U Varšavie sustreli 10 palitźniavolenych, jakija pryjechali ź Vilni FOTY i VIDEA
Ź Vilni ŭ Varšavu pryjechali 10 palitviaźniaŭ, jakija paśla vyzvaleńnia vyrašyli žyć u Polščy. Siarod ich — Ludmiła Čekina, Pavieł Biełavus, Jaŭhien Juškievič i inšyja, piša «Biełsat».
Mikraaŭtobusy z hrupaj prybyli da Centra biełaruskaj salidarnaści ŭ Varšavie kala 16:00. Sustrakać niadaŭna vyzvalenych ludziej sabralisia niekalki dziasiatkaŭ čałaviek z kvietkami, bieł-čyrvona-biełym ściaham. Siarod tych, chto pryjšoŭ da miesca prybyćcia, byli palityčny analityk Arciom Šrajbman, viadomy biełaruski etnohraf, zasnavalnika hurtu Kasary i prytułku dla represavanych biełarusaŭ u Varšavie «Dom tvorcaŭ» Siaržuk Doŭhušaŭ.
Pryjšła byłaja eks-palitźniavolenaja, hałoŭnaja redaktarka Tut.by Maryna Zołatava, jakaja asabliva čakała vyzvaleńnia z kałonii svajoj kalažanki, hiendyrektarki partału Ludmiły Čekinaj, razam ź jakoj była zatrymanaja ŭ 2021 hodzie.
Pavieł Biełavus raskazaŭ, što ŭ pieršyja dni ŭ Varšavie źbirajecca sustrecca sa siabrami, adpačyć i dačakacca siamju, a paśla «budavać novaje žyćcio».
«Ščyra kažučy, da apošniaha ja byŭ u Biełarusi i nie płanavaŭ zjazdžać. Nu i płanavaŭ, kali i pasadziać — nu, na hod, na dva, a tut dali 13, ź jakich ja adsiadzieŭ 5, i adpravili [z krainy]. Pakul, ja tak razumieju, šlachu nazad niama, — padzialiŭsia jon i z uśmieškaj dadaŭ, što pieršyja dni prachodziać u sustrečach i razmovach ź blizkimi. — Chvala padtrymki takaja, što ja zaraz vilenskuju pieražyŭ, zaraz treba varšaŭskuju. Usie kažuć, što varšaŭskaja značna macniejšaja. Zaraz treba, kab nie źniesła i nie zvarjacieŭ».
Jak pieradaje redaktarka «Biełsata», z aŭtobusa jaho sustrakali słovami «Žyvie Biełavus!»
Kulturnicki mieniedžar i zasnavalnik «Art Siadziby», kramy nacyjanalnaj simvoliki i suvieniraŭ Symbal.by, jaki šmat vysiłkaŭ prykłaŭ dla taho, kab adradžać biełaruščynu ŭ krainie, raskazaŭ, jak pry hetym adreahavaŭ na prysud ab zdradzie dzaržavie.
«Heta trahiedyja. U pieršuju čarhu, u mianie zdrada dziaržavie i «inyje diejstvija» — to bok za toje, što ja supracoŭničaŭ z zamiežnymi arhanizacyjami, ZŠA, Jeŭraźviazam. Što jość, to i jość. Ja ŭžo zabyŭsia pra ŭsio heta», — skazaŭ Biełavus.
«Ci nie źbiraješsia adychodzić ad prasoŭvańnia biełaruščyny?» — zapytaŭsia žurnalist «Jeŭraradyjo» Źmicier Łukašuk.
«Chutčej za ŭsio nie. Chto mnie daść adyści… — z žartam adkazaŭ Pavieł. — Tut usie maje dzieci i paplečniki. Kudy ja adydu? Heta ŭžo majo žyćcio».
Ź Vilni, kudy 25 čałaviek 16 vieraśnia pry dapamozie ZŠA vyvieźli ź Biełarusi paśla vyzvaleńnia, u Polšču vyrašyli pierajechać 10. Jany płanujuć padacca na mižnarodnuju abaronu i pačać lehalizacyju. Jašče 13 čałaviek zastanucca ŭ Litvie, dvoje pajeduć u inšyja krainy, tłumačyli ŭ Ofisie Cichanoŭskaj.
Na toje, kab častka byłych palitviaźniaŭ zmahła pryjechać u Polšču, Pavieł Łatuška prasiŭ zhody ŭ pradstaŭnikoŭ MZS hetaj krainy.
«Yes, soon!» Byłaja palitźniavolenaja raskazała pra słovy, ź jakimi lahčej vyžyvać u kałonii
Vyzvaleny Aleś Čumakoŭ raskazaŭ pra abvinavačvańnie: «Hraŭ biełaruskuju narodnuju muzyku i tym samym hurtavaŭ pratestavaje jadro»
U Litvie zastanucca tolki 13 z 25‑ci vyzvalenych učora palitviaźniaŭ
«Nazavu choć zajcami». Džon Koŭł patłumačyŭ, što treba zrabić, kab vyzvalić novych palitviaźniaŭ
«Ja zrazumieŭ za hetyja šeść hadoŭ, što vielmi ščaślivy čałaviek». Andrej Alaksandraŭ raskazaŭ pra vyzvaleńnie i pieršuju sustreču z žonkaj
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach1
Kamientary