Palitźniavolenaja Antanina Kanavałava raskazała, što joj prapanoŭvaŭ HUBAZiK paśla jaje vyzvaleńnia

Jak zhadvaje Antanina Kanavałava ŭ intervju «Aljansu rasśledavalnikaŭ Biełarusi», praź niekalki sutak paśla vyzvaleńnia joj pazvaniŭ inśpiektar z RUUS i skazaŭ, što ź joj chočuć sustrecca, ale nie nazvaŭ, chto kankretna. U vyniku žančynu zaprasili ŭ budynak, jaki raźmieščany ŭ Minsku na vulicy Revalucyjnaja, 3. Ź internetu jana daviedałasia, što pa hetym adrasie raźmieščany HUBAZiK.

«Sa mnoj razmaŭlaŭ namieśnik načalnika HUBAZiKa pa Minsku i pa Minskaj vobłaści. I plus apieratyŭnyja supracoŭniki niejkija byli. Potym jany mianialisia.

Jany mnie zadavali pytańni: «Ci pamianiali vy svaje pohlady?». Viadoma, ja im kazała, što pamianiała. Mnie treba było zrabić usio dla taho, kab jany mnie pavieryli.

Ja im kazała pra toje, što maje dzieci viernucca ŭ Biełaruś. Chacia ja ŭžo viedała, što jany nie viernucca.

Jany pytalisia ab kałonii. «Jak zaraz pad kiraŭnictvam novaha načalnika?» Jany nie daviarajuć nikomu», — zhadvaje Kanavałava padrabiaznaści pieršaj sustrečy.

Pa jaje słovach, joj nie prapanoŭvali padpisvać nijakija dakumienty, ale havaryli pra toje, što mohuć uładkavać na pracu. Ad prapanovy jana admoviłasia, bo viedała, što za hetym staić:

«Jany ŭładkoŭvajuć na jaki-niebudź z zavodaŭ. Ty pačynaješ na ich pracavać. I hety čałaviek daviedvajecca nastroj supracoŭnikaŭ, jakija tam pracujuć».

Akramia ŭładkavańnia na pracu, siłaviki prapanoŭvali žančynie dapamohu ŭ viartańni dziaciej u krainu:

«Mnie kazali: «Kali vy nie možacie sami pryvieźci svaich dziaciej, my vam ich pryviaziom. Vy razumiejecie, što vašyja dzieci znachodziacca tam u zakładnikach». Ja razumieju, što jany nijakija nie zakładniki, ale mnie treba rabić vyraz tvaru taki, što ja im vieru».

Akramia hetaha, jak śćviardžaje žančyna, siłaviki cikavilisia ŭ jaje, chto z asudžanych, jakija znachodzilisia razam ź joj u kałonii, varty vyzvaleńnia. «Ja kazała, što ŭsie».

Paśla pieršaj sustrečy supracoŭniki HUBAZiK razmaŭlali z Kanavałavaj jašče čatyry razy. Pa jaje słovach, siłaviki jaje «raspracoŭvali dla taho, kab u dalejšym supracoŭničać».

Zrazumieŭšy, što takoha žadańnia ŭ jaje niama, pačali pahražać novym terminam pa artykule ab udziele ŭ pratestach. Jak śćviardžaje Kanavałava, razmovy ničym nie skončylisia. Na supracoŭnictva jana tak i nie pajšła i nie padpisvała nijakich papier. Praź niekatory čas jana vyjechała ź Biełarusi i sustrełasia ź dziećmi.

Muž Antaniny Siarhiej Jaraševič zastajecca za kratami.

• 13
• 0
• 2
• 0
• 3
• 5
• 12
• 0