«Babaryku vy nie vyratujecie, dapamažycie biazdomnym žyviołam». Błohier Šabucki idzie z palityki ŭ stendapiery
Biełaruski błohier i eks-dobraachvotnik Pałka Kalinoŭskaha Maksim Šabucki raskazaŭ, čym ciapier budzie zajmacca.
«Ja niadaŭna zrazumieŭ, što ja nie palityk i nie chaču im być. I heta mnie raźviazvaje vielmi mocna ruki ŭ jakaści instrumienta znosin z padpisčykami», — zajaviŭ błohier Maksim Šabucki ŭ «apošnim videa pra palityku i apazicyju» na svaim kanale.
«My ničoha nie vyrašajem»
«U śviecie naśpiavaje vializnaja hieapalityčnaja razborka, novy śvietaparadak, novy pieradzieł», — zaŭvažaje błohier i zhadvaje namiery Donalda Trampa dałučyć da ZŠA Kanadu i Hrenłandyju.
«Chutka ŭ nas budzie suśvietny pieradzieł, i tamu, darahija biełarusy, padabajecca kamuści heta ci nie padabajecca, ja nie budu bolš pradaŭcom, błohieram, jaki pradaje iluzii, my siońnia ničoha nie vyrašajem», —
abhruntoŭvaje svajo rašeńnie pajści z palityki Šabucki i tłumačyć:
«Chutka ŭ nas buduć niejkija pieramovy, i na hetych pieramovach [nie budzie] nie toje što biełaruskaj apazicyi, [nie budzie] navat Łukašenki. Jaho nie ličać u śviecie paŭnavartasnym hieapalityčnym aktaram. (…)
My chutka daviedajemsia, nakolki biełarusy ŭdačlivy narod. Tamu što tut budzie 50 na 50. Moža, nam pašancuje, i my zajedziem na sanačkach u hetuju demakratyju. Moža, nie pašancuje, i situacyja na 20-30 hadoŭ zaciahniecca. (…)
Na siońnia my nie možam stać paŭnavartasnym subjektam i ŭziać situacyju ŭ svaje ruki. U nas było akienca ŭ 2020 hodzie. Ja ŭsio ž upeŭnieny, što biełarusy zrabili vialikuju pamyłku, kali pajšli za ślapymi pavadyrami, jakija pryviali nas da situacyi, u jakoj my jość.
Vy nie paklikali ludziej na barykady, tamu što vy prosta bajaźliŭcy. Chtości dobry čałaviek, chtości nie vielmi, ale vy bajaźliŭcy — vy pabajalisia prosta ŭziać na siabie adkaznaść i ryzyknuć».
«Dapamažycie biazdomnym žyviołam»
Šabucki zaŭvažaje, što nichto nie moža sprahnazavać, jak budzie raźvivacca situacyja, i raić svaim padpisčykam «rabić toje, što rablu ja: rychtavacca da patencyjnaha akienca na doŭhuju-doŭhuju stratehiju, na šmathadovuju stratehiju».
«Minimizujcie svajo supracoŭnictva z režymam, minimizujcie pakupki ŭ pravilnych i niapravilnych kramach, rabicie toje, što vy možacie. Kali ŭ vas jość finansavaja mahčymaść (dla tych, chto ŭ Biełarusi) ja vas prosta pa-čałaviečy prašu: dapamažycie ŭ pieršuju čarhu biazdomnym žyviołam, tamu što heta samaja ŭraźlivaja prasłojka. Palitviaźniaŭ vy nie vyratujecie, vy nie možacie dapamahčy Babaryku i Kaleśnikavaj».
Šabucki źviartaje ŭvahu na važnaść taho, kab da budučaha akna mahčymaściej usie pryjšli ŭ «pravilnym psichałahičnym, psichičnym i fizičnym stanie», i zaklikaje tych, chto ciapier žyvie za miažoj, «vučyć movu, atrymlivać niejkuju kvalifikacyju, adukacyju, maleńkimi krokami ruchacca napierad» i pa mahčymaści dapamahać inšym, kamu ciažka.
«Pasprabuju zaniacca stendapam»
U kancy svajho zvarotu Šabucki pryznaŭsia, što ŭ jaho niekalki miesiacaŭ nazad pačalisia prablemy psichałahičnaha charaktaru i jon padsieŭ na zapikłon — mocny siedatyŭny srodak.
Šabucki pakul nie viedaje dakładna, čym budzie zajmacca ŭ dalejšym jak błohier.
«U mianie jość druhi kanał, moža być, ja zapušču niejki karysny cykł videa pa samaraźvićci, pa asobasnym roście, ale, heta moža być histaryčnyja videa».
Aproč taho, jon vyrašyŭ zaniacca chobi — stendapam. Pieršaje vystupleńnie, pa słovach Šabuckaha, pavinna adbycca ŭžo praz tydzień.
Dźmitryj Łukašenka choča pastavić pad kantrol usie mabilnyja telefony11
Kamientary