U polskim klaštary ŭkrainiec nažom zabiŭ čałavieka i paraniŭ jašče čatyroch

Paviedamleńnie pra napad pastupiła ŭ palicyju kala 9:30. Pravaachoŭniki zatrymali padazravanaha na terytoryi abactva. Vyśvietliłasia, što sam jon nie žyŭ u Jarasłavie: unačy pryjechaŭ u Polšču z Hiermanii.

Pavodle miascovaj prakurorki, mužčyna nakiroŭvaŭsia da pamiežnaha pierachodu dla vyjezdu va Ukrainu, ale dziaržaŭnuju miažu tam nie pierasiakaŭ. Śledčyja pakul nie vyśvietlili, jak mienavita jon dabraŭsia da Jarasłava i trapiŭ na terytoryju klaštara.

Pavodle śviedkaŭ, mužčyna moh trapić u klaštar razam z hrupaj školnikaŭ. Raniej na terytoryju manastyrskich sadoŭ zajšła hrupa vučniaŭ miascovaj škoły, jakich nastaŭniki vyvieli tudy na zaniatki fizkulturaj.

Jość taksama viersija, što ranicaj mužčyna pryjšoŭ da bramy klaštara i prasiŭ materyjalnaj dapamohi. Pavodle raskazaŭ śviedkaŭ, śviatary, jakija zajmajucca dabračynnaj dapamohaj dla małazabiaśpiečanych, adpravili jaho dadomu, pakolki jon moh być u stanie ałkaholnaha abo narkatyčnaha apjanieńnia. Jamu nibyta skazali viarnucca, kali jon budzie ćviarozy. Adzin sa śviedkaŭ śćviardžaŭ, što paśla hetaha mužčyna razzłavaŭsia i pačaŭ pahražać śviataram. Śledstva pakul nie paćvierdziła hetuju viersiju.

Nastajacielnica bieniedykcinskaha manastyra zajaviła, što napadnik nie mieŭ nijakich suviaziaŭ z manaskaj supolnaściu i što tam jaho nie viedali. Pavodle jaje słoŭ, jon vyhladaŭ vielmi ŭzbudžanym i byŭ apranuty ŭ karotkija šorty i majku, niahledziačy na chałodnaje nadvorje.

Prakurorka paviedamiła, što paśla traplańnia na terytoryju klaštara mužčyna zajšoŭ u kuchonnyja pamiaškańni. Mienavita tam adbyłasia jaho pieršaja sustreča ź ludźmi, jakija paźniej stali paciarpiełymi. Z kuchni jon uziaŭ nož, paśla čaho napad praciahnuŭsia ŭ kaściole.

Adzin z paciarpiełych mieŭ šmatlikija kołatyja i rezanyja rany hrudnoj kletki i žyvata. Jon straciŭ šmat kryvi, paśla čaho ŭ jaho spyniłasia serca. Reanimacyja nie dała vyniku. Jašče dva paciarpiełyja atrymali vielmi ciažkija ranieńni i byli praapieravanyja. Jany taksama mieli šmatlikija rany ŭ vobłaści žyvata i hrudnoj kletki.

Samoha napadnika taksama dastavili ŭ balnicu. U jaho ŭziali kroŭ, kab pravieryć najaŭnaść ałkaholu i narkatyčnych rečyvaŭ. Paśla hetaha mužčynu pieravieźli ŭ paviatovaje ŭpraŭleńnie palicyi ŭ Jarasłavie. Prakurorka adznačyła, što spačatku daktary pavinny vyznačyć, ci dazvalaje jaho stan zdaroŭja pravodzić ź im śledčyja dziejańni.

Paśla trahiedyi ŭłady Padkarpackaha vajavodstva zajavili pra nakiravańnie ŭ Jarasłaŭ dadatkovych sił dla harantavańnia biaśpieki. U horadzie taksama vyrašyli pavialičyć kolkaść palicejskich patruloŭ. Mer Jarasłava abviaściŭ u horadzie žałobu da kanca tydnia i zaklikaŭ admianić zapłanavanyja na hety čas masavyja mierapryjemstvy. Pavodle jaho słoŭ, dadatkovyja patruli nieabchodnyja taksama z-za aściarohi mahčymaj reakcyi na trahiedyju i novych incydentaŭ.

Na napad adreahavali polskija palityki. Premjer Donald Tusk paviedamiŭ, što padazravany znachodzicca ŭ rukach palicyi, i zajaviŭ, što jon pavinien panieści pakarańnie ŭ adpaviednaści z polskim zakanadaŭstvam. Prezident Karal Naŭrocki padkreśliŭ nieabchodnaść chutkaha i poŭnaha vyśviatleńnia ŭsich abstavin zdareńnia i harantavańnia biaśpieki ludziej. Pradstaŭniki inšych polskich palityčnych sił taksama zaklikali ŭstanavić matyvy napadnika, abstaviny jaho znachodžańnia ŭ Polščy i mahčymyja papiarednija kantakty sa słužbami.

Ambasada Ukrainy ŭ Polščy rašuča asudziła napad i zajaviła, što lubyja prajavy hvałtu źjaŭlajucca niedapuščalnymi. Dypłamaty vykazali spačuvańni siamji i blizkim zahinułaha, pažadali chutkaha vyzdaraŭleńnia paciarpiełym i zaklikali zachoŭvać spakoj i ŭzajemnuju padtrymku, kab nie dapuścić rostu hramadskaj napružanaści.

Śledstva praciahvajecca. Pakul nie ŭstanoŭleny kančatkovyja matyvy napadnika i dakładnaja paśladoŭnaść usich padziej, jakija pryviali da trahiedyi.

• 1
• 0
• 0
• 14
• 5
• 6
• 11
• 0