Nabyćcio biełarusam hazavaha terminała na Padlaššy vyklikała tryvohu palakaŭ, ale śpiecsłužby dali dabro

Atakam z boku šerahu polskich ŚMI padvierhnuŭsia biełaruski biznesoviec, zabudoŭščyk biełastockaha pałaca Lubamirskich Alaksiej Navicki.

Zaraz hety bujny hazatrejdar, čyj biznes uvachodzić u top-15 najbujniejšych aktyvaŭ biełarusaŭ u Polščy, zaviaršaje ździełku pa nabyćci čyhunačnaha terminała zvadkavanaha naftavaha hazu ŭ Plancie kala Naraŭki ŭ Padlaskim vajavodstvie. Abjekt raźmieščany niepadalok ad polska-biełaruskaj miažy i vykarystoŭvaŭsia dla pieravałki rasijskaha resursu, piša Vadzim Siachovič u svaim telehram-kanale.

Pradaŭcom hetaha, adnaho z prykładna 20 hazavych terminałaŭ na ŭschodnich miežach Polščy, vystupiła hazahandlovaja kampanija Grupa OniCo.

Jaje bolš čym na 80% kantraluje polski biznesoviec Słavamir Ščotka. Z 2019 hoda hety biznes znachodzicca ŭ restrukturyzacyi. U pošukach resursaŭ dla pahašeńnia abaviazacielstvaŭ Ščotka vyrašyŭ pradać hazavy terminał, jakim kiravała jaho daččynaja kampanija Alpetrol.

Padšturchnuła ŭładalnika terminała da takoha kroku i praciahłaje, vyklikanaje sankcyjami, padzieńnie abjomaŭ pieravałki. Jak paviedamlajecca, u 2025 hodzie ŭ paraŭnańni z 2024‑m jany skaracilisia na 59%, a ŭ pieršym paŭhodździ 2026 hoda ŭ paraŭnańni z anałahičnym pieryjadam minułaha hoda — na 81%.

U lipieni hetaha hoda pradaviec i pakupnik publična abviaścili pra svaju damoŭlenaść, strukturu šmatchadovaj ździełki i sumu, jakuju WGT Group zapłacić za aktyŭ, — 13,9 młn złotych (3,2 młn jeŭra). Ździełku płanavałasia zakryć nie paźniej za 31 śniežnia 2026 hoda paśla prachodžańnia nieabchodnych u adpaviednaści z polskim zakanadaŭstvam pracedur uzhadnieńnia z rehulatarami.

Toje, što dziaržaŭnyja struktury — Skarb Państwa i Lasy Państwowe — u vyniku nie skarystalisia svaim pieravažnym pravam na vykup hetaha terminała i ziamielnych učastkaŭ pry im, a taksama biełaruskaje pachodžańnie ŭładalnika 50% WGT Group Alaksieja Navickaha, pryviali da krytyčnych publikacyj u šerahu polskich ŚMI.

Pry hetym źviartaje na siabie ŭvahu toje, što publikacyi źjavilisia na fonie čarhovaha ŭsplosku karparatyŭnych roznahałośsiaŭ u OniCo.

U pryvatnaści, na sajcie OniCo niadaŭna było raźmieščana papiaredžańnie, što kampanija «vielmi zaniepakojenaja tym, što niejkaja asoba, jakaja nie vałodaje kantrolnym pakietam akcyj, viadzie kułuarnyja pieramovy ab prodažy hetaha pakieta».

U adkaz na zvaroty ŚMI da rehulataraŭ, a zatym i da pravaachoŭnych orhanaŭ tyja paćvierdzili, što terminał u Plancie polskaj dziaržavie nie cikavy i što pahrozy dla krainy ŭ suviazi sa źmienaj uładalnika jany nie bačać.

U lasnym viedamstvie, u pryvatnaści, zajavili, što «nabyćcio hetaj ułasnaści nie apraŭdanaje patrebami lesakarystańnia».

Ministerstva hramadskich aktyvaŭ reziumavała, što «terminał u Plancie maje nievialikaje miascovaje značeńnie».

Ahienctva ŭnutranaj biaśpieki, mierkavańnie jakoha mahło być vyrašalnym, paćvierdziła, što «abjekt nie źjaŭlajecca elemientam stratehičnaj infrastruktury» i što «ździełka była zaklučana pamiž pryvatnymi asobami, a Ahienctva ŭnutranaj biaśpieki nie maje prava ŭmiešvacca ŭ dziełavyja rašeńni ŭładalnikaŭ pryvatnych pradpryjemstvaŭ, kali tolki jany nie ŭjaŭlajuć kankretnaj pahrozy nacyjanalnaj biaśpiecy».

• 0
• 0
• 1
• 2
• 1
• 0
• 0
• 0