«Zapłaciła 1500 zamiest 350 rubloŭ»: biełaruska raskazała, jak straciła hrošy, afarmlajučy apastyl praz «pamahatych»
Biełaruska, jakaja daŭno žyvie za miažoj, padzialiłasia ŭ sacsietkach, jak jana z-za niaviedańnia addała ŭ 4 razy bolš hrošaj za apastyl, čym mahła b: dziaŭčyna źviarnułasia da pasiarednikaŭ, ale paźniej zrazumieła, što ŭsio mahła zrabić sama — tańniej i bieź niervaŭ. CityDog.io raskazvaje, jak hetaha možna paźbiehnuć.
Dziaŭčyna ź nikam zh_rostik padzialiłasia historyjaj, jak straciła hrošy, sprabujučy zrabić apastyl praz «pamahatych». Jana zapłaciła 1500 rub. za pasłuhu, jakaja nasamreč kaštuje kala 350 rub.
Apastyl — heta śpiecyjalnaja piačatka, jakuju staviać na aficyjny dakumient dla paćviardžeńnia jaho sapraŭdnaści i zakonnaści. Taki štamp patrebny na tych papierach, jakija vy budziecie pradjaŭlać u inšaj dziaržavie.
Pa słovach dziaŭčyny, zaraz naŭprost zapisacca ŭ MZS Biełarusi, kab samastojna zrabić apastyl, vielmi składana. Hetym, jak jana śćviardžaje, karystajucca pasiaredniki, jakija abiacajuć zrabić usio chutka, biez čerhaŭ i mituśni, ale «za vialikija hrošy».
Watch on TikTok
Pa słovach biełaruski, jana źviarnułasia da «samaha tannaha pamahatara», i za apastyl adnaho dakumienta joj vystavili košt 1000 rub. Pry terminovym afarmleńni «suma mahła vyraści da 2000 rub.». Ale paźniej jana daviedałasia, što ŭsie hetyja pasiaredniki ŭsio roŭna iduć praz adnu i tuju ž aficyjnuju arhanizacyju — Nacyjanalny centr markietynhu. Hetaja struktura maje prava pieradavać dakumienty ŭ MZS ad imia hramadzian i «moža vydać patrebny dakumient za 3 dni».
Dastatkova aformić davieranaść u nataryŭsa na hetuju arhanizacyju i pryjści da ich asabista paśla 14:00, «kali prymajuć biez zapisu».
Tam, jak śćviardžaje dziaŭčyna, prymajuć dakumienty, vydajuć kvitancyju dla apłaty (u jaje vypadku na 350 rub.), i paźniej možna zabrać hatovy apastyl.
U vyniku biełaruska sama ž i adniesła dakumienty ŭ patrebnuju arhanizacyju, a ŭsio, za što płaciła «pamahataru», akazałasia prosta «niepatrebnym marnavańniem hrošaj, tamu što heta možna zrabić samomu».
«Liču, što hetyja pamahatary zarablajuć vyklučna na takich, jak ja, — chto daŭno nie žyvie ŭ Biełarusi i prosta nie ŭ kursie, jak pracuje sistema».
Čamu ŭ Biełarusi źjavilisia ciažkaści z atrymańniem apastyla?
Pieršyja prablemy z apastylem u Biełarusi źjavilisia 10 sakavika 2022 hoda, kali viedamstva bolš za 10 dzion nie prymała dakumienty. Paźniej biełarusy sutyknulisia z novymi ciažkaściami: 22 sakavika košt lehalizacyi dakumientaŭ vyras u 10 razoŭ (z 16 da 160 rub.).
Niekatoryja ekśpierty mierkavali, što takija miery byli zrobleny dziaržavaj, kab «utrymać u krainie biełarusaŭ, jakija źjazdžajuć».
Navat uletku 2024 hady vypuskniki stanavilisia ŭ čarhu pierad uvachodam u Departamient kantrolu jakaści adukacyi na Kazłova, dzie vydajuć dakumienty z apastylem.
Tady pryjom na apastyl i vydača aformlenych papier ažyćciaŭlalisia na praciahu tolki adnaho pracoŭnaha dnia.
Jak možna atrymać apastyl?
Minadukacyi Biełarusi vyrašyła spraścić afarmleńnie apastyla: zaraz zapisacca na padaču dakumientaŭ možna anłajn na sajcie viedamstva.
Dla hetaha nieabchodna ŭkazać vid dakumienta i jaho numar, a zatym vybrać zručnuju datu i čas z dastupnych varyjantaŭ.
Važna: z 3 sakavika 2025 hoda padać dakumienty na apastyl možna pa papiarednim elektronnym zapisie, ale jany prymajucca tolki ad ich uładalnika, i danyja ŭ formie zapisu pavinny supadać z aryhinałam. U advarotnym vypadku ŭ pryjomie mohuć admović. Pryjom dakumientaŭ, jak i raniej, prachodzić na Kazłova, 28, kabiniet 201.
U červieni 2024 hoda prezident Polščy Andžej Duda padpisaŭ papraŭki ŭ zakon dla padtrymki ŭkrainskich biežancaŭ. Novaŭviadzieńni taksama zakranajuć hramadzian Biełarusi. Ciapier jany mohuć paćviardžać u Polščy svaje atestaty ab pačatkovaj, siaredniaj, niapoŭnaj siaredniaj i prafiesijnaj adukacyi.
Raniej takuju mahčymaść mieli tolki asoby sa statusam biežanca, dadatkovaj abaronaj, biežancy ad uzbrojenych kanfliktaŭ, stychijnych biedstvaŭ i inšych humanitarnych kryzisaŭ, a taksama ich blizkija. Heta značyć apastylavać dakumienty ŭ Biełarusi, kali takoj mahčymaści niama, bolš nie treba, paćvierdzić sapraŭdnaść dypłomaŭ možna budzie adrazu ŭ Polščy.
Što dumajuć biełarusy?
U kamientarach pad videa ŭ TikTok, jakoje za paru dzion pahladzieli amal 60 tysiač čałaviek, biełarusy padzialilisia, ź jakimi ciažkaściami im daviałosia sutyknucca, kab pastavić apastyl.
«Ja dzień tamu rabiła sama za 210 rub. Ciapier pa zapisie, kali asabistaja padača, z 8:00 da 10:30 — prychodźcie i rabicie. Zabirajecie z 15:00 da 16:00», — Taćciana.
«Mnie tak ledź nie dapamahli apastyl na balničny pastavić za 900 rub. Dziakuj bohu, što na balničny jon nie patrebny», — user54473655343188.
«Ja naŭprost u MZS rabiła ŭ minułym hodzie. Biez usialakich prablem», — Filsina_t.
«Rabili apastyl na dva dakumienty, 800 rub. + davieranaść. Rabili praz Hrodna, ekanomija času», — jd94458.
«Na siońniašni dzień prosta prychodziš i padaješ dzień u dzień i ŭ hety ž dzień zabiraješ! I niama nieabchodnaści ŭ arhanizacyi Ch. A toje, što vy niejkim čynam dapamahli siabie abduryć, to heta…» — Alaksiej.
«Dziaŭčynka, idzieš u HKU MZS i biareš zapis 1,5 miesiaca ŭ siarednim. Prynosiš dakumient, płaciš mytu 5 bazavych, atrymlivaješ apastyl», — rog.ey.
«Biez apastyla ŭ Polšču možna pastupić, užo choć niešta», — communist_online.
«U lutym zapisałasia napramuju ŭ MZS i praz 3 dni pryjechała i zrabiła apastyl», — smrkvsk.
Kamientary