Kramloŭski demohraf zajaviŭ ab anamalnaj mužčynskaj zvyšśmiarotnaści ŭ Rasii
Staršynia naziralnaj rady rasijskaha Instytuta demahrafii, mihracyi i rehijanalnaha raźvićcia Juryj Krupnoŭ daŭ hetamu aryhinalnaje tłumačeńnie.
Pa słovach uradavaha daradcy Juryja Krupnova, u Rasii ciapier nazirajecca vielmi vysokaja tendencyja śmiarotnaści ŭ mužčyn uzrostam ad 25 da 45 hadoŭ, jakaja «vyšejšaja za pakazčyki Jeŭropy ŭ 5-6 razoŭ».
«U Rasii mužčyn uzrostam da 30 hadoŭ sapraŭdy bolš, čym žančyn. U nas naradžajecca prykładna 104 chłopčyki na 100 dziaŭčynak. Ale asnoŭnaja prablema pačynajecca paśla 25-30 hadoŭ.
U tak zvanaj kvitniejučaj uzrostavaj hrupy — ad 25 da 45 hadoŭ — nazirajecca mužčynskaja zvyšśmiarotnaść, jakaja ŭ paraŭnańni ź Jeŭropaj u 5-6 razoŭ vyšejšaja. Heta katastrafičnaja anamalija»,
— zajaviŭ Krupnoŭ u intervju rasijskamu ahienctvu «Hramadskaja słužba navin».
Demohraf adznačyŭ, što na bližejšyja 20—30 hadoŭ Rasii patrebna raspracavać i ažyćciavić «nacyjanalny prajekt pa vyratavańni mužčyn» i što «biez strukturnych źmienaŭ u hramadstvie, pieraasensavańnia kaštoŭnaściaŭ i dziaržaŭnaj padtrymki hetuju prablemu nie vyrašyć».
Adnak čynoŭnik ni słovam nie abmoviŭsia ab upłyvie vajny va Ukrainie na mužčynskuju śmiarotnaść u Rasii, znajšoŭšy anamalii zusim inšaje tłumačeńnie.
«Zdavałasia b, u hetym uzroście [25-45 hadoŭ] havaryć pra śmiarotnaść uvohule nie varta. Ale ŭ nas heta nacyjanalnaja asablivaść, źviazanaja ź biazdumnymi madelami pavodzin mužčyn, ich schilnaściu trymać usio ŭ sabie i nie vykazvać prablemy. Da hetaha dadajucca takija faktary, jak złoŭžyvańnie ałkaholem i adsutnaść zvarotaŭ pa miedycynskuju dapamohu», — śćviardžaje Krupnoŭ.
Nahadajem, dniami na Kruhłym stale Kamiteta pa pracy, sacyjalnaj palitycy i spravach vieteranaŭ Rasii vypadkova vydali statystyku pa kolkaści vajskoŭcaŭ, jakija źnikli bieź viestak.
Namieśnica ministra abarony Rasii i pa sumiaščalnictvie stryječnaja plamieńnica Pucina Hanna Cyvilova padčas svajho vystupleńnia zajaviła, što svajaki rasijskich vajskoŭcaŭ zdali 48 tysiač testaŭ DNK dla apaznańnia ich pareštkaŭ (usie mužčyny, jakija zaklučajuć kantrakt z rasijskim Minabarony, zdajuć testy DNK. Hetyja źviestki zatym unosiacca ŭ bazu MUS).
U adkaz na heta kiraŭnik kamiteta Dziarždumy pa abaronie Andrej Kartapołaŭ zrabiŭ Cyvilovaj zaŭvahu i paprasiŭ «nidzie bolš hetyja ličby nie ahučvać», a taksama «prybrać takuju infarmacyju z dakumientaŭ».
Kamientary
Hetaja śmiarotnaść isnavała i da vajny u rasii. Isnavała i isnuje jana i ŭ Biełarusi, chacia kuli i nie śviščuć.