Za apošnija 14 hadoŭ miadźviedziaŭ u Biełarusi stała ŭ 10 razoŭ bolš

Ab tym, čamu miadźviedziaŭ stała bolš, jak paźbiehnuć kanfliktaŭ z kasałapymi i čamu ŭ bolšaści vypadkaŭ čałaviek sam pravakuje źviera, raspavioŭ «Minskaj praŭdzie» načalnik adździeła palaŭničaj haspadarki Ministerstva lasnoj haspadarki Alaksandr Kazarez.

U Minskaj vobłaści hałoŭnym «miadźviedžym krajem» tradycyjna vystupajuć paŭnočnyja rajony — u pieršuju čarhu Łahojski i Barysaŭski.

Kali ŭ 2011 hodzie ŭ krainie naličvałasia ŭsiaho kala 120 miadźviedziaŭ, to pa danych na 2025 hod ich kolkaść dasiahnuła 1289 asobin. Pa statystycy my bačym rost bolš čym u 10 razoŭ, — kaža śpiecyjalist.

Pryčyn u takoha rezkaha skačka niekalki. Pa-pieršaje, heta, biezumoŭna, naturalny bijałahičny pryrost za košt strohaj achovy ŭ ramkach Čyrvonaj knihi.

Pa-druhoje, adbyvajecca mihracyja žyvioł u paŭnočna-ŭschodniuju častku Biełarusi z prylehłych abłaściej Rasii, da prykładu, Pskoŭskaja, Smalenskaja vobłaści. Pa-treciaje, bolš jakasny ŭlik žyvioł: sučasnaja technika dazvalaje dakładniej fiksavać kolkaść.

— Z rostam papulacyi niepaźbiežna ŭzrastaje i kolkaść kantaktaŭ. Kali ŭ 2021 hodzie my mieli ŭsiaho dva zvaroty z nahody miadźviedziaŭ, to ŭ 2025 hodzie ich kolkaść vyrasła da 22, — adznačaje Alaksandr Kazarez.

Psichałahičny efiekt «prysutnaści miadźviedzia ŭsiudy» šmat u čym padahravajecca sučasnymi technałohijami. Kali raniej vypadkovaja sustreča ŭ lesie zastavałasia bajkaj dla blizkich, to siońnia luby vidavočca dastaje smartfon, zdymaje videa i za ličanyja chviliny virusny rolik raźlatajecca pa sacsietkach, stvarajučy adčuvańnie masavaha «našeścia».

Pavialičyć

Adnak jość i abjektyŭnyja pryčyny, čamu drapiežniki stali śmialej padychodzić da žylla. Adzin z raspaŭsiudžanych faktaraŭ — heta najaŭnaść małanasielenych viosak.

Vymirańnie addalenych chutaroŭ i nievialikich viosak źnižaje faktar naturalnaha adpužvańnia źviera čałaviekam.

U toj ža čas Alaksandr Kazarez adznačaje pazityŭny faktar: u Biełarusi praktyčna adsutničajuć bujnyja adkrytyja charčovyja zvałki la nasielenych punktaŭ. Mienavita čystyja lasy i adsutnaść dastupnaha śmiećcievaha kormu ŭtrymlivajuć drapiežnikaŭ ad kanfliktnych situacyj.

Analiz kanfliktnych situacyj pakazvaje: u bolšaści vypadkaŭ ludzi sami, chaj i nieŭśviadomlena, pravakujuć źjaŭleńnie miadźviedzia la svaich damoŭ.

— Časty prykład — nieabharodžanym i nieobkošanyja pčalniki la kraju lesu, — tłumačyć pradstaŭnik Minlashasa.

— Dla miadźviedzia soty ź miodam i ličynkami — heta sapraŭdny padarunak. Ale ž navat elemientarnaja pieršasnaja aharodža, ŭstanoŭka sietki abo ačystka terytoryi zdolnyja spynić drapiežnika. Kali ž źvier prajaŭlaje nastojlivaść, dapamahajuć śpiecyjalnyja repielenty i sistema «elektrapastuch». Bazavyja miery zaściarohi dazvalajuć źvieści da minimumu ŭsich kanfliktnych situacyj.

Nie kožnaja sustreča realnaja

U Minlashasie źviartajuć uvahu: z rostam kolkaści paviedamleńniaŭ pra miadźviedziaŭ važna nie tolki reahavać na ich, ale i staranna analizavać kožny vypadak. Časam pravierka pakazvaje, što niebiaśpieka była pierabolšanaja abo sustreča z žyviołaj zusim apynułasia vydumanaj.

Alaksandr Kazarez pryvodzić kurjozny prykład z adnaho z rajonaŭ Bresckaj vobłaści, dzie miadźviedziaŭ praktyčna nikoli nie bačyli. Mužčyna patelefanavaŭ u ekstrannuju słužbu i paviedamiŭ, što da jaho ŭ dom bjecca miadźviedź, jaki sprabuje zabrać miedźviedziania, jakoha zajaŭnik nibyta adabraŭ u žyvioły dva dni tamu. Adnak prostaja pravierka pakazała: ni miedźviedziania, ni miadźviedzia ŭ hetaj historyi nie było.

Kali sutyknieńnia paźbiehnuć nie ŭdałosia, hałoŭnaje — zachoŭvać spakoj i nie pravakavać źviera. Nie varta padychodzić da miadźviedzia, kryčać ci rabić rezkija ruchi.

Kali žyvioła demanstruje ahresiju, možna pasprabavać vizualna pavialičyć svoj pamier — padniać ruki ci zaplečnik — i hučna zajavić pra siabie.

Kab źnizić imaviernaść niečakanaj sustrečy, padčas prahułki pa lesie, zboru hryboŭ abo jahad rekamiendujecca razmaŭlać i ruchacca dosyć hučna.

Pačuŭšy čałavieka zahadzia, miadźviedź, jak praviła, sam imkniecca syści i nie ŭstupać u kantakt.

• 0
• 0
• 0
• 0
• 1
• 0
• 2
• 0