Kabančuk: Ja nie datyčny da spravy Vieramiejčyka i naohuł nie viedaŭ, što jaho zanieśli ŭ stop-list na ŭjezd
Vadzim Kabančuk, były namieśnik kamandzira Pałka Kalinoŭskaha, a ciapier «ministr abarony» ŭ Abjadnanym pierachodnym kabiniecie, paśla vychadu artykuła na «Našaj Nivie» daŭ tłumačeńni da situacyi sa źlivam jaho pierapiski, dzie zhadvaŭsia Vasil Vieramiejčyk.
Vadzim Kabančuk vykłaŭ svaju pazicyju ŭ fejsbuku (adznačym, što pry padrychtoŭcy tekstu da jaho źviartalisia pa kamientar, ale tady jon admoviŭsia).
«Ja zajmaŭsia biaśpiekaj u PKK ad pačatku zasnavańnia padraździaleńnia. U asnoŭnym heta byŭ pieršy etap pravierki padčas rekrutynhu. Da novaha padraździaleńnia biełaruskich dobraachvotnikaŭ namahałasia patrapić ahientura, była padvyšanaja ŭvaha z boku varožaj vyviedki. Zychodziačy z našych mahčymaściaŭ, stvarali ŭmovy filtracyi jašče da momantu ŭvachodžańnia ŭ padraździaleńnie. Heta nieadjemnaja častka ŭsiaho pracesu funkcyjanavańnia PKK, padobnaja praca praciahvajecca i zaraz.
Pytańni pa zabaronie na ŭjezd va Ukrainu jość prerahatyvaj śpiecsłužb Ukrainy, jakija dziejničajuć na padstavie zakanadaŭstva. Dla Ukrainy, jakaja znachodzicca ŭ stanie vajny, heta nieabchodny miechanizm pa abaronie nacyjanalnaj biaśpieki, asabliva kali havorka idzie pra hramadzian krainy ahresara. Niama takoj praktyki apaviaščeńnia šyrokaj hramadskaści pra asob, jakija ŭvachodziać u «čorny śpis».
Pra zabaronu dla V. Vieramiejčyka ja daviedaŭsia, kali pačałasia sprava ź jaho zatrymańniem u Vjetnamie. Paśla jaho sychodu z PKK ja fizična bačyŭ jaho adzin raz naprykancy 2022-ha pa-za miežami Ukrainy, tady jon ničoha nie kazaŭ, mahčyma, i nie viedaŭ, pra zabaronu na ŭjezd».
Toj kavałak pierapiski, dzie zhadvajecca Vieramiejčyk, Kabančuk nazyvaje vyrvanym z kantekstu, a jaho mahčymaje dačynieńnie da zabarony na ŭjezd Vieramiejčyku — «kanśpirałohijaj». Jon źviartaje ŭvahu, što taja pierapiska ŭ telehramie adbyłasia na paŭhoda paźniej za sprobu Vieramiejčyka na pačatku 2023-ha zajechać va Ukrainu.
«Ja hatovy prajści niezaležnuju pravierku na «palihrafie» nakont taho, što ja nie datyčny da spravy Vieramiejčyka i naohuł nie viedaŭ, što jaho zanieśli ŭ «stop-list» na ŭjezd», — padkreślivaje Kabančuk.
«Nakont baraćby za resursy. Adzinyja resursy, jakija ja atrymaŭ — heta było majo hrašovaje zabieśpiačeńnie na kantrakcie ŭ ZSU. Svaje asabistyja suviazi vykarystoŭvaŭ dla zabieśpiačeńnia PKK», — dadaje były namieśnik kamandzira pałka.
Kabančuk spyniajecca na pytańni ŭvachodu kalinoŭcaŭ u palityčny praces.
«Jašče napiaredadni abviaščeńnia Abjadnanaha Pierachodnaha Kabinieta nam pryjšła prapanova, kab tudy ŭvajšoŭ pradstaŭnik ad PKK. Ale tady heta rašeńnie było zabłakavana niekalkimi ludźmi, jakich zaraz užo niama ŭ PKK. Ja ličyŭ, što heta była pamyłka, jakaja adsoŭvała dobraachvotnikaŭ ad mahčymaści šyrokaj kamunikacyi. Z nas sprabavali lapić vobraz marhinałaŭ-nieadekvataŭ, praź miedyjnyja ataki ŭ tym liku. Heta supadała z zadačami śpiecsłužb režymu, kab nie adbyłosia złučeńnia siłavoj i palityčnaj kampanienty demakratyčnych sił Biełarusi. Na siońniašni čas niekalki dobraachvotnikaŭ uvajšli ŭ roznyja struktury demakratyčnych sił, u tym liku ja zajšoŭ u APK, realizujecca zadača pa sinchranizacyi dziejańniaŭ i heta razburaje płany režymu».
Kabančuk piša:
«Na siońnia połk imia K. Kalinoŭskaha hodna pradstaŭlaje biełarusaŭ va Ukrainie, pakazvajučy ŭkrainskamu narodu, što jość alternatyva režymu. Čas pakazaŭ słušnaść našaj kancepcyi pa stvareńni nacyjanalnaha padraździaleńnia. Niahledziačy na pieraškody i namahańni varožych struktur, PKK zachoŭvaje svoj bajavy kaściak.
Hrupy bajcoŭ, jakija pa roznych pryčynach adkałolisia ad PKK, ci pierastali isnavać, ci nie zaŭvažny ŭ prasoŭvańni biełaruskaha paradku dnia va Ukrainie. Niekatoryja z vajaroŭ źmianili niekalki padraździaleńniaŭ i paviarnulisia znoŭ da PKK, heta taksama vynik pazityŭnych reform u pałku».
Mierkavańnie, što połk Kalinoŭskaha moh pieraškadžać stvarać alternatyŭnyja padraździaleńni va Ukrainie, Kabančuk nazyvaje «śmiešnym».
«Ukraina, jak na pačatku poŭnamaštabnaj vajny, tak i zaraz zacikaŭlena ŭ novych rekrutach i strukturach. Pry adekvatnym padychodzie novyja «Čerčeli, jakim na błokpastach čeść addajuć(s)» mahli b stvarać bataljony-dyvizii. Ci Kalinoŭcy taksama pieraškadžali Sachaščyku i ŭ Polščy pracavać z «Paspalitym Rušańniem»?» — zadajecca pytańniem Kabančuk.
Kamientary