Stała viadoma, što zrobiać ź jaŭrejskimi nadmahillami i frahmientami bramy, znojdzienymi ŭ Minsku

Adkaz Upraŭleńnia kultury Minharvykankama na zvarot nakont ziemlanych rabot pa Kalektarnaj vulicy ŭzdoŭž terytoryi byłych jaŭrejskich mohiłak apublikavaŭ telehram-kanał «Spadčyna».

Budoŭla na miescy niadaŭna źniesienaj Histaryčnaj majsterni imia Leanida Levina pryviała da prakładki inžyniernych sietak pa ŭskrainie byłych mohiłak. U pačatku lutaha ŭ vykapanaj tranšei ŭ ziamli byli vyjaŭlenyja kala dziasiatka jaŭrejskich nadmahillaŭ (macevaŭ), a taksama frahmienty histaryčnaj mohiłkavaj bramy.

U vyniku rozhałasu raboty byli spynienyja, choć čynoŭniki i admaŭlali, što tranšeja prakładzienaja praz mohiłki. 

Jak paviedamlajecca ŭ adkazie, pradstaŭniki Instytuta historyi NAN Biełarusi praviali ahlad terytoryi i pryjšli da vysnovy, što ŭ tranšejach i advale hruntu nie zafiksavany kulturny słoj, čałaviečyja reštki ci inšyja archieałahičnyja znachodki. Što vyhladaje davoli dziŭna, bo havorka idzie pra centr horada.

Pavialičyć

Što budzie z nadmahillami i frahmientami bramy

U adkazie paviedamlajecca, što administracyja Maskoŭskaha rajona razam ź Mižnarodnym adukacyjnym centram imia Jahanesa Rau maje namier raźmiaścić vyjaŭlenyja jaŭrejskija macevy ŭ miemaryjalnym parku na miescy mohiłak, na poŭnač ad miesca znachodki, pobač z raniej vyjaŭlenymi nadmahillami.

Frahmienty muravanych i mietaličnych kanstrukcyj, elemienty dekoru kolišniaj bramy, jakija b mahli dazvolić u budučyni dakładna rekanstrujavać stračany pomnik, buduć vykarystanyja ŭ budučaj ekspazicyi Histaryčnych majsterniaŭ imia Leanida Levina paśla zakančeńnia rekanstrukcyi budynka.

Pavialičyć

Pavialičyć

Heta nie pieršy vypadak, kali budaŭničyja raboty zakranajuć staryja pomniki i pachavańni. U 2019 hodzie pry budaŭnictvie treciaj linii mietro tut byli raskapanyja nadmahilli i navat čałaviečyja pareštki. Ale niahledziačy na heta, čynoŭniki nie płanujuć nadavać achoŭny status byłym jaŭrejskim mohiłkam.

Pavodle infarmacyi, jakaja była pieradadziena čynoŭnikam ź Instytuta historyi, mohiłkam XIX — pieršaj pałovy XX stst. nie nadajecca status pomnika archieałohii. Ale ŭ Kodeksie ab kultury nasamreč takoha abmiežavańnia niama.

U 2019—2020 hadach, jak paviedamlajecca ŭ adkazie, nieadnarazova pastupali prapanovy ab nadańni terytoryi byłych jaŭrejskich mohiłak statusu historyka-kulturnaj kaštoŭnaści. Adnak jany byli adchilenyja praź nibyta nieadpaviednaść zakanadaŭstvu. 

Heta aznačaje, što vypadki budaŭničych rabot na byłych jaŭrejskich mohiłkach, chutčej za ŭsio, paŭtoracca ŭ budučyni. Ale jość i stanoŭčy momant: frahmienty histaryčnaj bramy nie zakapajuć nazad, a vystaviać na pakaz.

• 0
• 1
• 0
• 0
• 3
• 2
• 5
• 0