Nakolki kaštoŭnaje dla Łukašenki apošniaje źniaćcie sankcyj z boku ZŠA
Paśla čarhovaha vizitu śpiecyjalnaha pasłańnika prezidenta ZŠA pa Biełarusi Džona Koŭła Łukašenka vypuściŭ jašče 25 palitviaźniaŭ, a ZŠA źniali sankcyi z dvuch biełaruskich pradpryjemstvaŭ. Ekanamist Źmicier Kruk tłumačyć, što daje hetaja ździełka aficyjnamu Minsku.
U sankcyjnym śpisie jość bolš značnyja pradpryjemstvy
Złučanyja Štaty vykreślili z sankcyjnaha śpisu AAT «Łakafarba» i kancern «Biellespapierpram».
Ekśpiert BEROC Źmicier Kruk schilajecca da dumki, što padobny krok — heta chutčej pramiežkavy etap.
«Maŭlaŭ, davajcie paznačym dekłaracyju ab namierach štości rabić dalej, a hetym prosta zafiksujem niejki vynik, kab nie zdavałasia, što niama nijakaha prahresu».
Tamu padobnyja źmieny ekanamist aceńvaje davoli ścipła. Efiekt źniaćcia sankcyj z dvuch hetych pradpryjemstvaŭ pa važnaści jon aceńvaje tolki pracentaŭ u 30 ad taho, što značyć adzin tolki «Biełaruśkalij».
«U hetym SDN-liście (hałoŭnym sankcyjnym śpisie ZŠA. — NN) jość našmat bolš bujnyja i značnyja dla Biełarusi pradpryjemstvy», — adznačaje Kruk.
Jeŭrapiejskija sankcyi bolš balučyja za amierykanskija
Što tyčycca «Biellespapierprama», to, pa słovach Kruka, situacyja tam krychu inšaja, bo heta kancern i ŭdzielniki kancerna aŭtamatyčna nie źjaŭlajucca padsankcyjnymi.
«Tamu hetaje źniaćcie sankcyj adbyvajecca chutčej biez naŭprostavaha efiektu dla drevaapracoŭčaj haliny. Kaniešnie, heta taksama maje sens, ale nie nastolki istotny, jak źniaćcie sankcyj ź niejkaj asobnaj kampanii», — tłumačyć ekanamist.
Ahułam Kruk adznačaje, što vykreślivańnie kampanii z amierykanskaha sankcyjnaha śpisu nie aznačaje, što heta budzie mieć vialiki ŭpłyŭ na kampaniju, pakolki pieravažnaja bolšaść u śpisie nie mieli ščylnych biznes-suviaziaŭ sa Złučanymi Štatami.
Tamu ekśpiert padkreślivaje, što dla Biełarusi kudy bolš važnym źjaŭlajecca źniaćcie sankcyj mienavita z boku Jeŭrasajuza, a nie ZŠA, jakija znachodziacca na inšym kantyniencie.
«Jak Biełaruś amal nie maje toj pradukcyi, jakaja była b z takim łahistyčnym plačom cikavaj dla ZŠA, tak i technałahičny impart z ZŠA ŭ Biełaruś choć i mieŭ značeńnie, ale jaho maštaby byli nie takija bujnyja ŭ paraŭnańni ź impartam ź ES», — tłumačyć ekanamist.
Plusy ŭsio adno buduć
Pry hetym Kruk adznačaje, što peŭny pazityŭny efiekt źniaćcia sankcyj z boku ZŠA kampanii atrymlivajuć navat u tym vypadku, kali jany nie mieli nijakich znosin sa Štatami.
«Adbyvajecca źnižeńnie efiektu «taksičnaści», kali tyja, chto nie znachodzicca ŭ amierykanskaj jurysdykcyi, dziela pieraściarohi admaŭlajecca ad takoj supracy praz znachodžańnie kampanii ŭ SDN-liście».
Znachodžańnie ŭ sankcyjnym śpisie taksama značna ŭskładniaje raźliki ŭ dalarach, mohuć być dadatkovyja składanaści ŭ łahistycy i strachavańni.
«Tamu źniaćcie sankcyj Złučanymi Štatami — heta chutčej źniaćcie druhasnych prablem, što taksama važna dla pradpryjemstva. Na prykładzie «Biełaruśkalija» ź vialikaj imaviernaściu možna mierkavać, što dziakujučy źniaćciu sankcyj «Biełaruśkalij» zmoh pavysić canu adnosna rynkavaj na svaje ŭhnajeńni ŭ Kitai.
To-bok paśla źniaćcia sankcyj pieramoŭnaja moc «Biełaruśkalija» pavysiłasia, što dało mahčymaść nie pradavać pradukcyju z takoj źnižkaj, jak było raniej», — pryvodzić prykład Źmicier Kruk.
Što da viartańnia Biełarusi kala 43—44 miljonaŭ dalaraŭ, jakija zatrymalisia na rachunku ŭ amierykanskim Citibank, ekanamist adznačaje, što ŭ dziaržaŭnych maštabach heta vielmi nievialikija hrošy.
«Navat vielmi dziŭna, što na ŭzroŭni Łukašenki iduć razmovy pra takija sumy», — adznačyŭ Kruk.
Ciapier čytajuć
Deputat Kliševič staŭ kandydatam histaryčnych navuk z dysiertacyjaj pra razłažeńnie biełaruskaha kamsamoła ŭ časy «pierabudovy»5
Deputat Kliševič staŭ kandydatam histaryčnych navuk z dysiertacyjaj pra razłažeńnie biełaruskaha kamsamoła ŭ časy «pierabudovy»
Najbujniejšaj u śviecie fan-supolnaściu Łedzi Hahi kiruje chłopiec ź Minska, jaki adsiedzieŭ za pratesty. Rasijanie paśpiašalisia zapisać jaho ŭ svaje1616
Kamientary