Stali viadomyja dakładnyja ličby novaha ŭtylzboru. Voś jakija aŭto padaražejuć
U Biełarusi pryniali novyja staŭki ŭtylzboru za aŭtamabili. Paviedamlałasia, što jany musiać stać kopijaj rasijskich. Ale z apublikavanaha siońnia dakumienta vynikaje, što poŭnaj kopii nie budzie. «Naša Niva» razabrałasia, što źmienicca i jakija mašyny vyrastuć u canie.
Jakija aŭto padaražejuć?
Staŭki ŭtylzboru zafiksavanyja ŭ biełaruskich rublach.
Pierš za ŭsio, novyja staŭki paŭpłyvajuć na košt novych mašyn u dyleraŭ. Dla lehkavikoŭ maładziejšych za try hady z abjomam ruchavika da 1 litra ŭtylzbor pavialičycca z 3 145 rubloŭ (kala $930) da 6 356 rubloŭ ($1 870).
Dla mašyn z abjomam ruchavika ad 1 da 2 litraŭ (samy raspaŭsiudžany varyjant) utylzbor vyraście z 11 645 rubloŭ (kala $3 400) da 23 575 rubloŭ (amal $7 000).
Dla lehkavych aŭto z abjomam ruchavika ad 2 da 3 litraŭ utylzbor pavialičycca z 32 727 rubloŭ (kala $9 600) da 66 248 rubloŭ (kala $19 500).
Hruba kažučy, staŭki na novyja aŭto z ruchavikami ŭnutranaha zharańnia vyraśli ŭdvaja.
Admietna, što hetyja źmieny nie pavinny adbicca na košcie ajčynnych Belgee, pakolki mašyny biełaruskaj vytvorčaści nie abkładajucca ŭtylizacyjnym zboram.
Buduć źmieny i dla elektramabilaŭ: kali pa starych staŭkach jurydyčnyja asoby pry ŭvozie novaj «elektryčki» płacili 544 rubli, to ciapier buduć płacić 1 148 rubloŭ. Tut rost taksama dvuchkratny, ale nieistotny, bo pačatkovaja staŭka była nizkaj.
Troški pazityvu
U aficyjnym paviedamleńni kazałasia pra «vyraŭnoŭvańnie» stavak utylzboru z rasijskimi staŭkami — možna było padumać, što heta zakranie i fizičnych asob.
U Rasii staŭki dla fizasob mienšyja, čym u Biełarusi — usiaho kala $34—52. Ale tam z vosieni taki taryf ličycca lhotnym.
Skarystacca lhotaj u RF možna nie čaściej, čym raz na hod. I samaje važnaje: takoje aŭto nie musić być pradadziena raniej, čym praz 12 miesiacaŭ z momantu mytnaha afarmleńnia ŭ RF. U advarotnym vypadku daviadziecca dapłacić utylzbor pa kamiercyjnym taryfie, jaki dziejničaje dla jurydyčnych asob.
U pastanovie nie zhadvajecca pra ilhotny charaktar biełaruskich stavak utylzboru dla fizičnych asob, tamu vynikaje, što samyja strašnyja čakańni nie apraŭdalisia.
Tym nie mienš bieź źmien nie abyšłosia.
Dla aŭto ŭzrostam da troch hadoŭ utylzbor dla fizasob zastaŭsia raniejšym — 544 rubli (kala $160).
A voś dla mašyn, starejšych za try hady, sumu pavialičyli. Užo praz 10 dzion za takija aŭto zamiest 817 rubloŭ treba budzie płacić 1 089 rubloŭ. Takim čynam, rost skłaŭ kala 270 rubloŭ.
Nijakich abmiežavańniaŭ pa abjomie ruchavika, jak u RF, taksama nie źjaviłasia.
Nahadajem, što pierapradavać takija mašyny ŭ RF biez dadatkovaj apłaty rasijskaha ŭtylzboru pa kamiercyjnym taryfie možna tolki praz 12 miesiacaŭ z momantu razmytnieńnia ŭ Biełarusi.
Z kamiercyjnym transpartam — biada
I kali ź lehkavymi aŭto, jakija fizasoby pryhaniajuć z trecich krain, asabliva ničoha nie źmianiłasia, to z kamiercyjnym transpartam situacyja składaniej.
Staŭki ŭtylzboru za hruzavyja aŭto (u tym liku mały kamiercyjny transpart) adnolkavyja dla jurydyčnych i fizičnych asob.
Za hruzavyja transpartnyja srodki va ŭzroście da 3 hadoŭ z technična dapuščalnaj maksimalnaj masaj da 2,5 tony ŭtylzbor pavialičycca da 29 514 rubloŭ ($8 700) zamiest 17 316 rubloŭ ($5 000).
Za starejšyja hruzaviki — 42 919 rubloŭ ($12 600) zamiest 25 161 rubla ($7 400).
Na hruzaviki z ahulnaj vahoj ad 2,5 da 3,5 ton (papularnyja busy pad katehoryju B) utylzbor budzie takim:
- za aŭto da 3 hadoŭ — 31 792 rubli ($9 350) zamiest 18 653 rubloŭ ($5 500);
- za bolš staryja — 46 258 rubloŭ ($13 600) zamiest 27 137 rubloŭ ($8 000).
Admietna, što heta ŭžo druhoje pavyšeńnie stavak utylzboru na praciahu hoda dla jurydyčnych asob i kamiercyjnaha transpartu. Apošni raz staŭki pierahladalisia viasnoj 2024 hoda.
Takim čynam, jašče roŭna hod tamu pry ŭvozie 4—5-hadovaha busa typu Renault Master, Mercedes Sprinter i h.d. treba było zapłacić 10 209 rubloŭ, a ciapier za anałahičnaje aŭto daviadziecca płacić 46 258 rubloŭ.
Kamientary