«Dziŭna, što nie ŭnieśli ŭ bazu». Ajcišniki za miažoj raskazali, jak ich šukajuć u Biełarusi vajenkamaty

«Mnie ŭ Biełarusi nie tolki administracyjnaja adkaznaść pahražaje — biez roźnicy»

Frantend-raspracoŭščyk Ivan (imiony źmienienyja) vyjechaŭ ź Biełarusi ŭ 2020 hodzie. Z tych časoŭ na adras, dzie jon dahetul prapisany ŭ Biełarusi, dvojčy prychodzili paviedamleńni — u 2021 hodzie i ŭ studzieni 2025-ha.

Ivan dasłaŭ fota: u papiercy rekamiendujecca źjavicca ŭ vajskovy kamisaryjat Homiela «dla ŭručeńnia mabilizacyjnaha pradpisańnia». U paviedamleńni jość numar, pa jakim možna patelefanavać «u vypadku niemahčymaści źjavicca». I spasyłka na artykuł 26.3 AK RB — maŭlaŭ, inakš Ivanu pahražaje administracyjnaja adkaznaść.

Ale surazmoŭca nie źbirajecca ničoha tłumačyć vajenkamam. Jahonaha numara ŭ ich niama — i dobra.

«Mnie ŭ Biełarusi nie tolki administracyjnaja adkaznaść pahražaje, tak što biez roźnicy, — kaža jon. — Dy i zakon ab tym, što pozva ličycca ŭručanaj paśla majho podpisu, pa-mojmu, jašče nie admianili».

Ivan miarkuje, što z pravavoha boku jamu «mohuć pradjavić tolki toje, što nie paviedamiŭ vajenkamatu pra vyjezd na pastajannaje miesca žycharstva za miažu».

«Dziŭna, što jany paśla pieršaj praihnaravanaj mnoj pozvy čatyry hady tamu nie ŭnieśli mianie ŭ jakuju-niebudź bazu jak uchilista (ci što tam jašče ŭ ich). Ci heta značyć, što jany paličyli, što pozva zastałasia niaŭručanaj — raz ja za jaje nie raśpisvaŭsia».

Z pryzyŭnoha ŭzrostu Ivan vyjšaŭ. U vojsku ŭ svoj čas jon adsłužyŭ.

«Pravieryŭ na sajcie MUS, ci jość mahčymaść vyjazdžać z krainy — i daviedaŭsia, što jaje zakryli»

DevOps-inžyniera Vitala taksama šukaje vajenkamat. Ale jon vyjechaŭ u 2022 hodzie, jak tolki pačałasia vajna, a kamisaraŭ «nie papiaredziŭ».

Paśla adjezdu ŭ Polšču surazmoŭcu adličyli ź biełaruskaj VNU. I, jak jon miarkuje, adrazu paśla hetaha jamu patelefanavali z vajenkamata.

«Byŭ adzin zvanok. Ale, vyjechaŭšy z krainy, ja adklučyŭ zvanki i pakinuŭ tolki SMS. Paźniej ja zaŭvažyŭ, što chtości telefanavaŭ, ale nie staŭ pieratelefanoŭvać, a prosta prabiŭ numar — akazałasia, heta byŭ vajenkam».

Znajści Vitala praz Viber i inšyja miesiendžary i sacsietki ŭ vajenkamacie nie sprabavali, kaža jon.

Praz paŭhoda małady čałaviek pravieryŭ na sajcie MUS, ci jość u jaho mahčymaść vyjazdžać z krainy — i daviedaŭsia, što jaje zakryli. Jašče da jaho baćkoŭ dadomu prychodziŭ učastkovy.

Viartacca ŭ Biełaruś surazmoŭca nie płanuje, kaža, «heta ŭžo daŭno nie dom». Jon adznačaje, što, pa čutkach, na jaho nibyta ŭžo hatovaja sprava —

«lažyć u skryni, čakaje, pakul ja pierasiaku miažu. Moj znajomy viarnuŭsia — i jaho pasadzili. Jon chutka vyjšaŭ (termin byŭ niejki nievialiki), ale bolš na suviaź nie vychodziŭ».

Vital kaža, što za try hady ŭ emihracyi pryvyk da ŭsiaho.

«Hałoŭnaja prablema — tolki z atrymańniem niekatorych dakumientaŭ ź Biełarusi: zakryć IP, atrymać daviedku pra adsutnaść sudzimaści».

«Pakul zaklučeńnia [pra zachvorvańnie] na rukach niama, razmaŭlać z vajenkamam nie chaču»

DevOps Ihar raskazvaje, što na praciahu troch hadoŭ da 2017 hoda słužyŭ u reziervie, jeździŭ na zbory. Tak atrymałasia dziakujučy chadajnictvu ŭ vajenkamat, składzienym kampanijaj, u jakoj pracavaŭ Ihar: «Napisali, što ja kaštoŭny supracoŭnik, jakoha nielha adpuścić nadoŭha».

U pieršy hod Ihara pryzyvali dvojčy — pa paŭtara miesiaca. Zatym dva hady zapar pa razu — na taki ž termin. Kab prajści zbory, jon braŭ na pracy adpačynak za svoj košt: «Nibyta pa zakonie heta pavinien byŭ pakryvać pracadaŭca, ale nie na majoj pracy ŭ toj čas».

Svaje vajskovyja budni Ihar apisvaje tak: słužyŭ u čaści ŭ Minsku, ale na palihon jeździli ŭ Asipovičy.

«U nas prachodziła navučańnie na vajskovuju prafiesiju, — i tamu kožnyja zbory prynosili novaje zvańnie. Praz paŭtara miesiaca vychodziš staršym siaržantam — i takich uvieś uzvod. I jašče ŭ čym adroźnieńnie ad terminovaj słužby: kali my z terminovikami razmaŭlali, jany skardzilisia, što bolšuju častku času ich vykarystoŭvajuć jak pracoŭnuju siłu pa naviadzieńni paradku ŭ čaści — farbavać, nasić, ramantavać. Časam vielmi sumnieŭnyja aktyŭnaści nakštałt farbavańnia travy (tak, heta praŭda). Jany ličyli, što nam pašancavała: niekatoryja terminoviki za paŭtara hoda słužby na palihonie ni razu nie byli, a my traplali tolki na palihony».

Na niekalki hadoŭ Ihar pierajechaŭ u inšuju krainu. Kaža, što telefanavali z vajenkamata — «udakładnić źviestki». I jon navat adkazvaŭ na zvanki.

«Moža i chacieli b vyciahnuć na zbory, ale ja skazaŭ, što znachodžusia nie ŭ krainie — i nichto hetym nie staŭ zajmacca. Elemientarna pozvu ž nie ŭručyć».

Letaś Ihar viarnuŭsia ŭ Biełaruś. A z sakavika hetaha jamu znoŭ pačali telefanavać z vajenkamata.

«Pieršy raz padniaŭ trubku: «Dzie vy? Davajcie ŭdakładnim źviestki». Ja prapisany nie ŭ Miensku, ale pracuju i žyvu ŭ stalicy, tamu skazaŭ, što śpiecyjalna da ich nie pajedu — «davajcie pa telefonie ŭdakładnim». Jany byccam pahadzilisia. My damovilisia, što jany pieratelefanujuć u peŭny dzień, kali spatrebicca, kab ja pryjechaŭ.

U abhavorany dzień zvankoŭ nie pastupała. A voś dalej chtości staŭ telefanavać. Ja nie padniaŭ słuchaŭku, bo chutka kładusia ŭ balnicu na abśledavańnie i lačeńnie. U mianie jość zachvorvańnie, ź jakim, pa słovach doktara, kamisujuć. Ale pakul zaklučeńnia na rukach niama, razmaŭlać z vajenkamam nie chaču. Jość adčuvańnie, što padymu trubku — i ŭsio, nichto navat raźbiracca nie budzie, nakolki ja chvory. Zahrabuć na zbory — a ŭsie razbory ŭžo potym. Dy i naohuł niezrazumieła, navošta ja im znoŭ. Heta ž čas, vykinuty z žyćcia: ty brudny, śmiardziučy, duš — raz na tydzień».

Štraf, aryšt, raboty abo abmiežavańnie voli — što pahražaje za ŭchileńnie ad zboraŭ i terminovaj słužby

Na sajcie Minabarony paznačana, što zakon patrabuje, kab pry pierajeździe ź Biełarusi ŭ inšuju krainu nazaŭsiody hramadzianie zdavali ŭ vajenkamat svoj vajskovy bilet. Pry vyjeździe z krainy na 6+ miesiacaŭ — «asabista prybyć u vajskovy kamisaryjat» i paviedamić pra heta, a pa viartańni na praciahu miesiaca źjavicca asabista i paviedamić.

U artykule 26.1 AK RB havorycca, što niajaŭka biez pavažnych pryčyn na mierapryjemstvy pa pryzyvie, u tym liku kali pryjšła SMS, ciahnie nakładańnie štrafu ŭ pamiery ad 10 da 30 bazavych vieličyń.

U artykule 26.3 AK RB adznačajecca, što parušeńnie abaviazkaŭ pa vajskovym uliku ciahnie nakładańnie štrafu ŭ pamiery da 25 bazavych vieličyń.

Jašče na sajcie Minabarony možna znajści spasyłki na artykuły 435 i 436 KK RB. Pieršy praduhledžvaje pakarańnie za ŭchileńnie ad pryzyvu na vajskovuju słužbu ŭ vyhladzie hramadskich rabot, štrafu abo aryštu, abo abmiežavańnia voli na termin da troch hadoŭ. Druhaja — za niajaŭku na zbory, u takim vypadku čałavieku pahražajuć hramadskija raboty, štraf abo papraŭčyja raboty na termin da hoda, abo aryšt.

• 2
• 0
• 1
• 0
• 0
• 0
• 3
• 0