Dva dni dyjety na aŭsiancy. I što, jaki vynik?

Toje, što avios karysny dla abmienu rečyvaŭ, — nie navina. Jašče napačatku XX stahodździa z dapamohaj hetaj krupy paśpiachova lačyli dyjabietykaŭ. Siońnia dla terapii dyjabietu isnujuć efiektyŭnyja miedykamienty, tamu za apošnija dziesiacihodździ hety mietad amal całkam vypaŭ z pola zroku daktaroŭ.

Tym nie mienš niadaŭniaje daśledavańnie navukoŭcaŭ z Bonskaha ŭniviersiteta pakazała, što patencyjał aŭsianki rana śpisvać z rachunkaŭ. U karotkaterminovym ekśpierymiencie pryniali ŭdzieł mužčyny i žančyny va ŭzroście ad 45 da 70 hadoŭ. Jany jašče nie mieli dyjabietu, ale znachodzilisia ŭ hrupie ryzyki praź mietabaličny sindrom — stan, jaki supravadžajecca zališniaj vahoj, pavyšanym arteryjalnym ciskam, insulinarezistentnaściu i anamalnym uzroŭniem tłuščaŭ u kryvi. 

Z vynikami daśledavańnia znajomić vydańnie Bild.

Vyjaviłasia, aŭsianyja šmatki zdolnyja na bolšaje, čym prosta zadavolić hoład. Novaje daśledavańnie pakazała: usiaho dva dni na strohaj aŭsianaj dyjecie mohuć istotna źnizić uzrovień chalesterynu. Pryčym stanoŭčy efiekt zachoŭvajecca na praciahu nastupnych šaści tydniaŭ.

300 hramaŭ aŭsianki ŭ dzień

Hrupa z 34 čałaviek była padzielena na dźvie roŭnyja častki. Pieršaja dva dni zapar trojčy na dzień źjadała pa 100 hramaŭ aŭsianych šmatkoŭ u vyhladzie kašy. Dazvalałasia dadavać tolki nievialikuju kolkaść sadaviny ci harodniny. Dyjeta była nizkakałaryjnaj. Kantrolnaja hrupa atrymlivała anałahičnaje pa pažyŭnych rečyvach charčavańnie, ale biez aŭsianych šmatkoŭ.

Vyniki akazalisia ŭražvalnymi. Užo praz 48 hadzin ahulny chalesteryn źniziŭsia ŭ siarednim na 15,61 mh/dł. Uzrovień «drennaha» chalesterynu (ŁPNP) źniziŭsia na 16,26 mh/dł, abo prykładna na 10%. Pa słovach aŭtaraŭ, heta istotny pakazčyk, choć jon i nie zusim supastaŭny z efiektam sučasnych lekaŭ.

Adnačasova ŭ kryvi značna vyrasła kancentracyja peŭnych mietabalitaŭ, u tym liku dyhidrafierułavaj kisłaty. Hetaje złučeńnie ŭtvarajecca kišačnymi bakteryjami padčas pierapracoŭki kampanientaŭ aŭsa i, vierahodna, źviazana sa źnižeńniem uzroŭniu chalesterynu. Akramia taho, viadoma, što avios bahaty na rastvaralnyja charčovyja vałokny (β-hlukany), jakija taksama spryjajuć źnižeńniu chalesterynu ŭ kryvi.

Niečakanaściu stała toje, što efiekt byŭ prykmietny navat praz šeść tydniaŭ, choć udzielniki ŭžo daŭno viarnulisia da zvyčajnaha charčavańnia.

Intensiŭny kurs bolš efiektyŭny

U druhim, niezaležnym daśledavańni (taksama z udziełam 34 čałaviek) pałova ŭdzielnikaŭ na praciahu šaści tydniaŭ zamianiała aŭsiankaj (80 h) tolki adzin pryjom ježy ŭ dzień. Astatni racyjon zastavaŭsia niaźmiennym i nie abmiažoŭvaŭsia pa kałoryjach. U hetym vypadku nie było zafiksavana nijakaha značnaha ŭpłyvu na ŭzrovień chalesterynu.

Roźnica vidavočnaja: u pieršym vypadku porcyja aŭsa była značna bolšaj, i na dva dni jon faktyčna całkam zamianiŭ zvykłuju ježu. U druhim ža ekśpierymiencie avios prosta dadali ŭ zvyčajny racyjon. Vyniki śviedčać: klučavym faktaram moža być mienavita intensiŭnaść takoha karotkaterminovaha charčovaha kursu.

Pa słovach aŭtaraŭ, u dalejšym jany pasprabujuć vyśvietlić, ci budzie intensiŭny kurs užyvańnia aŭsianki, jaki paŭtarajecca kožnyja šeść tydniaŭ, mieć stabilny prafiłaktyčny efiekt u doŭhaterminovaj pierśpiektyvie.

• 17
• 0
• 1
• 0
• 1
• 0
• 0
• 0