Dziaŭčynka i dabierman z Maładziečna źbirajuć u tyktoku miljony prahladaŭ
Emilija i Rahnar razam hulajuć, hladziać televizar i abaraniajuć adno adnaho.
Žycharka Maładziečna Vieranika viadzie tyktok-kanał «Siamja na maksimałkach», dzie raskazvaje, jak rastuć razam jaje maleńkaja dačka Emilija i dabierman Rahnar. Kraj.by źviazaŭsia z maładoj maci.
Hałoŭnyja hieroi praktyčna ŭsich videa siamiejnaha kanała — Emi i Rahnar.
— Sprabavała tyktok u 2021 hodzie, kali jon tolki pačynaŭ raźvivacca ŭ nas, — uspaminaje Vieranika. — My tolki pažanilisia, pasprabavała 1-2 videa i ŭsio, nie zajšło. Čakała, što adrazu budzie i miljon padpisčykaŭ, i šmat prahladaŭ. Niejak nie skłałasia. Druhaja sproba była paśla naradžeńnia dački Emilii. Heta byli prostyja videa pra Rahnara, u farmacie: jon prabieh z cackaj abo jeść johurt. Chaciełasia miedyjnaści. Kali dačka trochi padrasła, zdymała ich razam.
24 maja Emilii spoŭnicca ŭžo 3 hady. Roźnica va ŭzroście pamiž joj i dabiermanam Rahnaram 1 hod 4 miesiaca. U Rahnara dzień naradžeńnia 24 studzienia.
Vieranika kaža, što razam z mužam Paŭłam jany adkazna padyšli da nabyćcia sabaki. Abmiarkoŭvali, šukali infarmacyju ab tym, jak vystrojvać uzajemaadnosiny pamiž sabakam i dziciem. Razumieli, što sabaka — heta nie cacka na hod ci dva.
— Dla nas było nieprymalna addać sabaku. Kali ja była ciažarnaja, Rahnar ad mianie nie adychodziŭ, lubiŭ kłaści hałavu mnie na žyvot. Ich znajomstva pačałosia paśla viartańnia z radzilni. Dla sabaki było niečakana, što ŭ domie źjaviŭsia jašče adzin člen siamji. Jon bajaŭsia, aściarožna pryniuchvaŭsia, lizaŭ ručku małoj. Rahnar vielmi tonka ŭsio adčuvaje. Viadoma, usio prachodziła pad našym kantrolem, — dadaje maładaja mama.
Rahnar staŭ pavodzić siabie jak niania. Kali Emilija spała ŭ vazku, jon starońnich da jaje nie padpuskaŭ. Sam padychodziŭ, kłaŭ pobač hałavu, byŭ vielmi akuratny.
Adno ź pieršych videa — jak Rahnar paŭzkom, ležačy na śpinie, nabližajecca da małoj.
— My bolš bajalisia, što jon moža nieŭśviadomlena šturchnuć, bo vaha vialikaja, ciapier krychu bolš za 40 kiłahramaŭ. «Rajskaje» žyćcio pačałosia ŭ Rahnara, kali Emilija stała padrastać. Jana adkryvała jamu pašču, pieraličvała zuby, ciahała za chvost, słovam, dastavałasia jamu. Jon ciarpieŭ, kali mocna nie padabałasia, to prosta ŭstavaŭ i sychodziŭ. Emilii zaŭsiody tłumačyli, jak rabić nielha, — akcentuje Vieranika.
Dla dziaŭčynki składanaje imia Rahnar zamianili na Siabar. Ciapier užo Emilija nie daje ŭ kryŭdu dabiermana i moža pačastavać jaho prysmakami.
— Jany nie raźli vada. Dzie jon, tam i jana. Kali maleńkaja kapryziła, Rahnar pobač stajaŭ i chvalavaŭsia, pa-svojmu supakojvaŭ, lizaŭ joj ščočki. Nazirać za imi było cikava, — nie strymlivaje emocyi surazmoŭca. — Jość miłaje videa, jak Emilija za stałom sabrała chlebnyja kroški, a samy vialiki kavałak addała Siabru.
Rahnar — paŭnapraŭny člen siamji. U ich z Emi navat cacki jość adnolkavyja.
Videa stasunkaŭ maleńkaj dziaŭčynki i vializnaha dabiermana chutka stali papularnymi. Na hety akaŭnt na tyktok zaraz padpisana amal 53 tysiačy čałaviek. Prahlady dasiahajuć 22 miljonaŭ, pad kožnym z zalaciełych videa — mnostva kamientaroŭ.
Jość u kanała i chiejtery.
— Niehatyŭ u asnoŭnym pišuć maci, jakija nie raźbirajucca ŭ temie, ale chočuć pakazać siabie. Spačatku ja ŭstupała ŭ pierapisku i tłumačyła im, što ŭsio adbyvajecca pad kantrolem baćkoŭ, ale jany nie čujuć dovadaŭ, — tłumačyć Vieranika. — Z časam ja stała razumieć, jakija videa dakładna vykličuć buru emocyj i vykładvała ich, bo burnaje abmierkavańnie ŭ kamientarach u tym liku dapamahaje prasoŭvańniu kantentu. U paŭsiadzionnym žyćci taksama byŭ niehatyŭ. Mnohija nie razumiejuć, jak možna hadavać razam dzicia i sabaku. Emilija i Rahnar — prykład kłopatu i siabroŭskaha staŭleńnia. Jany navat miracca jak brat ź siastroj, dzielacca cackami, sastupajuć miesca na kanapie, i samaje hałoŭnaje — nie dajuć pakryŭdzić adno adnaho. Jany i harezujuć razam.
Maładaja mama kaža, što jaje małaja raście vielmi dobraj i kłapatlivaj u adnosinach da žyvioł. Jana škaduje ŭsich kocikaŭ i sabačak, hatovaja abdymać ich, kłapacicca. I samaje hałoŭnaje, u jaje niama strachu.
Ciapier čytajuć
Na kupianskim kirunku zahinuŭ biełaruski dobraachvotnik Alaksiej «Ryžy» Aŭdziej13
Na kupianskim kirunku zahinuŭ biełaruski dobraachvotnik Alaksiej «Ryžy» Aŭdziej
Jak vypadkovaje znajomstva ŭ hiej-kłubie skončyłasia hučnym zabojstvam. Novyja detali pa spravie biełarusa, jaki 25 hadoŭ tamu zarezaŭ pradziusara ŭ Maskvie66
Kamientary