Kolki čałaviek zahinuła ŭ Bučy padčas rasijskaj akupacyi: abnoŭlenyja danyja
Za čas bajavych dziejańniaŭ u Bučy i jaje rasijskaj akupacyi ŭ lutym-sakaviku 2022 hoda tut zahinuli sotni čałaviek. Nazva horada pad Kijevam nazaŭždy stała sinonimam vajennych złačynstvaŭ rasijskaj armii va Ukrainie. Niadaŭna archiŭny adździeł Bučanskaj haradskoj rady apublikavaŭ abnoŭlenyja danyja ab kolkaści achviar rasijskaha ŭvarvańnia. Bolšaść ź ich — mužčyny (ich u try razy bolš, čym žančyn). U Bučy taksama zahinuli 12 dziaciej roznaha ŭzrostu. Ludzi pamirali nie tolki ad kul, ale i z-za adsutnaści lekaŭ i miedyčnaj dapamohi. Byli zafiksavany i vypadki śmierciaŭ ad hoładu.
Napiaredadni treciaj hadaviny vyzvaleńnia Bučy ad rasijskaj akupacyi pra novyja padrabiaznaści trahiedyi piša BBC.
Zahinułyja ŭ Bučy i jaje navakollach
Pavodle spravazdačy Bučanskaha archiŭnaha adździeła, z pačatku poŭnamaštabnaha ŭvarvańnia Rasii 24 lutaha i da 31 sakavika 2022 hoda, kali Buča była deakupavanaja, u horadzie zahinuŭ 381 čałaviek.
«Siarod ich 281 čałaviek zahinuŭ u vyniku bajavych dziejańniaŭ, a 100 pamierli ad chvarob abo z-za nieakazańnia miedycynskaj dapamohi», — havorycca ŭ dakumiencie.
U toj ža čas u Bučanskaj haradskoj hramady (horad Buča, pasiołki Vorziel i Babincy, a taksama 11 sioł, jakija taksama byli pad akupacyjaj) kolkaść zahinułych značna vyšejšaja — 554 čałavieki. Ź ich 396 čałaviek zahinuli ŭ vyniku bajavych dziejańniaŭ, a 158 — ad chvarob i z-za niedachopu lekaŭ i adsutnaści miedycynskaj dapamohi.
Jašče 28 žycharoŭ Bučy zahinuli nie na hetaj terytoryi, a ŭ susiednich haradach.
«Usiaho 582 čałavieki, ź jakich 435 mužčyn i 147 žančyn. Ź ich 12 dziaciej (va ŭzroście ad 1,7 da 15 hadoŭ)», — paznačana ŭ spravazdačy.
43 cieły zastajucca nieapaznanymi, a 38 mirnych žycharoŭ Bučy ličacca źnikłymi bieź viestak. 33 žychary Bučanskaj hramady da hetaha času znachodziacca ŭ rasijskim pałonie, a adzin pałonny pamior.
Treba adznačyć, što ŭ ŚMI možna sustreć roznyja źviestki ab kolkaści achviar.
Jak tłumačyć načalnik archiŭnaha adździeła Bučanskaj haradskoj rady Ihar Bartkaŭ, błytanina vyklikanaja tym, što nie zaŭsiody vyrazna adroźnivajuć, pra jakuju mienavita terytaryjalnuju adzinku idzie havorka: pra sam horad Buča, Bučanskuju terytaryjalnuju hramadu ci naohuł pra Bučanski rajon, jaki ŭklučaje taksama horad Irpień, pasiołki.
Takim čynam, u zaležnaści ad terytoryi, kolkaść zahinuŭšych składaje:
- horad Buča — 381;
- Bučanskaja terytaryjalnaja hramada — 554;
- Bučanski rajon — kala 1200 (i hetaja ličba, pa dadzienych Nacyjanalnaj palicyi, moža jašče ŭzraści).
Nieapaznanyja abo pamierłyja ad hoładu
Bolš za ŭsio žycharoŭ Bučy zahinuła ŭ pieršyja try dni akupacyi, z 3 pa 5 sakavika — 137 śmierciaŭ.
Mienavita tady rasijskija vajskoŭcy rasstralali pałonnych bajcoŭ terytaryjalnaj abarony, vałanciorku Žannu Kamianiovu, jakaja sprabavała vyjechać z Bučy, Irynu Filkinu («žančynu z čyrvonym manikiuram») i jašče dziasiatki mirnych žycharoŭ.
Šmat achviar było i 27 lutaha 2022 hoda, kali rasijskaja kałona ŭpieršyniu pasprabavała prarvacca praz Buču ŭ Kijeŭ, ale była źniščana na vulicy Vakzalnaj — u toj dzień zahinuli 25 čałaviek.
Siarod ich — mužčyna ŭ samym centry horada, u jakoha trapiła kula, kali pry prajeździe bronietechniki rasijskija vajskoŭcy adkryli ahoń. Jon da hetaha času zastajecca nieapaznanym.
Ihar Bartkoŭ tłumačyć, što bolš za čatyry dziasiatki ciełaŭ usio jašče lažać u bieznazoŭnych mahiłach z-za niemahčymaści pravieści DNK-analiz. U niekatorych vypadkach mahčymyja svajaki źjechali za miažu i nie mohuć dać materyjał dla DNK-identyfikacyi. U inšych — uvohule nie viadoma, dzie šukać rodnych. Bo siarod zahinułych mahli być i niemiascovyja, naprykład, budaŭniki ci inšyja pryjezdžyja. Abo prosta adzinokija ludzi biez rodnych i navat znajomych u Bučy.
Naprykład, jašče ŭ kancy krasavika 2022 hoda bučanski morh adšukvaŭ svajakoŭ 17 čałaviek (jak identyfikavanych, tak i nieidentyfikavanych), jakija mahli b ich pachavać.
Niekalki pažyłych čałaviek pamierli z hoładu.
Vydańnie New York Times adrazu paśla deakupacyi apisvała situacyju ŭ pryvatnym domie sastarełych u Bučy.
«Šeść čałaviek u domie sastarełych pamierli ad hoładu, raspaviali pracaŭniki mohiłak, jakija zabirali cieły ŭ pačatku krasavika. Viestybiul byŭ ledzianym, i čaćviora z pamierłych znachodzilisia na vierandzie. U susiednim domie tyja ž rabotniki źniali z haliny dreva paviešanuju žančynu», — pisali amierykanskija žurnalisty.
Ihar Bartkoŭ paćviardžaje hetuju infarmacyju, ale adznačaje, što abstaviny śmierci hetych ludziej da kanca nie vyśvietleny.
U inšym vypadku ad hoładu pamierła 68-hadovaja Nina Bačok, jakaja pakutavała ad mientalnych parušeńniaŭ. Jaje starejšuju siastru Ludmiłu Bačok, jakaja dahladała jaje, 5 sakavika zastreliŭ snajpier u dvary ich doma.
Nina nie mahła samastojna zdabyć sabie ježu, i paśla vyzvaleńnia Bučy jaje cieła znajšli na kuchni.
U bučanskich čatach ab pošuku rodnych da hetaha času možna znajści paviedamleńnie svajački siaścior, jakaja ŭ sakaviku 2022 hoda sprabavała vyśvietlić ich los: «Maje patrebu ŭ ježy, lekach. Niama suviazi dziesiać dzion. Chacia b daviedacca, što jany žyvyja. Patrebna evakuacyja».
Ihar Bartkoŭ raspavioŭ jašče pra adzin taki vypadak śmierci ad hoładu.
86-hadovaja Volha Askołak pamierła ŭ Bučy 25 sakavika. Doma ŭ jaje zastałasia 59-hadovaja dačka Tamara, jakaja z naradžeńnia była invalidam i mieła patrebu ŭ dapamozie. Kali mienavita pamierła Tamara, nieviadoma — jaje cieła taksama znajšli ŭžo paśla sychodu rasijskich vajskoŭcaŭ.
U cełym, jak adznačaje Ihar Bartkoŭ, bolšaść zahinułych u Bučy — niemaładyja ludzi.
«Siaredni ŭzrost zahinułych u Bučanskaj abščynie — 54 hady, pa horadzie Buča — 55 hadoŭ», — kaža jon.
Jak reahuje Rasija
Z nabližeńniem treciaj hadaviny vyzvaleńnia Bučy ŭ Rasii stali ŭsio čaściej uspaminać pra jaje.
Pradstaŭnik RF u AAN, naprykład, abvinavaciŭ 11 sakavika ŭkrainskuju armiju ŭ zabojstvach mirnych žycharoŭ u Kurskaj vobłaści i supraćpastaviŭ heta padziejam pad Kijevam u sakaviku 2022 hoda:
«Heta nie niejkaja pastanovačnaja Buča, jakuju stvaryła kijeŭskaja ŭłada i kudy kijeŭski kniaziok vozić zachodnich haściej na ekskursii, heta — realnyja złačynstvy».
Rasija i jaje dypłamaty praciahvajuć admaŭlać dačynieńnie rasijskaj armii da zabojstvaŭ mirnych žycharoŭ u Bučy, a Maryja Zacharava skardzicca, što «rasijskim śledčym orhanam nieabchodna dadatkovaja infarmacyja ab trahičnych padziejach u Bučy».
Infarmacyju ŭkrainskich śledčych i inšych krynic ab tym, što adbyvałasia ŭ bučanskim rehijonie, u tym liku pajmiennyja śpisy zahinułych i śpisy rasijskich vajskoŭcaŭ, jakich Ukraina abvinavačvaje ŭ vajennych złačynstvach, rasijskaje MZS ihnaruje.
Zamiest hetaha jano patrabuje hetyja dadzienyja, u tym liku «śpis achviar pravakacyi», ad Sakrataryjata AAN.
MZS Rasii praciahvaje pieryjadyčna raspaŭsiudžvać «padrabiaznyja abviaržeńni» ab Bučy - videarolik, źniaty jašče ŭ 2022 hodzie.
Hetyja abviaržeńni ŭtrymlivajuć, u pryvatnaści, śćvierdžańni, što cieły zabitych na vulicach Bučy źjavilisia ŭžo paśla sychodu rasijskich vajskoŭcaŭ, što jany lažać tvaram uniz, kab ich było niemahčyma identyfikavać, i što jany nibyta nie majuć śladoŭ raskładańnia.
Adnak na spadarožnikavych zdymkach Maxar cieły byli zafiksavany jašče ŭ siaredzinie sakavika.
Cieły rasstralanych sa źviazanymi rukami možna zaŭvažyć i na videa hrupy aeraraźviedki dobraachvotnickaha farmiravańnia «Vilna Ukrajina», źniatym 24 sakavika 2022 hoda. Jano jość u rasparadžeńni Bi-bi-si.
Usie hetyja rajony Bučy tady znachodzilisia pad poŭnym kantrolem rasijskich vojskaŭ.
Što ž tyčycca «adsutnaści śladoŭ hnijeńnia», to palicyja Kijeŭskaj vobłaści adrazu paśla deakupacyi publikavała detalovyja zdymki znojdzienych i ekshumavanych ciełaŭ zahinułych žycharoŭ Bučy dla fiksacyi śmierciaŭ i pošuku svajakoŭ — z usimi prykmietami praciahłaha hnijeńnia.
Jašče adnym «dokazam» taho, što ŭkrainskija vajskoŭcy nibyta «sami raskładvali cieły zabitych» u Bučy, rasijskija dypłamaty nazyvajuć kadry ŭkrainskaha telekanała Freedom ad 3 krasavika, na jakich bajcy Sił abarony Ukrainy ciahnuć trupy trosami.
U realnaści ž heta byli miery zaściarohi — sakratar Bučanskaj haradskoj rady Taras Šapraŭski tady papiaredžvaŭ, što «zaminiravany navat cieły zahinułych».
Bučanski archiŭny adździeł viadzie rejestry zahinułych, źnikłych bieź viestak i pałonnych žycharoŭ abščyny, a taksama rejestr «rasijskich vajennych złačynstvaŭ i złačyncaŭ».
Adnak, jak tłumačyć Ihar Bartkoŭ, publikacyja, naprykład, poŭnaha śpisu imionaŭ zahinuŭšych žycharoŭ Bučy — heta ŭsio ž prerahatyva śledčych orhanaŭ.
Vierahodna, Ukrainie sapraŭdy varta aficyjna abnarodavać poŭny śpis imionaŭ zahinuŭšych u Bučy, u tym liku i ŭ AAN.
Rasśledavańnie vajennych złačynstvaŭ rasijskaj armii ŭ Bučy i navakollach praciahvajecca.
Juryj Biełavusaŭ, kiraŭnik departamienta ofisa Hienprakurora pa supraćdziejańni złačynstvam, učynienym va ŭmovach uzbrojenaha kanfliktu, niadaŭna paviedamiŭ, što za zabojstvy i ździeki nad mirnymi žycharami ŭ Bučy aficyjna vyłučany padazreńni suprać 28 rasijskich vajskoŭcaŭ.
U asnoŭnym havorka idzie ab bajcach 234. Desantna-šturmavaha pałka 76 dyvizii z Pskova, choć majucca danyja ab prysutnaści ŭ Bučy i inšych padraździaleńniaŭ rasijskaj armii i Rashvardyi.
«Jość hrupa prakuroraŭ, jość hrupa śledčych, jakija fizična znachodziacca ŭ Bučy i vyvučajuć usie materyjały. My dakładna viedajem, jakija padraździaleńni tam byli i jakija złačynstvy ŭčynialisia… Pa Bučy, ja ŭpeŭnieny, my dadzim vynik», — padkreśliŭ Jury Biełavusaŭ.
Kamientary
[Zredahavana]