Na biełaruska-polskaj miažy ŭ čatyry razy mienš stali vyjaŭlać kantrabandnyja cyharety
U 2024 hodzie pamiežnaja słužba Polščy vyjaviła na miažy ź Biełaruśsiu ŭ dva razy mienš kantrabandnych tavaraŭ, čym u 2023 hodzie, vynikaje sa statystyki viedamstva. Usiaho ŭdałosia spynić uvoz i vyvaz pradukcyi nielehalnaha pachodžańnia na sumu 15,5 młn złotych (kala 3,7 młn dalaraŭ), piša Most.
Macniej za ŭsio skaraciŭsia nielehalny ŭvoz cyharet. Koštavy abjom vyjaŭlenaj kantrabandy pamienšyŭsia amal u čatyry razy — z 24,5 młn złotych (kala 6 młn dalaraŭ) da 6,3 młn (kala 1,5 młn). Na 35% źmienšyŭsia koštavy abjom vyjaŭlenaha kantrabandnaha tytuniu — z 38,2 tys. złotych (kala 9,2 tys. dalaraŭ) da 25 tys. (kala 6 tys.).
Kantrabanda ałkaholu taksama skaraciłasia bolš čym u čatyry razy — z 10,1 tys. złotych (kala 2,4 tys. dalaraŭ) da 2,5 tys. (kala 600 dalaraŭ).
Tym nie mienš, nielehalny vyvaz u Biełaruś praz polska-biełaruskuju miažu zachoŭvajecca. Naprykład, pieramiaščeńnie transpartnych srodkaŭ z parušeńniem zakona navat pavialičyłasia. Za minuły hod na miažy było zatrymana 46 transpartnych srodkaŭ, a ŭ 2023 hodzie — 44. Ich ahulny košt vyras na 63% — z 5,4 młn złotych (kala 1,3 młn dalaraŭ) da 8,8 młn (kala 2,1 młn).
Jak praviła, havorka idzie pra mašyny, jakija byli ŭkradzienyja ŭ krainach ES. Časta im pierabivajuć VIN-numary i padrablajuć dakumienty. Časam złačyncy ustaloŭvajuć ruchaviki z ukradzienych transpartnych srodkaŭ na inšyja.
Nielehalnaje pieramiaščeńnie praź biełaruska-polskuju miažu ŭ abodvuch napramkach inšych tavaraŭ źniziłasia z 649,7 tys. złotych (kala 157,1 dalara) da 389,1 tys. (kala 94,1), abo na 40%.
Raniej stała viadoma, što padobnyja pracesy źmianšeńnia abjomu vyjaŭlenaj kantrabandy nazirajucca i na biełaruska-litoŭskaj miažy.
Ciapier čytajuć
Hieroj Biełarusi Maryna Vasileŭskaja naradziła dačku ad kasmanaŭta Aleha Navickaha36
Kamientary