Rasijskuju špijonku, jakaja źbirałasia spakusić i vykraści žurnalista Hrozieva, pry aryšcie zaśpieli ŭ łožku ź inšym ahientam Kramla

U Łondanie prachodzić maštabny praces pa spravie ab špijanažy, u ramkach jakoha pierad sudom paŭstaje hrupa ahientaŭ, jakija, jak śćviardžaje śledstva, pracavali na karyść rasijskaj raźviedki pa ŭsioj Jeŭropie.

Dvoje ź piaci abvinavačanych užo pryznali svaju vinu. Padčas sudovaha razhladu stali viadomyja novyja pikantnyja padrabiaznaści: dva bałhary — Vania Habierava i Bizier Džambazaŭ — padčas zatrymańnia ŭ 2023 hodzie byli razam absalutna hołymi ŭ adnym łožku, što pakazvaje na ich blizkija adnosiny, pieradaje vydańnie Bild.

Pavodle brytanskaj prakuratury, Habierava pavinna była spakusić viadomaha žurnalista-rasśledavalnika Chrysta Hrozieva, kab zdabyć na jaho kampramat i vyvieźci ŭ Rasiju. Špijonskaja sietka pierad hetym sačyła za Hrozievym u Aŭstryi, Čarnahoryi i Ispanii.

Hrozieŭ daŭno źjaŭlajecca prablemaj dla Kramla — jon nieadnarazova raskryvaŭ rasijskija śpiecapieracyi, u tym liku źviazanyja sa źbićciom małazijskaha pasažyrskaha rejsu MH17 u niebie nad ukrainskim Danbasam u 2014 hodzie i dziejnaściu rasijskaha ahienta Vadzima Krasikava ŭ Bierlinie. Žurnalist taksama zajmaŭsia spravaj ab atručeńni Alaksieja Navalnaha.

Niekatoryja členy špijonskaj sietki ŭ pierapiscy pamiž saboj nazyvali Vaniu Habieravu «sapraŭdy seksualnaj žančynaj» i «śvinhierkaj». U ich pierapiscy taksama abmiarkoŭvalisia zabojstvy i vykradańni, paviedamlaje brytanskaje śledstva.

U toj ža čas byłyja susiedzi Biziera Džambazava raspaviali palicyi, što toj pierad zatrymańniem pražyvaŭ z Katryn Ivanavaj — jašče adnoj padazravanaj u spravie ab špijanažy — i što jany byli paraj. Džambazaŭ i Ivanava ŭznačalvali ŭ Vialikabrytanii hramadskuju arhanizacyju, jakaja pavinna była znajomić bałharskich mihrantaŭ i turystaŭ z «kulturaj i normami brytanskaha hramadstva».

Pavialičyć

Akramia sačeńnia za žurnalistami, vykrytaja kramloŭskaja špijonskaja sietka źbirała infarmacyju ab važnych dla Maskvy abjektach, uklučajučy amierykanskuju vajskovuju bazu «Patč-Kazarmy» ŭ Štutharcie. Inšymi celami špijonskaj sietki byli były supracoŭnik Śledčaha kamiteta Rasii Kirył Kačur, jakoha ŭ Rasii pryznali «zamiežnym ahientam», i kazachski palityk Bierhiej Ryskalijeŭ, jaki ŭciok z Kazachstana i atrymaŭ u Vialikabrytanii palityčny prytułak. Akramia taho, abvinavačanyja płanavali pravieści demanstracyju la ambasady Kazachstana ŭ Łondanie, kab potym pieradać źviestki pra jaje «arhanizatara» Kazachstanu i palepšyć stasunki krainy z Rasijaj.

Jan Marsalek, aŭstryjski miljanier, jakoha śledstva ŭvažaje za kiraŭnika špijonskaj sietki, zajmaŭ pasadu apieracyjnaha dyrektara finansavaha startapa Wirecard, jaki zbankrutavaŭ u 2020 hodzie, kali aŭdytary vyjavili, što ź jahonych rachunkaŭ źnikli amal 2 miljardy jeŭra.

Ułady Hiermanii i Aŭstryi ličać Marsaleka klučavoj fihuraj u kradziažy hrošaj, jon znachodzicca ŭ mižnarodnym vyšuku. Paśla krušeńnia Wirecard Marsalek u červieni 2020-ha hoda palacieŭ u Biełaruś, adkul dabraŭsia da Rasii. Pavodle źviestak žurnalistaŭ, jon atrymaŭ rasijski pašpart na imia Hiermana Baženava.

• 3
• 0
• 21
• 3
• 0
• 1
• 2
• 0