«Usie byli ŭ šoku». Biełaruskaja ajcišnica raskazała, čamu vybrała dla žyćcia Vieniesuełu

«Vieniesueła — heta mara, ale nie maja, a majoj siabroŭki»

Vieniesueła — heta mara, ale nie maja, a majoj siabroŭki. Jana ŭžo byvała tut raniej, zakachałasia ŭ krainu ź pieršaha pohladu dy imknułasia siudy.

Ja prosta pryjechała ŭ adpačynak naviedać jaje, ale na ŭsialaki vypadak zrabiła padrychtoŭku, kab padoŭžyć vizu i pašukać pracu (z papiaredniaha dośviedu mnie zdavałasia, što znajdu jaje chutka). I ŭ vyniku zastałasia na niekalki miesiacaŭ.

Ja žyła na vostravie Marharyta i mahu raskazvać tolki pra jaho — na macieryku ŭsio moža być inakš.

Da Vieniesueły ja pracavała na adnu jeŭrapiejskuju firmu. Kali paviedamiła, što płanuju niejki čas pažyć u Vieniesuele, mnie skazali, što im heta niazručna (ja nie źbirałasia pracavać pavodle jeŭrapiejskaha času, bo ja sava, dla mianie pračnucca da 9‑j — heta pakuta). Darečy, maja znajomaja pracuje ź Vieniesueły na Biełaruś z druhoj nočy da 10‑j ranicy.

Tym nie mienš, na hetu jeŭrapiejskuju kampaniju ja niejki čas pracavała i ź Vieniesueły: paprasili na fryłansie dapamahać ź niekatorymi zadańniami. U takim farmacie anłajn my byli adnu-dźvie hadziny ŭ dzień. Składaniej było terminova vyrašać niejkija pytańni, ale dla mianie heta było niekrytyčna.

Na pracy, viadoma, usie byli ŭ šoku ad majho vybaru krainy. Ale potym pahladzieli fotki, mnohim spadabałasia.

Pryroda na Marharycie vielmi pryhožaja: Karybskaje mora, zialonyja hory, ružovyja salonyja aziory, plažy jak z fota turystyčnych sajtaŭ — usio heta tut jość.

Karha-biurakratyja

Paznajomiłasia ź miascovaj karha-biurakratyjaj. Zachavańnie farmalnaściaŭ praktyčna harantuje vynik, nichto hłybiej padadzienych papierak kapać nie budzie. Ź inšaha boku, vielmi treba ispanskaja mova, chacia b A2: navat u mihracyjnaj słužbie anhielskaj nie vałodajuć.

Zatoje ludzi tut vielmi vietlivyja, prajaviać da vas sapraŭdnuju cikavaść, prapanujuć dapamohu.

Pavialičyć

Śviatło adklučajecca štodnia

Niestabilnaść i hipierinflacyja, ź jakimi Vieniesueła asacyjujecca ŭ navinach, — heta 100% praŭda. Śviatło adklučajecca štodnia. Kamu pašancavała z rajonam — elektryčnaść moža prapaści prosta na 15 chvilin, a chtości pa niekalki hadzin siadzić bieź jaje i čakaje. Kamu ź miascovych treba — va ŭsich jość bieśpierabojniki. A ŭ vakansijach jość navat patrabavańnie zrabić skrynšot chutkaści asnoŭnaha internet-padklučeńnia i bekap-padklučeńnia (ja razdaju z mabilnaha, ale ŭ mianie łović nie vielmi).

Chatni internet na Marharycie chutki, mabilny nie vielmi (ale ŭ mianie byŭ adzin z samych tannych mabilnych taryfaŭ), 65 i 15 Mbit/s adpaviedna. Kali novy noŭt, to błekaŭt na hadzinu nie strašny, asabista mnie heta nie zaminała. Ale mohuć być niepryjemnyja momanty, kali elektryčnaść prapadzie padčas videazvanka. Ceny na internet daražejšyja, čym u Biełarusi.

Vodazabieśpiačeńnie śpiecyfičnaje

Vodazabieśpiačeńnie śpiecyfičnaje: u kožnaj kvatery i ŭ damach jość baki, jakija napaŭniajucca vadoj. U kvatery vadu padajuć dvojčy na tydzień, ale nie zaŭsiody pavodle raskładu, u damy — mohuć i raz na miesiac. Apošnim časam z vadoj stała nie vielmi stabilna, ludzi pratestavali ŭžo niekalki razoŭ.

Daŭžej za ŭsio ja pryzvyčajvałasia tut mienavita da hetaha vodazabieśpiačeńnia i da cykłaŭ padačy vady. Dla mianie ŭsio heta nie vyhladaje asabliva hihijenična — usio roŭna jak myć posud u race ŭ pachodzie. U mianie byli pryščepki ad dvuch hiepatytaŭ i słupniaku, tamu ja starałasia mocna nie dumać pra heta — žyvuć ža tut ludzi niejak.

Ceny jak biełaruskija, ale časam «jak biełaruskija, tolki ŭ dalarach»

Ceny ŭ supiermarkietach na niekatoryja pradukty prykładna jak biełaruskija, a na inšyja — jak biełaruskija, ale ŭ dalarach (heta značyć toje, što kaštuje ŭ nas try rubli, tut abydziecca ŭ $3). Kali ŭziać u siarednim, vychodzić krychu daražej. Kvitki na haradski aŭtobus, pakul ja žyła na Marharycie, padaraželi ŭtraja.

Adzieńnie kaštuje plus-minus jak u Biełarusi, a voś bytavaja technika i mebla strašenna darahija. Noŭtbuk, jaki ŭ ZŠA možna kupić za $600, tut budzie ŭdvaja daražejšy.

Ludziej ź jeŭrapiejskaj źniešnaściu nie kryŭdziać (na vostravie)

Z punktu hledžańnia biaśpieki na vostravie, padajecca, spakajniej, čym u kantynientalnaj častcy krainy. Jak mnie raskazvali, ludziej ź jeŭrapiejskaj źniešnaściu tut nichto nie budzie kryŭdzić. Z praktyki mahu skazać, što ludzi dobrazyčlivyja, vitajucca, niešta havorać. U mianie na hety vypadak była pryzapašana dziažurnaja fraza perdón, no hablo español («vybačajcie, ja nie havaru pa-ispansku»). Majoj ispanskaj chapała, kab zrazumieć pryvitańni i adkazać, adkul ja. Zvyčajna spačatku vieniesuelcy dumali, što ja niemka, potym prymali za ruskuju. Ale pra Biełaruś i pra biełarusaŭ jany viedajuć, bolšaść razumieje roźnicu.

Arenda — možna pašykavać za $500

Arenda žylla na Marharycie abychodzicca tańniej, čym u Minsku: za $300 možna znajści prystojnuju adnapakajoŭku, a za $500 možna naohuł pašykavać. Płaniroŭki žylla tam nie biełaruskija — na naš hust u kvaterach budzie šmat prastory. Ceny na kamunałku — jak pahladzieć. Z adnaho boku, rachunak za elektryčnaść $5 u miesiac. Ale ŭ lubym šmatkvaternym domie budzie tak zvany «administracyjny płaciež», roŭny miesiačnaj arendzie. Pry hetym zvyčajna jon płacicca adrazu za ŭvieś pieryjad kantraktu (3— 6‑12 miesiacaŭ). Darečy, u niekatorych kandaminiumaŭ jość pamiesiačnaja apłata.

Pavialičyć

Kartki, keš, krypta

Najaŭnyja ŭ Vieniesuele možna źniać pad vialiki adsotak i tolki da $1000 u miesiac. Tamu ja prosta pryviezła na Marharytu z saboj najaŭnyja hrošy i pa miery nieabchodnaści ich vydatkoŭvała. Tut u chodzie Binance, praź jaho amal usio možna apłacić. Biełaruskija Visa/Mastercard taksama ŭsiudy pracavali. Na Marharycie ŭ chodzie dalary. Miascovaja valuta mnie była patrebnaja chiba ŭ aŭtobusie, ale i tam možna było apłacić dalarami.

Z zamiežnymi pieravodami i najaŭnymi jość varyjanty, ale pra ich i doŭha raskazvać, i situacyja pastajanna mianiajecca. Praz paŭhoda jana ŭžo dakładna budzie nieaktualnaj.

Ja patraciła dva miesiacy na razborki z Payoneer, a ciapier tam naohuł biełaruskija rachunki zabanili. Škada, raniej jon byŭ dobrym arhumientam dla najmu (patencyjnym supracoŭnikam z Payoneer pracadaŭcy daviarajuć bolš, čym tym, chto prosić zarobak u krypcie).

Pavialičyć

Vieniesueła — heta niaprostaja kraina dla žyćcia. Ciapier jana ŭ ciažkim stanoviščy. Miascovyja mianie zapeŭnivali, što ŭžo chutka situacyja palepšycca. Ale maja ekanamičnaja adukacyja nie dazvalaje ŭ heta vieryć. Hadoŭ praz 5‑10 pryjazdžajcie, tut budzie dobra. Ale ciapier nie treba. Dla siabie ja vyrašyła, što, kali dazvolić zarobak, ja lepš pasprabuju susiedniuju Kałumbiju. Ale ŭ Vieniesuełu taksama jašče viarnusia.

Kali vy ŭsio ž surjozna pryhladajeciesia da hetaha rehijonu dla pierajezdu, rupliva ŭzvažcie ŭsio.

Takoje rašeńnie budzie kaštavać doraha. Pieraloty darahija, asabliva kali ŭ vas niama šenhienu abo vizy ZŠA. Žyllo ŭ Łacinskaj Amierycy taksama nie ŭsiudy tannaje. Miascovyja zarobki byvajuć niadrennyja, ale nie ŭ Vieniesuele. Nie zabyvajciesia pra pryščepki, navat miascovy hryp moža vas napałochać. Budźcie hatovyja sustreć skałapiendraŭ, skarpijonaŭ i tarakanaŭ (kali «pašancuje» — prosta ŭ vašym žylli). Budzie ŭvieś čas horača, pot licca ručajami.

• 0
• 0
• 0
• 4
• 0
• 0
• 0
• 0