Vatykan paviedamiŭ ab nievialikim palapšeńni stanu Papy Franciška

Samaadčuvańnie Papy Franciška, jaki voś užo bolš za tydzień znachodzicca ŭ balnicy, niekalki palepšyłasia, paviedamili žurnalistam u paniadziełak u pres-słužbie Vatykana, udakładniŭšy, što stan 88-hadovaha pantyfika ŭsio jašče aceńvajecca jak krytyčny, piša Bi-bi-si.

U niadzielu stała viadoma, što daktary aścierahajucca za žyćcio pantyfika praz prablemy z dychańniem i nyrkami.

Adnak u paniadziełak žurnalistam zajavili, što «nievialikija prablemy z nyrkami» — nie padstava dla turboty.

«U paniadziełak [u Papy] navat nie było prystupaŭ astmy; palepšylisia i vyniki niekatorych analizaŭ», — paviedamlajecca ŭ viačernim biuleteni Vatykana z nahody stanu zdaroŭja pantyfika.

Tam taksama havorycca, što ŭ paniadziełak Francišak u peŭnym sensie navat viarnuŭsia da vykanańnia svaich abaviazkaŭ, patelefanavaŭšy probašču katalickaj parafii ŭ siektary Haza, «kab vykazać tamu svaju papskuju blizkaść».

Zrešty, bolšuju častku času, jak udakładniajecca ŭ tekście biuletenia, pantyfik pravodzić u kisłarodnaj mascy, jakaja palahčaje jamu dychańnie, choć daktary «svaje prahnozy pakul pradbačliva nie raskryvajuć».

U subotu Vatykan paviedamlaŭ, što ŭ Franciška zdaryŭsia reśpiratorny kryz, i jon znachodzicca ŭ krytyčnym stanie. Adnak užo ŭ niadzielnym biuleteni było skazana, što nastupnyja sutki «dalejšych reśpiratornych kryzaŭ zafiksavana nie było».

U niadzielu ž, kali pantyfik druhi raz nie zmoh vystupić pierad parafijanami asabista, prysutnym na płoščy Śviatoha Piatra začytali jahonuju zajavu, u jakoj Francišak źviartajecca da ŭsich katalikoŭ z prośbaj malicca za jahonaje zdaroŭje.

U paniadziełak uviečary tyja kardynały, što byli ŭ Rymie, sabralisia la sabora Śviatoha Piatra, kab pamalicca za Papu razam z členami vatykanskaj kuryi (administracyjnaha padraździaleńnia katalickaj carkvy) i duchavienstvam Rymskaj dyjacezii.

Uznačaliŭ viačerniuju malitvu dziaržsakratar Vatykana, kardynał Paralin, jaki paviedamiŭ, što z hetaha dnia kardynały, jakija znachodziacca ŭ Rymie, buduć źbiracca kožny viečar dla čytańnia psałmoŭ.

U maładości Francišak pieranios ciažki pleŭryt, u vyniku jakoha jamu daviałosia vydalić častku lohkaha. Z tych časoŭ pantyfik asabliva schilny pnieŭmanii — jak virusnaha pachodžańnia, tak i bakteryjalnaha abo hrybkovaha.

Tamu za 12 hadoŭ, što pantyfik pravioŭ na čale Rymska-katalickaj carkvy, jon nieadnarazova traplaŭ u balnicu. Apošni raz-u sakaviku 2023 hoda, kali jaho daviałosia špitalizavać z branchitam.

Tady, vypisaŭšysia, Francišak pierš za ŭsio paviedamiŭ parafijanam: «Ja ŭsio jašče žyvy!»

• 1
• 0
• 0
• 0
• 0
• 1
• 0
• 1