«Dienieh niet, no vy dieržitieś». Pamierła žančyna z Kryma, jakoj Miadźviedzieŭ heta kazaŭ
Paśla sustrečy ź Miadźviedzievym joj pavysili piensiju, ale na sumu ŭ 6 razoŭ mienšuju, čym abiacali.
Pamierła rasijskaja piensijanierka Hanna Bujanava, jakoj Miadźviedzieŭ kazaŭ «Dienieh niet, no vy dieržitieś», paviedamlaje prajekt «Post».
Miem «Dienieh niet, no vy dieržitieś» naradziŭsia ŭ 2016 hodzie, kali tahačasny premjer Rasii Dźmitryj Miadźviedzieŭ naviedvaŭ Fieadosiju ŭ akupavanym Krymie. Jaho tady abstupiŭ natoŭp žycharoŭ. 60‑hadovaja Hanna Bujanava aburyłasia pamieram piensii, Miadźviedzieŭ apraŭdvaŭsia.
«Prosta hrošaj niama. Znojdziem hrošy, zrobim indeksacyju. Vy trymajciesia tut, usiaho dobraha, dobraha nastroju», — tak hučali słovy Miadźviedzieva, ale ŭ narodzie ich skaracili da viadomaha vyrazu.
Bujanava žyła ŭ vioscy Navapakroŭka. Haspadarka była hałoŭnaj krynicaj jaje dachodu: jana trymała chatniuju ptušku, vyroščvała harodninu i sadavinu. U Hanny 30 hadoŭ pracoŭnaha stažu. Paśla sustrečy ź Miadźviedzievym joj pavysili piensiju, ale na sumu ŭ 6 razoŭ mienšuju, čym abiacali.
Niekalki razoŭ da Hanny pryjazdžali reparciory. Ale apošnija šeść hadoŭ pra jaje žyćcio nie było viadoma.
«Jana pracavała ŭ roznych miescach. U stałoŭcy pracavała. Na piensii była. Haspadarki ŭžo nie było, kab jaje nie napružvać», — raspavioŭ małodšy syn Bujanavaj Mikałaj. Pavodle jaho słoŭ, piensiju joj padnimali na 500 rubloŭ, asablivaj sacdapamohi dla maci jon nie pryhadvaje.
U krasaviku minułaha hoda ŭ Hanny zdaryŭsia pieršy insult, u kancy lipienia — druhi. Bujanava pamierła 2 žniŭnia 2025-ha.
Kamientary