Na bujnym chimzavodzie «Azot» u Piermskim krai prahrymieli mocnyja vybuchi
U Bieraźnikach Piermskaha kraju na filijale «Azot» pradpryjemstva «Urałchim» uviečary 2 kastryčnika prahrymieli dva mahutnyja vybuchi. Pra zdareńnie paviedamili miascovyja žychary, piša telehram-kanał Astra.
Pradpryjemstva paćvierdziła fakt incydentu, adnak nie pryviało padrabiaznaściaŭ.
«2 kastryčnika 2025 hoda ŭ 20:45 u filijale «Azot» AT «ACHK «Urałchim» adbyłosia karotkačasovaje prypynieńnie technałahičnaha cykłu. Paciarpiełych niama. Pahroz ekałahičnaj situacyi niama. Ciapier zavod pracuje ŭ štatnym režymie», — skazana ŭ paviedamleńni.
Miascovyja telehram-kanały sa spasyłkaj na MNS pisali, što pryčynaj moh stać vybuch chaładzilnaj ustanoŭki ŭ adnym z cechaŭ. Pahrozy BPŁA ŭ horadzie abvieščana nie było.
Zavod «Azot» źjaŭlajecca najbujniejšym vytvorcam azotnych uhnajeńniaŭ u Rasii i adzinym pastaŭščykom šerahu chimičnych praduktaŭ: vyšejšych alifatyčnych aminaŭ, natryjevaj saletry i kryštaličnaha nitrytu natryju. Jon vypuskaje amijak, karbamid i amijačnuju saletru, jakija majuć padvojnaje pryznačeńnie — vykarystoŭvajucca ŭ sielskaj haspadarcy i pry vytvorčaści vybuchovych rečyvaŭ.
U 2024 hodzie pradpryjemstva dało spravazdaču pra rekordnyja abjomy vytvorčaści — zvyš 2,3 miljona ton pradukcyi.
Kamientary