Ci mohuć jeŭrapiejskija vojski na terytoryi Ukrainy dapamahčy harantavać jaje biaśpieku? I kolki ich spatrebicca?

Jak piša The New York Times, nieviadoma, ci spynicca ahoń na rasijska-ŭkrainskim froncie, ale pierśpiektyvy pieramovaŭ paskoryli debaty ab tak zvanych jeŭrapiejskich «botach na ziamli» — niepasrednaj prysutnaści jeŭrapiejskaha vajennaha kantynhientu na terytoryi Ukrainy dla padtrymańnia miru, nazirańnia za spynieńniem ahniu i strymlivańnia Rasii ad budučaj ahresii. Pytańnie ŭ tym, čyje heta buduć «boty», kolki ich budzie i ci pahodzicca na heta Pucin.

Ci moža jeŭrapiejskaja vajskovaja prysutnaść harantavać biaśpieku Ukrainy?

Hetaje pytańnie stanie adnoj z centralnych tem Miunchienskaj kanfierencyi pa biaśpiecy, u jakoj prymuć udzieł vice-prezident ZŠA Džej Dzi Vens i dziaržsakratar Marka Rubia.

Niekatoryja jeŭrapiejskija krainy, u tym liku krainy Bałtyi, Francyja i Vialikabrytanija, užo vykazali hatoŭnaść razhledzieć mahčymaść adpraŭki svaich vajskoŭcaŭ u skład mižnarodnaha kantynhientu va Ukrainie. Adnak niamieckija ŭłady nazyvajuć hetuju ideju zaŭčasnaj.

Z ulikam taho, što siabroŭstva Ukrainy ŭ NATA ŭ bližejšyja hady zastajecca małaimaviernym, raźmiaščeńnie vialikaj kolkaści jeŭrapiejskich vojskaŭ na jaje terytoryi vyhladaje ryzykoŭnym krokam. Biez udziełu ZŠA, uklučajučy pavietranaje prykryćcio, raźviedku i supraćrakietnuju abaronu, jeŭrapiejskija vajskoŭcy buduć uraźlivyja pierad mahčymymi dziejańniami Rasii.

Prezident Ukrainy Uładzimir Zialenski zajaŭlaje, što hatovy da surjoznych pieramovaŭ ab zakančeńni vajny, ale patrabuje realnych harantyj biaśpieki ad Zachadu.

U adsutnaść členstva ŭ NATA jon razhladaje varyjant raźmiaščeńnia da 200 000 zamiežnych vajskoŭcaŭ. Adnak ekśpierty sumniajucca ŭ realnaści takoj zadumy — heta amal utraja bolš, čym kolkaść usioj brytanskaj armii.

Vysokapastaŭleny jeŭrapiejski čynoŭnik adznačyŭ, što Jeŭropa prosta nie maje takich resursaŭ, a luboje raźmiaščeńnie vojskaŭ pavinna adbyvacca pry padtrymcy ZŠA, bo biez hetaha jeŭrapiejskija siły zastanucca biezabaronnymi pierad adnoj z najbujniejšych jadziernych dziaržaŭ śvietu.

Pavialičyć

Ci mahčyma častkovaje raźmiaščeńnie jeŭrapiejskich vojskaŭ?

Navat sfarmiravać 40 000 vajskoŭcaŭ budzie niaprostaj zadačaj dla Jeŭropy, jakaja maje niedachop vojskaŭ, ekanamičnyja ciažkaści i nieabchodnaść pavyšać ułasnyja abaronnyja vydatki. Ale i hetaha moža być niedastatkova, kab strymać Rasiju.

Pavodle prafiesara Łondanskaha karaleŭskaha kaledža Łoŭrensa Frydmana (Lawrence Freedman), dla realnaha strymlivańnia spatrebicca bolš za 100 000 sałdat, kab zabiaśpiečvać ratacyju i apieratyŭny rezierv.

Niekatoryja ekśpierty aścierahajucca niedastatkovaj prysutnaści vojskaŭ — kab heta nie pryviało da rasijskich pravakacyj. Polšča, jakaja aktyŭna padtrymlivaje Ukrainu, pakul ustrymlivajecca ad udziełu ŭ takoj inicyjatyvie, pakolki razumieje nieabchodnaść prysutnaści ZŠA i choča atrymać harantyi hetaha z boku Donalda Trampa.

Adnak nie ŭsie ŭpeŭnieny, što ZŠA padtrymajuć taki scenar. Tramp moža prapanavać mirnuju ździełku, čakajučy ad Jeŭropy jaje finansavańnia i realizacyi, ličyć Alaksandra de Chup Šefier (Alexandra de Hoop Scheffer) z Hiermanskaha fondu Maršała. Pry hetym Jeŭropa choča adyhryvać bolš značnuju rolu ŭ pytańniach biaśpieki Ukrainy, kab mieć poŭny ŭpłyŭ na budučyja pieramovy.

A Pucin nie źmianiŭ svaich metaŭ: padparadkavać Ukrainu, spynić pašyreńnie NATA i stvaryć bufiernuju zonu pamiž Zachadam i Rasijaj. Rasijskaje MZS užo zajaviła, što prysutnaść vojskaŭ NATA va Ukrainie budzie «kateharyčna nieprymalnaj» i moža spravakavać eskałacyju.

Mahčymyja scenary

Prafiesar Łoŭrens Frydman nazyvaje try patencyjnyja scenary raźmiaščeńnia vojskaŭ:

Miratvorcy — lohkaŭzbrojeny kantynhient, pryznačany dla padtrymańnia pieramirja, jak u misijach AAN. Adnak z ulikam taho, što linija frontu va Ukrainie ciahniecca na 1300 km, patrebna budzie vielmi vialikaja kolkaść vajskoŭcaŭ.

Siły chutkaha reahavańnia (Tripwire force) — miechanizm, jaki dziejničaje ŭ miežach NATA. Ciapier takija siły raźmieščany ŭ vaśmi krainach, jakija miažujuć z Rasijaj. Hety miechanizm pracuje tolki kali isnuje vyraznaja, nieparyŭnaja suviaź pamiž vojskami na miescach i bolš bujnymi padmacavańniami. Tamu NATA pavialičvaje kolkaść vojskaŭ na ŭschodnim fłanhu.

Siły strymlivańnia — heta samy nadziejny, ale i najbolš resursazatratny varyjant. Jon patrabuje nie mienš za 150 000 sałdat z poŭnym kamplektam techniki, SPA i raźviedki, a taksama i amierykanskaj dapamohi ŭ stvareńni stratehičnych srodkaŭ, jakich Jeŭropie pa-raniejšamu nie chapaje, ad pavietranaha transpartu da spadarožnikaŭ i supraćrakietnaj abarony. Ale mienavita hety scenar naŭrad ci prymalny dla Rasii.

Tamu najbolš realistyčnym padychodam na bližejšuju budučyniu moža być «madel dzikabraza» — uzmacnieńnie ŭkrainskaj armii sučasnaj zbrojaj, resursami i navučańniem, kab zrabić patencyjnuju novuju ahresiju zanadta darahoj i ryzykoŭnaj dla Rasii. Ale hety padychod patrabuje daŭhaterminovych abaviazacielstvaŭ z boku Zachadu.

Zaraz hałoŭnaja zadača Ukrainy — spynić pavolnaje nastupleńnie Rasii na ŭschodzie i prymusić Pucina da pieramoŭ, vykarystoŭvajučy vajenny cisk i sankcyi. Dla Trampa heta stanie surjoznym vyprabavańniem, kali jon choča vykanać svajo abiacańnie «spynić vajnu».

• 0
• 1
• 2
• 2
• 0
• 0
• 0
• 1