Polšča zapuściła svoj «anałah ChatGPT» — što jon moža?
Polskaja madel štučnaha intelektu raspracavana dla padtrymki biznesu, dziaržaŭnych pasłuh i adukacyjnych płatform.
Na hetym tydni prezientavali «polskuju alternatyvu ChatGPT» — polskuju vialikuju moŭnuju madel PLLuM (Polish Large Language Model). Jana stvorana ŭ kamiercyjnym i niekamiercyjnym varyjantach.
«PLLuM — heta dokaz taho, što my možam raspracoŭvać sučasnyja technałohii na našych ułasnych umovach, na našaj rodnaj movie, na karyść hramadzian. My stvarajem asnovu dla intelektualnych dziaržaŭnych pasłuh i inavacyj, jakija akažuć realnuju padtrymku jak administracyi, tak i biznesu», — adznačyŭ vice-premjer i ministr ličbavych technałohij Kšyštaf Haŭkoŭski na prezientacyi.
Stvaralniki madeli adznačajuć, što PLLuM zasnavana na aryhinalnych polskich danych i pabudavana na adnym z najbujniejšych tekstavych karpusoŭ u krainie. Pry hetym jany pryznajuć, što polskaja vialikaja moŭnaja madel horšaja za ChatGPT.
Raspracoŭščyki zaŭvažajuć, što tekstaŭ na polskaj movie, na jakoj navučali PLLuM, mienš, čym na anhlijskaj, i heta ŭpłyvaje na jakaść. Tak u ChatGPT ad 200 miljardaŭ da tryljona paramietraŭ. Dakładny lik nieviadomy, bo OpenAI jaho nie raskryvaje. U PLLuM u samaj vialikaj viersii 70 miljardaŭ paramietraŭ.
«PLLuM — heta nadziejnaja madel, jakaja nakiravana na ŭmacavańnie ličbavaha suvierenitetu Polščy. Kali my aryjentujemsia tolki na zamiežnyja kampanii i amierykanskija kansorcyŭmy, my ŭsie pamylajemsia. Amierykanskija kampanii i ich paramietry — nie zapavietnaja ziamla», — cytuje polskaja presa słovy vice-premjera i ministra ličbavych technałohij.
Słovy ab nieabchodnaści pavieličeńnia niezaležnaści Polščy ad ZŠA ŭ pytańniach technałohij skazanyja nie prosta tak. U studzieni polski siektar štučnaha intelektu byŭ ahałomšany rašeńniem amierykanskaha ŭrada abmiežavać kolkaść vysokatechnałahičnych čypaŭ, jakija Polšča moža impartavać z ZŠA.
Jak paviedamlajecca, asnoŭnaj metaj PLLuM było stvareńnie polskamoŭnaha intelektualnaha pamočnika ŭ akazańni dziaržaŭnych pasłuh.
Siarod zapłanavanych funkcyj — virtualny pamočnik u sistemie e-Obywatel, jakaja daje hramadzianam publičnuju infarmacyju i pasłuhi, a taksama inšy pamočnik, pryznačany dla dapamohi dziaržsłužačym šlacham aŭtamatyzacyi apracoŭki dakumientaŭ, analizu kantentu, pošuku infarmacyi i adkazu na pytańni hramadzian.
PLLuM nie adzinaja polskaja raspracoŭka vialikaj moŭnaj madeli. Isnujuć i inšyja, naprykład Bielik ad fondu SpeakLeash, a taksama madeli Qra, stvoranyja ŭ supracoŭnictvie Hdańskaha technałahičnaha ŭniviersiteta i Nacyjanalnaha instytuta apracoŭki infarmacyi (OPI).
Polskaja dziaržava ŭžo inviestavała 3,5 miljona jeŭra ŭ PLLuM i źbirajecca patracić jašče 4,6 miljona jeŭra na ŭkaranieńnie madeli ŭ dziaržaŭnaje kiravańnie i pašyreńnie supracoŭnictva z novymi partniorami. Ułady spadziajucca, što inviestycyi ŭ ŠI dapamohuć stvaryć novyja kampanii, stymulujučy ekanamičny rost.
Dla prykładu, u kancy studzienia Francyja zapuściła madel ŠI pad nazvaj Lucie, adzin z prajektaŭ, jakija finansujucca ŭ ramkach prahramy France 2030, ahulny biudžet jakoj składaje 54 miljardy jeŭra. Adnak bot byŭ chutka adklučany paśla taho, jak pasprabavaŭ pierakanać karystalnikaŭ, što karovy adkładajuć jajki.
Polski anałah ChatGPT taksama ŭžo pakazaŭ svaju niedaskanałaść. Praŭda, nie tak jaskrava. Karystalniki abmiarkoŭvajuć toj fakt, što madel nie viedaje imia hienieralnaha prakurora krainy i maje ciažkaści z aśviatleńniem pracy śledčaj kamisii pa spravie vykarystańnia špijonskaha prahramnaha zabieśpiačeńnia Pegasus suprać polskich apazicyjanieraŭ, žurnalistaŭ i aktyvistaŭ.
«Ludziej prymušali dumać, što ničoha nikoli nie źmienicca». Chto taki antykamunist Łasła Krasnaharkai, jaki atrymaŭ Nobieleŭskuju premiju pa litaratury?99
Kamientary