«Ukraina nie achviara, jana bajec», — zajaviŭ Zialenski.
Siońnia Ukraina adznačaje Dzień Niezaležnaści.
Prezident Ukrainy Uładzimir Zialenski źviarnuŭsia da nacyi z hałoŭnaj płoščy krainy — Majdana Niezaležnaści.
Jon skazaŭ, što mienavita tut, na Majdanie, ukraincy časta raźvitvajucca z hierojami:
«I kožny, chto byŭ choć raz na takim raźvitańni, i kožny, chto straciŭ kahości ŭ hetaj vajnie, maje svoj asabisty rachunak da Rasii nazaŭsiody».
Jon padziakavaŭ usim ukraincam, za toje, što jany ŭžo razam prajšli: «I za tuju Ukrainu, jakuju my z vami stvarajem razam.
Za tuju Ukrainu, jakoj jana ŭžo jość ciapier. Jakaja stała darosłaj 24 lutaha. Uziała los u svaje ruki, uziała ŭ ruki zbroju. Nie mieła času vahacca i prava bajacca. I nasamreč spyniła druhuju armiju śvietu. I my budziem pra heta kazać. Budziem, bo heta razburaje mif pra niepieramožnuju rasijskuju armiju. My heta dakazali. My praciahvajem dakazvać ciapier».
Zialenski adkazaŭ na zakidy rasijan, jakija kažuć, što «niama takoj dziaržavy, niama takoj nacyi»:
«My štodnia dakazvajem advarotnaje. My dakazvajem, što ŭkraincy jość i ŭkraincy buduć na hetaj ziamli, na hetaj płoščy, dzie praz sto hadoŭ buduć stajać našy nastupnyja pakaleńni. I praz sto hadoŭ buduć tut adznačać Dzień Niezaležnaści Ukrainy. Tak budzie. Tak budzie, bo Ukraina siońnia inšaja. Ukraina macniejšaja i pavažaje siabie. I Ukraina nie čakaje žestaŭ dobraj voli, a maje ŭłasnuju volu, kab ažyćciaŭlać toje, što nieabchodna nam».
Zialenski zajaviŭ, što Ukraina nikoli bolš u historyi nie budzie prymušanaja da hańby, jakuju rasijanie nazyvajuć kampramisam.
«Nam patrebny spraviadlivy mir. Jakim budzie naša budučynia, vyrašać tolki nam. I śviet heta viedaje. I śviet heta pavažaje. Pavažaje Ukrainu. Usprymaje Ukrainu roŭnaj», — skazaŭ jon.
Pavodle Zialenskaha, siońnia i ZŠA, i Jeŭropa zhadžajucca: Ukraina jašče nie pieramahła, ale ŭžo dakładna nie prajhraje.
«Ukraina zdabyła svaju niezaležnaść. Ukraina nie achviara, jana bajec. Ukraina nie prosić, jana prapanuje. Sajuźnictva i partniorstva. Lepšuju armiju ŭ Jeŭropie. Pieradavyja abaronnyja technałohii. Vopyt ustojlivaści. My kažam: «Nam patrebny ES». Tak. Ale my patrebnyja jamu nie mienš. I heta pryznajuć usie. I takoj pryznajuć Ukrainu. Nie biednaj svajačkaj, a mocnym sajuźnikam», — skazaŭ jon.
Taksama siońnia prajšła supolnaja malitva ŭ Safijskim sabory za mir.
Na śviatkavańnie Dnia Niezaležnaści ŭ Kijeŭ prybyŭ śpiecyjalny pradstaŭnik amierykanskaha prezidenta Kit Kiełah. Va ŭračystaściach taksama pryniaŭ udzieł premjer-ministr Kanady Mark Karni, jaki taksama znachodzicca ź vizitam u Kijevie. Karni zajaviŭ, što Kanada vydzialaje Kijevu $1 młrd na pastaŭku dronaŭ, bojeprypasaŭ i bronietechniki. Zbroja budzie va Ukrainie ŭžo ŭ vieraśni.
Ciapier čytajuć
Stalinista-jabaćku z Homiela zatrymali paśla taho, jak jon zaprasiŭ Łukašenku na hvałtoŭnaje zakryćcio svajho treciaha kafe16
Kamientary