U Minsku kala Kamaroŭki zaŭvažyli cełuju zhraju svojskich pacukoŭ. Na rynku kažuć, što heta nie ichnija VIDEA
Jak apynulisia svojskija pacuki na zvyčajnaj haradskoj kłumbie, nieviadoma.
Minčuki zaŭvažyli niedaloka ad Kamaroŭskaha rynku cełuju zhraju pacukoŭ.
Videa ŭ TikTok sabrała bolš za 200 tysiač prahladaŭ i čatyry sotni kamientaroŭ. Pieršapačatkova ŭ roliku havaryłasia, što pacukoŭ znajšli prosta kala Kamaroŭki, ale na rynku heta admaŭlajuć.
Vybrosili domašnich krys na Kulman(
Namieśnik dyrektara rynku pa raźvićci Ivan Tkačuk zajaviŭ, što pacukoŭ znajšli kala parkinhu, pišuć «Minsk-Naviny».
«Da nas pacuki nijakaha dačynieńnia nie majuć, videa źniataje na skryžavańni vuł. Kulman i Kujbyšava, heta adna z kłumbaŭ pobač z krytym parkinham», — adznačyŭ Tkačuk.
U kamientarach ludzi zaŭvažyli, što pacuki na videa, chutčej za ŭsio, svojskija, ich chtości moh vykinuć na dvor. Dekaratyŭnyja pacuki, u adroźnieńnie ad dzikich, mohuć nie prystasavacca da vonkavych umoŭ i zahinuć.
Toje, što pacuki na videa svojskija, paćvierdziła supracoŭnica staličnaha zaaparka Iryna Orlis. Pavodle jaje słoŭ, pacukoŭ vykinuli vidavočna nie paru dzion tamu.
«Na videa vyrazna vidać, što heta svojskija pacuki, jak minimum pa kolery — dzikija takich afarbovak nie byvajuć. Dy choć by ŭziać liniju Damba — toj samy bieleńki ź vialikimi vuškami, što fihuruje ŭ siaredzinie videa. Jak maksimum — pa pavodzinach: u našaj krainie dzikija pacuki tak nachabna siabie nie pavodziać. Jany daŭno vyvučyli, što ź imi zmahajucca, i tak vidavočna na kantakt nie pojduć.
Adnaznačna, niejki biessaromny čałaviek vykinuŭ chatnich hadavancaŭ. I vidavočna nie paru dzion tamu, kali ŭličyć, što my bačym nie tolki darosłych asobin, ale i małych, jakija vyvielisia, chutčej za ŭsio, u nary, jakuju žyvioły zładzili ŭ karaniach dreŭ. Marazy jany pieranosiać drenna, i kali ich nie adłavić, to, chutčej za ŭsio, žyvioły zahinuć», — ličyć Orlis.
Pry hetym śpiecyjalistka zaklikaje nie zamiłoŭvacca: pavodle jaje słoŭ, chatnija pacuki mohuć być bolš niebiaśpiečnyja, čym ich dzikija sabraty, pakolki lepš viedajuć zvyčki ludziej i nie bajacca ich. Da taho ž, zachvorvańni svojskija pacuki pieranosiać nie horš za dzikich.
Byłoha supracoŭnika kontrraźviedki KDB aryštavali za zdradu dziaržavie9
Kamientary