U Słucku šukajuć byłych pracaŭnikoŭ zavoda «Emalposud» dla adradžeńnia technałohii lićcia čyhunkoŭ
Kampanija «Nanaspłaŭ» ź Lachavičaŭ šukaje ŭ Słucku majstroŭ liciejnaj spravy, jakija kaliści pracavali na zavodzie «Emalposud» i viedali technałohiju vyrabu čyhunkoŭ biez braku, piša SlutskGorod.
Na pradpryjemstvie sutyknulisia z technałahičnymi składanaściami pry adliŭcy čyhunnaha posudu — uzrovień braku akazaŭsia zanadta vysokim.
Pry hetym u Lachavičach viedajuć: na słuckim pradpryjemstvie hetuju zadaču vyrašali paśpiachova.
«My vykarystoŭvajem technałohiju lićcia pa pienapolistyrołavych madelach, ale dla čyhunkoŭ jana nie zusim padychodzić, — tłumačyć pradstaŭnica «Nanaspłava» Śviatłana Makarava. — A na zavodzie ŭ Słucku ŭžyvali kachilnaje lićcio — zaliŭku raspłaŭlenaha mietału ŭ šmatrazovyja formy. Heta zusim inšy praces».
Kachil (ad francuzskaha «rakavina») — heta šmatrazovaja mietaličnaja forma dla lićcia, zvyčajna čyhunnaja abo stalnaja. Mienavita takija formy vykarystoŭvalisia na «Emalposudzie» dla vytvorčaści čyhunnaha posudu.
Paśla zakryćcia słuckaha zavoda ŭ 2016 hodzie bolšuju častku abstalavańnia pieradali babrujskamu pradpryjemstvu «Lehmaš». Paźniej terytoryja zavoda była pradadziena na aŭkcyjonie. Tam praciahnuli vypuskać patelni, ale ad vytvorčaści čyhunkoŭ admovilisia z-za składanaści pracesu. Kachili dla hetych vyrabaŭ pierapłavili za niepatrebnaściu.
Adnak na «Lehmašy» padzialilisia cikavaj detallu: nibyta na słuckim zavodzie pracavała siamiejnaja para liciejščykaŭ, u jakich adzinych atrymlivałasia adlivać čyhunki praktyčna biez braku. «Heta jak lehienda, — kažuć u «Nanaspłavie». — Mahčyma, heta sapraŭdy była kankretnaja para, a mahčyma — prosta vopytnyja technołahi».
Lachavickaje pradpryjemstva hatova zaprasić byłych rabotnikaŭ «Emalposudu» ŭ jakaści kansultantaŭ — na płatnaj razavaj asnovie albo dla pastajannaj pracy.
Śpiecyjalisty patrebnyja pierš za ŭsio na etapie vyrabu kachilaŭ i adpracoŭki pracesu zaliŭki.
«My zaraz pracujem z pastaŭščykom nad stvareńniem formaŭ, ale bieź viedaŭ ludziej, jakija realna zajmalisia hetaj vytvorčaściu, składana paźbiehnuć pamyłak, — pryznajucca na pradpryjemstvie. — Hatovy abmierkavać umovy supracoŭnictva, arhanizavać sustreču ŭ Słucku, abmierkavać detali pracy sa śpiecyjalistami».
Adlehłaść ad Słucka da Lachavičaŭ — kala 100 kiłamietraŭ. Kampanija razhladaje kansultacyjnuju dapamohu śpiecyjalistaŭ na klučavych etapach vytvorčaści.
Ciapier čytajuć
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1111
Kamientary