«Usich zamiežnikaŭ, jakija žyvuć u ZŠA i dałučylisia da pratestaŭ u padtrymku džychadu, my papiaredžvajem: u 2025 hodzie my vas znojdziem i departujem», — zajaviŭ Tramp.
Prezident ZŠA Donald Tramp padpisaŭ ukaz, nakiravany na baraćbu z antysiemityzmam, jaki praduhledžvaje departacyju zamiežnych studentaŭ i inšych niehramadzian, što ŭdzielničali ŭ prapaleścinskich pratestach, piša Radyjo Svaboda.
Pavodle infarmacyjnaha biuleteniu Biełaha doma, Ministerstva justycyi prymie nieadkładnyja miery kab vyjaŭlać i pieraśledavać pahrozy padpałaŭ, vandalizmu i hvałtu ŭ dačynieńni da amierykanskich habrejaŭ, mabilizujučy ŭsie fiederalnyja resursy dla baraćby z rostam antysiemityzmu va ŭniviersiteckich haradkach i na vulicach paśla napadu palestynskaj isłamisckaj hrupoŭki CHAMAS na Izrail 7 kastryčnika 2023 hoda.
Tramp zajaviŭ: «Usich zamiežnikaŭ, jakija žyvuć u ZŠA i dałučylisia da pratestaŭ u padtrymku džychadu, my papiaredžvajem: u 2025 hodzie my vas znojdziem i departujem».
Jon taksama paabiacaŭ anulavać studenckija vizy ŭsich prychilnikaŭ CHAMAS va ŭniviersiteckich haradkach, adznačyŭšy, što kampusy «jak nikoli raniej zaražanyja radykalizmam».
Pravaabarončyja arhanizacyi i jurysty śćviardžajuć, što takaja miera parušaje kanstytucyjnyja pravy na svabodu słova i, vierahodna, pryviadzie da sudovych pazovaŭ.
Kery DeSeł, staršy juryst Instytuta Pieršaj papraŭki imia Najta pry Kałumbijskim univiersitecie, padkreśliła, što Pieršaja papraŭka abaraniaje ŭsich u ZŠA, uklučajučy zamiežnych studentaŭ, i departacyja na padstavie palityčnych vykazvańniaŭ budzie niekanstytucyjnaj.
Rada pa amierykana-isłamskich adnosinach, bujnaja musulmanskaja pravaabarončaja hrupa, zajaviła ab namiery asprečyć ukaz u sudzie, kali Tramp pasprabuje jaho realizavać.
Mnohija prapaleścinskija pratestoŭcy admaŭlajuć padtrymku CHAMAS ci ŭdzieł u antysiemickich dziejańniach, zajaŭlajučy, što jany vystupajuć suprać vajennych dziejańniaŭ Izraila ŭ Hazie, dzie, pavodle danych orhanaŭ achovy zdaroŭja, zahinuła bolš za 47 000 čałaviek.
Ciapier čytajuć
Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni9
Kamientary