Pra toje, što palityčnyja represii ŭ Biełarusi nie źmianšajuć abarotaŭ, krasamoŭna havoryć statystyka pa pieraśledzie žycharoŭ Homielskaj vobłaści. Sa spasyłkaj na načalnika ŭpraŭleńnia achovy pravaparadku i prafiłaktyki milicyi hramadskaj biaśpieki UUS abłvykankama Andreja Majsiejkava hazieta Homielskaha harvykankama apublikavała niekatoryja ličby, zaŭvažyŭ «Fłahštok».
Pavodle milicejskich źviestak, u studzieni 2025 hoda ŭ Homielskaj vobłaści «zafiksavana 50 złačynstvaŭ ekstremisckaj nakiravanaści», pa jakich ustanoŭleny 34 padazronyja. Heta značyć, što niekamu staviać u vinu nie adzin, a šerah palityčna matyvavanych artykułaŭ KK.
Pavodle słoŭ Majsiejkava, čaściej za ŭsio palityčnyja kryminalnyja spravy źviazany z publičnaj abrazaj Alaksandra Łukašenki, pradstaŭnikoŭ ułady, «raspalvańniem varožaści», «sadziejničańniem ekstremisckaj dziejnaści».
Vierahodna, siarod hetych 50 kryminalnych spraŭ – istotnaja dola «złačynstvaŭ» 2020 hoda — siłaviki da hetaha času šukajuć tych, chto pisaŭ niehatyŭnyja kamientary ŭ adras uładaŭ u sacsietkach i čatach. Pra heta niadaŭna havaryŭ i prakuror Homielskaha rajona Alaksandr Šynkaroŭ.
Akramia kryminalnaha pieraśledu praciahvajecca i pošuk tych, chto padpisany na niezaležnyja infarmacyjnyja resursy, abvieščanyja ŭ Biełarusi «ekstremisckimi».
Majsiejkaŭ zajaviŭ, što za studzień składziena 122 pratakoły «za łajki i padpiski» (aficyjna heta hučyć jak «raspaŭsiud i zachoŭvańnie infarmacyjnaj pradukcyi, jakaja źmiaščaje zakliki da ekstremisckaj dziejnaści abo prapahanduje jaje).
U raskładzie sudoŭ takoj kolkaści pracesaŭ nie było — značyć, sudy chavajuć realnuju karcinu abo nie paśpiavajuć unosić usie spravy ŭ raskład.
Načalnik upraŭleńnia pry hetym zapeŭnivaje, što vyklučana pryciahnieńnie da adkaznaści čałavieka, jaki vypadkova łajknuŭ publikacyju — «pa kožnym hramadzianinie, jaki dapuściŭ takija dziejańni, pravodzicca pravierka».
Akramia taho, Majsiejkaŭ zajaviŭ, što nibyta «ŭ apošnija dva hady adbyłasia istotnaja transfarmacyja: prychilniki ekstremisckich pohladaŭ vykarystoŭvajuć bolš radykalny mietad — padrychtoŭku i arhanizacyju teraktaŭ na terytoryi respubliki». Chacia pra takija fakty ničoha nie paviedamlałasia — byli tolki adzinkavyja pracesy za «terakty» pa sfabrykavanych abvinavačvańniach.
«Anlifanščyca ź Pinska» kaža, što jana nie anlifanščyca i nie ŭ rabstvie ŭ Mjanmie6
Kamientary