Chakieisty minskaha «Dynama» paśla treniroŭki z Łukašenkam dvojčy zapar biazvolna sastupili. Siońnia z 3:0 da 3:4
5 krasavika stała viadoma, što ŭ šostym matčy pieršaha raŭnda płej-of Kantynientalnaj chakiejnaj lihi hulcy minskaha «Dynama» na vyjeździe abyhrali chakieistaŭ maskoŭskaha CSKA ź likam 6:2 i takim čynam upieršyniu ŭ svajoj historyi prajšli ŭ druhi raŭnd baraćby za Kubak Haharyna. U novyja supierniki dastaŭsia čalabinski «Traktar», ale ź im spravy pakul iduć nie vielmi.
Paśla histaryčnaj pieramohi na chakiei prahnazavana vyrašyŭ papijarycca Alaksandr Łukašenka, pierad startam druhoha raŭndu naviedaŭšy treniroŭku chakieistaŭ i sam staŭšy padčas jaje na kańki. Taksama jon pieradaŭ chakieistam padarunki z pačastunkami, jakija nibyta dajuć im enierhiju i siły: miod, sała i chleb, vyrableny na konkurs.
Adnak ža pakul hetyja «krynicy enierhii» kali i dapamahajuć, to nie vielmi. Prynamsi, na ŭvieś matč ich dakładna nie chapaje.
Pieršyja dva matčy sieryi prajšli ŭ Čalabinsku na ladovaj arenie «Traktar» imia Valeryja Biełavusava.
U pieršym matčy 12 krasavika «Dynama» na apošniaj chvilinie vypuściła z ruk, zdavałasia b, užo harantavanuju pieramohu. Tady minčuki prapuścili try šajby mienš čym za paŭchviliny, viedučy ŭ liku 1:2. «Traktar» u vyniku pieramoh ź likam 4:2.
Situacyja paŭtaryłasia i ŭ siońniašnim matčy. U im biełarusy viali ŭ liku 3:0, ale ŭrešcie zhubili pieravahu i ŭ vyniku prajhrali ź likam 3:4 u aviertajmie.
Ciapier «Traktar» viadzie ŭ sieryi ź likam 2:0. Sieryja idzie da čatyroch pieramoh adnoj z kamandaŭ.
Nastupnyja dva matčy adbuducca ŭ Minsku 16 i 18 krasavika. Heta padzieja vyklikała ŭ biełaruskaj stalicy kvitkovy ažyjataž.
Kamientary