Pamior zasnavalnik «Biełaruskaha histaryčnaha časopisa»

Pamior Vasil Kušnier, zasnavalnik i pieršy hałoŭny redaktar «Biełaruskaha histaryčnaha časopisa».

78‑hadovy historyk pajšoŭ z žyćcia 15 listapada 2025 hoda paśla praciahłaj chvaroby.

Jon 18 hadoŭ (z 1993 pa 2011) byŭ hałoŭnym redaktaram «Biełaruskaha histaryčnaha časopisa» — hałoŭnaha navukovaha časopisa krainy pa histaryčnym profili.

Pavialičyć

Vasil Kušnier naradziŭsia ŭ vioscy Małyja Žuchavičy (ciapier Karelicki rajon Hrodzienskaj vobłaści). Paśla zakančeńnia siaredniaj škoły niekatory čas pracavaŭ nastaŭnikam fizkultury ŭ Ajucavickaj vaśmihadovaj škole (Karelicki rajon). U 1971 hodzie skončyŭ histaryčny fakultet Biełaruskaha dziaržaŭnaha ŭniviersiteta.

Paśla słužby ŭ armii (u 1973) pastupiŭ u aśpiranturu Minskaha dziaržaŭnaha piedahahičnaha instytuta. U 1977‑m abaraniŭ kandydackuju dysiertacyju na temu «Vajenna-patryjatyčnaje vychavańnie i padrychtoŭka pracoŭnych Biełarusi da abarony Radzimy (1921‑1925 hh.)».

Z 1978 pa 1980 pracavaŭ staršym vykładčykam historyi SSSR i savietnikam dekana instytuta imia Chase Marci (horad Kamahuej, Kuba). U kastryčniku 1980‑ha viarnuŭsia ŭ Minsk. Pracavaŭ staršym vykładčykam kafiedry historyi KPSS Minskaha piedinstytuta, potym (z 1982 hoda) — dacentam.

Jon aktyŭna vystupaŭ na šmatlikich navukovych kanfierencyjach, źjaŭlaŭsia staršyniom Savieta maładych vučonych instytuta.

U 1988 pierajšoŭ pracavać u Ministerstva narodnaj adukacyi BSSR, dzie byŭ da 1992. Spačatku byŭ načalnikam adździeła vykładańnia hramadskich navuk Hałoŭnaha ŭpraŭleńnia vyšejšaj adukacyi, potym — hałoŭnym inśpiektaram Upraŭleńnia vyšejšych navučalnych ustanoŭ i piedahahičnaj adukacyi.

U kancy 1990‑ch Kušnier pryniaŭ aktyŭny ŭdzieł u prajekcie «Słavutyja imiony Baćkaŭščyny».

Byŭ adnym z navukovych kansultantaŭ, a taksama aŭtaram artykułaŭ u «Encykłapiedyi historyi Biełarusi» u 6 tamach (1994—2003) i «Biełaruskaj encykłapiedyi» u 18 tamach (1996—2004).

U 2005 hodzie vyjšli z druku vučebnyja dapamožniki, jakija jon dapamahaŭ rychtavać — «Historyja Biełarusi: u kantekście suśvietnych cyvilizacyj» i «Vialikaja Ajčynnaja vajna savieckaha naroda: u kantekście Druhoj suśvietnaj vajny».

Mieŭ bolš za 200 publikacyj na biełaruskaj, polskaj, ispanskaj i inšych movach.

Kušnier praciahvaŭ pracavać i vykładčykam. Z 1988 pa 2003 byŭ dacentam kafiedry historyi Biełaruskaha dziaržaŭnaha piedahahičnaha ŭniviersiteta imia Maksima Tanka, z 2003 pa 2008 — dacentam kafiedry ekanamičnaj historyi Biełaruskaha dziaržaŭnaha ekanamičnaha ŭniviersiteta. 

• 1
• 0
• 0
• 0
• 0
• 14
• 0
• 0