Ułady nastrojenyja rašuča zmahacca z aŭtachłamam u haradskich dvarach
U lutym Kamitet dziaržaŭnaha kantrolu pravioŭ haračuju liniju pa nieekspłutavanych aŭtamabilach, pakinutych u dvarach žyłych damoŭ. Ciapier rychtujucca prapanovy, jak z hetym aŭtachłamam efiektyŭna zmahacca.
«Tema vyklikała vialikuju cikavaść. Za dva dni było pryniata bolš za 180 zvankoŭ. Jašče 375 paviedamleńniaŭ pastupiła ŭ čat-bot telehram-kanała Kamiteta dziaržkantrolu. Paviedamleńni pra kankretnyja prykłady, kali miesiacami ŭ dvarach znachodzilisia nieekspłutavanyja aŭtamabili, pastupili z usich rehijonaŭ krainy. Pryčym kala pałovy — ad žycharoŭ stalicy», — adznačajuć u KDK.
Pa vynikach haračaj linii viedamstva nakiravała infarmacyju ŭ miascovyja orhany ŭłady, kab śpiecyjalisty ahledzieli ŭsie hetyja aŭto i «pryniali apieratyŭnyja miery reahavańnia pry paćviardžeńni pryviedzienych faktaŭ».
Pry hetym paśla atrymańnia adpaviednych paviedamleńniaŭ asobnyja ŭładalniki aŭtamabilaŭ, jakija nie ekspłuatujucca, nibyta ŭžo prybrali svoj transpart z dvaroŭ.
U KDK nahadali, što ciaham 30 dzion uładalnik takoha transpartu, jaki atrymaŭ paviedamleńnie, pavinien albo samastojna pieramiasić jaho na achoŭnuju stajanku, albo pryvieści ŭ naležny stan. Kali hetaha nie adbudziecca, to aŭtamabil zabiare na štrafstajanku evakuatar.
«Nieabchodna adznačyć, što ciapierašniaj viasnoj Kamitet dziaržkantrolu praviadzie dadatkovyja kantrolna-analityčnyja mierapryjemstvy pa hetaj tematycy, pa vynikach jakich buduć vypracavanyja prapanovy pa palapšeńniu arhanizacyi pracy miascovych orhanaŭ ułady, źviazanaj z pakinutymi ŭ dvarach žyłych damoŭ nieekspłutavanymi aŭtamabilami», — havorycca ŭ paviedamleńni.
Ciapier čytajuć
81‑hadovuju maci aŭtaryteta Skitova z «Babulinaj krynki» kinuli ŭ SIZA KDB, kab jon narešcie zahavaryŭ6
Kamientary