transpartnaj inśpiekcyi, u Hrodzienskaj, Bresckaj i Minskaj abłaściach usie vadzicieli «Jandeksa» zarehistravalisia ŭ rejestry, u Minskim rajonie ŭ cieni zastalisia 6% vadzicielaŭ.

Ale pry hetym aŭtary pryznajuć, što ŭ stalicy taksisty rehistrujucca nieachvotna. Dy i MARH, pa śćviardžeńni samich supracoŭnikaŭ ANT, prakamientavać cenaŭtvareńni ŭ «Jandeksie» nie hatovy.

U zaklučeńnie, aŭtar siužetu Alaksandr Pleskač pravieryŭ viadomy łajfchak: zamoviŭ dastaŭku partfiela, ale razam z čałaviekam — tak atrymlivajecca tańniej, čym taksi. Kiroŭca pahadziŭsia vykanać zamovu i praličyŭsia: supracoŭnik ANT pravodziŭ ekśpierymient razam z transpartnaj inśpiekcyjaj. U vyniku, jak śćviardžajecca, u kiroŭcy kanfiskavali aŭtamabil.

• 9
• 6
• 6
• 14
• 0
• 0
• 5
• 0