Mirasłavu Łazoŭskamu chočuć nadać zvańnie hanarovaha hramadzianina Roŭna
U Roŭnie 10 červienia adkryłasia vystava «Historyja biełaruskaha supracivu», arhanizavanaja dabračynnym fondam «Vilna Biłoruś». Ekspazicyja pryśviečana baraćbie biełarusaŭ za svabodu i niezaležnaść, a taksama sučasnamu supraćstajańniu rasiejskaj ahresii i dyktatury, paviedamlaje «Radyjo Racyja».
Kiraŭnik hramadskaha sajuza «Biłoruśka śpilnota Ukrajini» Alaksiej Franckievič padkreśliŭ, što vystava maje nie tolki histaryčnaje značeńnie, ale i daje mahčymaść raskazać ukraincam pra biełarusaŭ i Biełaruś:
— U zale byli prafiesary, pa adukacyi žurnalisty, zadavali pytańni: ci jość siońnia ŭ Biełarusi naohuł žurnalistyka? Ci ciažka siońnia žurnalistam u tych umovach vykonvać svaju pracu ŭ Biełarusi? Jany navat nie viedajuć, što ŭ Biełarusi niama niezaležnaj žurnalistyki. Šmat čaho nie viedajuć ukraincy pra nas. Zaraz raspaŭsiudžvajecca infarmacyja, što z terytoryi Biełarusi znoŭku rychtujecca nastup. Heta taksama vielmi šmat kaho tut turbuje.
Napiaredadni vystavy pradstaŭniki biełaruskaj supolnaści razam z rodnymi Mirasłava Łazoŭskaha ŭstalavali biełaruski bieł-čyrvona-bieły ściažok na jaho baniery na Alei Słavy ŭ Roŭnie.
«Samaje hałoŭnaje, što heta zrabiŭ syn plamieńnicy, jaki vielmi lubić Mirasłava. Dla ich heta vielmi važna. Łazoŭski sučasny biełaruski nacyjanalny hieroj. Čałaviek, jaki vielmi šmat čaho zrabiŭ dla Biełarusi. Amal va ŭsich značnych padziejach jon prymaŭ udzieł», — kaža Franckievič
Taksama hramadski sajuz «Biłoruśka śpilnota Ukrajini» nakiravaŭ u Roŭnienskuju haradskuju radu zvarot ab prysvajeńni Mirasłavu Łazoŭskamu zvańnia hanarovaha hramadzianina Roŭna.
Akramia taho, biełaruskija aktyvisty pracujuć nad adkryćciom u Roŭnie pradstaŭnictva «Biłoruśkoji śpilnoti Ukrajini».
Mirasłaŭ Łazoŭski, viadomy pad pazyŭnym «Myš», naradziŭsia ŭ Minsku 10 lipienia 1973 hoda. Skončyŭ Biełaruski nacyjanalny techničny ŭniviersitet. U 1995 hodzie ŭstupiŭ u Biełaruskaje zhurtavańnie vajskoŭcaŭ. U tym ža hodzie jon staŭ adnym z zasnavalnikaŭ spartova-patryjatyčnaj arhanizacyi «Bieły lehijon», jakaja dziejničała ŭ Biełarusi da pačatku 2000‑ch hadoŭ i zajmałasia vychavańniem i navučańniem moładzi. Byŭ papularyzataram biełaruskaj kultury, supracoŭničaŭ z vydaviectvam, braŭ udzieł u knižnych kirmašach.
Paśla pačatku masavych represij u Biełarusi naprykancy leta 2021‑ha Mirasłaŭ pierajechaŭ va Ukrainu. Zahinuŭ jon 16 maja 2023 hoda pry abaronie Bachmuta ad rasijskich zachopnikaŭ.
Kamientary
Vielmi dobra, što fond "Vilna Biłoruś" i "Biełaruskaja supolnaść va Ukrainie" viaduć takuju pracu. Vystava "Z Ukrajinoju v sierci", pryśviečanaja biełarusam, jakija zahinuli, abaraniajučy Ukrainu i zmahajučysia za šaniec vyzvalić Biełaruś, pazbaviŭšy Łukašenku rasijskaj padtrymki, abjechała ŭžo amal usiu krainu, ekspanavałasia ŭ amal troch dziasiatkach łakacyjaŭ. Šmat chto va Ukrainie praź jaje daviedaŭsia, što biełarusy - druhaja ŭ kolkaści nacyja, jakaja vajuje ŭ šerahach Sił abarony Ukrainy, što biełarusy - u samych "haračych" punktach i tamu, na žal, addajuć svaje žyćci za ideały svabody.
Hetaja vystava raspaviadaje pra toje, jak biełarusy akazalisia ŭ toj situacyi, jakaja siońnia jość. Jak jany ŭsie tryccać hadoŭ dyktatury zmahalisia suprać łukašyzmu, jak zsiaredziny Biełarusi dapamahali Ukrainie. I varta skazać, što jana ŭsiudy vyklikaje niepadroblenuju cikavaść aŭdytoryi. Stendy vystavy admysłova napisanyja pa-biełarusku. I ŭkraincy, čytajučy ich, raptam adkryvajuć dla siabie, što jany dobra razumiejuć biełaruskuju movu, nikoli jaje nie vyvučaŭšy. A heta pakazvaje im mientalnuju blizkaść ukraincaŭ i biełarusaŭ.
Škada, što tak zvanaje "pradstaŭnictva demsił" pakul zaniataje inšymi kłopatami, akramia abarony reputacyi biełarusaŭ u vačach ukraincaŭ, jakuju rastaptaŭ Łukašenka, nadaŭšy terytoryju našaje krainy dla ŭzbrojenaha ŭvarvańnia va Ukrainu.