U Biełarusi da kanca 2026 hoda płanujuć pavialičyć praciahłaść daroh z asfaltavym pakryćciom. Pra heta ŭ efiry telekanała «Biełaruś 1» raskazaŭ pieršy namieśnik ministra transpartu i kamunikacyj Ryhor Hłazko.
Pavodle słoŭ čynoŭnika, za apošnija hady kolkaść jamin na aŭtamabilnych trasach skaraciłasia ŭ piać razoŭ. Adnoj z pryčyn čynoŭnik nazvaŭ pavieličeńnie finansavańnia darožnaj haspadarki.
Na novuju piacihadovuju prahramu płanujuć vydatkavać 19 miljardaŭ rubloŭ. Ź ich 17 miljardaŭ pavinny pastupić ź dziaržaŭnaha biudžetu, u tym liku z Respublikanskaha darožnaha fondu, jašče 2 miljardy rubloŭ — ź miascovych biudžetaŭ. Hetyja srodki płanujuć nakiravać na ramont nie mienš jak 25 tysiač kiłamietraŭ daroh i nie mienš jak 500 mastoŭ.
Dla paraŭnańnia, za papiaredniuju piacihodku na darožnyja raboty było vydatkavana 11,5 miljarda rubloŭ, a adramantavali 18,5 tysiačy kiłamietraŭ daroh.
Ciapier darožniki imknucca na zahad Łukašenki złučyć ahraharadki z rajonnymi centrami darohami z asfaltavym pakryćciom. Da kanca 2026 hoda hravijnaje pakryćcio płanujuć zamianić udaskanalenym na 156 kiłamietrach daroh u rajonie 34 ahraharadkoŭ.
Paralelna praciahvajecca rekanstrukcyja bujnych aŭtamabilnych tras. Adnoj z asablivaściaŭ novych prajektaŭ stanie vykarystańnie zamiest asfaltu cemientna-bietonnaha pakryćcia.
U Homielskaj vobłaści na rekanstrukcyju ŭčastka trasy M-10 płanujuć vydatkavać bolš za 1,2 miljarda rubloŭ. Usiaho pavinny abnavić 85 kiłamietraŭ darohi. Raboty buduć pravodzicca paetapna. Uvosień 2026 hoda płanujecca adkryć pieršy ŭčastak praciahłaściu 16 kiłamietraŭ.
Jašče adzin bujny prajekt realizujuć u Minskaj vobłaści — tam rekanstrujujuć darohu R-28 «Minsk — Maładziečna — Narač».
Paśla zaviaršeńnia rabot hety ŭčastak stanie čatyrochpałosnym i budzie adpaviadać I techničnaj katehoryi. Prajekt taksama praduhledžvaje cemientna-bietonnaje pakryćcio i ŭstanoŭku dvuchbakovaj barjernaj aharodžy na raździalalnaj pałasie.
Kamientary