«Jeŭropa hatovaja adkazać». Ursuła fon der Lajen prakamientavała abvieščanuju Trampam handlovuju vajnu
Prezident Jeŭrakamisii Ursuła fon der Lajen vystupiła z zajavaj pra uviadzieńnie Trampam novych pošlin, u tym liku ŭ 20% — na impart ź ES. Pavodle jaje słoŭ, Jeŭropie jość čym adkazać, ale jana prapanuje Trampu pieramovy.
ES prapanuje Trampu pieramovy ab admienie handlovych barjeraŭ, ale ŭviadzie miery ŭ adkaz, kali dyjałoh nie daść vyniku, zajaviła fon der Lajen.
«Univiersalnyja taryfy, abvieščanyja ZŠA, — heta surjozny ŭdar pa biznesie i spažyŭcam va ŭsim śviecie. Jeŭropa hatovaja pryniać miery ŭ adkaz. My zaŭsiody budziem abaraniać našy intaresy i kaštoŭnaści. Ale my taksama hatovyja da ŭzajemadziejańnia. I pierajści ad kanfrantacyi da pieramoŭ», — skazała fon der Lajen.
Jana padkreśliła, što rašeńnie amierykanskaj administracyi pastavić najbolš ekanamična ŭraźlivyja krainy i ich nasielnictva ŭ vielmi ciažkaje stanovišča.
Fon der Lajen adznačyła, što spažyŭcy va ŭsim śviecie adrazu adčujuć upłyŭ handlovaj vajny, pakolki ceny navat na bazavyja tavary i pasłuhi adčuvalna ŭzrastuć.
Pavodle jaje słoŭ, Jeŭrakamisija ŭžo zakančvaje raspracoŭku pieršaha pakieta kontrzachadaŭ u adkaz na pošliny na stal i rychtujecca da dadatkovych u vypadku, kali nie atrymajecca vyrašyć situacyju dypłamatyčnym šlacham.
«Nastupstvy buduć žudasnymi dla miljonaŭ ludziej pa ŭsim śviecie», — skazała kiraŭnica Jeŭrakamisii.
Jana dadała, što ES «hatovy adkazvać» i rychtuje admysłovyja kroki. «Ja viedaju, što mnohija z vas adčuvajuć siabie padmanutymi našym najdaŭniejšym sajuźnikam», — skazała jana.
2 krasavika Tramp abviaściŭ «Dniom vyzvaleńnia» Amieryki i paviedamiŭ, što ŭvodzić niečuvanyja z pačatku minułaha stahodździa tatalnyja taryfy na impart tavaraŭ u ZŠA.
Kamientary