«Noč pieratvaryłasia ŭ dzień». Irancy raskazali pra ŭdary pa naftaschoviščach

Adzin z žycharoŭ paviedamiŭ, što toje, što adbyvałasia, vyhladała tak, «byccam noč pieratvaryłasia ŭ dzień».

Pavodle źviestak miascovych infarmacyjnych ahienctvaŭ sa spasyłkaj na krynicu ŭ Ministerstvie nafty Irana, paliŭnyja schoviščy paciarpieli ŭ Tehieranie i Karadžy na zachad ad stalicy.

Na videazapisie vidać, jak haryć vulica ŭ Tehieranie pobač z adnym sa schoviščaŭ, a mužčyna za kadram kaža, što harać kramy i žyłyja damy.

«U Karadžy ŭdzień było spakojna, ale ciapier znoŭ pačałosia varjactva — jany ŭsio ŭzarvali», — skazaŭ adzin ź miascovych žycharoŭ u razmovie ź Bi-bi-si.

«Spačatku źjaviłasia čyrvonaje śviatło, jakoje aśviaciła ŭsio vakoł, zatym u dźviery ŭdaryła vybuchovaja chvala», — uzhadvaje inšy mužčyna z Karadža va ŭzroście kala 30 hadoŭ.

«Potym nieba znoŭ azaryłasia, i źjaviłasia vielizarnaje čyrvonaje vobłaka. My nie razumieli, što adbyvajecca», — skazaŭ jon, dadaŭšy, što padniaŭsia na dach i ŭbačyŭ, što miascovaje naftaschovišča achoplenaje ahniom.

Bi-bi-si nie raskryvaje asoby irancaŭ, ź jakimi razmaŭlaje, u metach ich biaśpieki.

Iranskija ŭłady zajavili, što sočać za jakaściu pavietra ŭ stalicy, i zaklikali žycharoŭ zastavacca doma.

Pradstaŭnik Ministerstva zamiežnych spraŭ Irana Esmaił Bahai zajaviŭ, što avijaŭdary pryvodziać da «vykidaŭ u pavietra niebiaśpiečnych materyjałaŭ i taksičnych rečyvaŭ», jakija «staviać pad pahrozu žyćcio ludziej u vielizarnych maštabach».

Žycharka Tehierana skazała, što horad achutany dymam:

«Adčuvajecca pach haru. Ja nie baču sonca. Staić žachlivy dym. Dahetul nie raśsiejaŭsia, ja vielmi stamiłasia».

Inšy mužčyna z Karadža paviedamiŭ, što ŭdar pa schoviščy vyklikaŭ «vielizarny vybuch, pažar praciahvaŭsia niekalki hadzin».

Udary ZŠA i Izraila pa Iranie, jakija pačalisia z zabojstva viarchoŭnaha lidara krainy ajatały Ali Chamieniei, praciahvajucca ŭžo druhi tydzień. U adkaz Iran nanosić udary pa sajuźnikach ZŠA i ich abjektach u rehijonie.

Pavodle słoŭ pastajannaha pradstaŭnika Irana pry AAN Amira Saida Iravani, u vyniku ŭdaraŭ ZŠA i Izraila zahinuli jak minimum 1 332 iranskija mirnyja žychary, tysiačy atrymali ranieńni.

Adnak niekatoryja irancy ŭ razmovie ź Bi-bi-si skazali, što pa-raniejšamu padtrymlivajuć hetyja ŭdary.

«My, narod, schavalisia ŭ svaich damach i ź nieciarpieńniem čakajem razbureńnia ŭrada, kab znoŭ vyjści na vulicy, jak heta było raniej», — skazaŭ tehieraniec, jakomu kala 20 hadoŭ.

Pavodle jaho słoŭ, dziaržaŭnaje telebačańnie papiaredžvaje, što luby, chto havoryć abo dziejničaje ŭ padtrymku ZŠA, Izraila abo Rezy Piechlevi — syna apošniaha šacha Irana, jaki znachodzicca ŭ vyhnańni, — «budzie zabity».

Inšaja žycharka Tehierana skazała, što vajna žachaje, ale dadała, što heta cana, jakuju varta zapłacić za pazbaŭleńnie ad ciapierašniaha režymu.

«Mahčyma, ludziam, jakija nie tut, heta ciažka zrazumieć, ale ŭ zvyčajnych ludziej sapraŭdy nie zastałosia inšaha vybaru. Inakš, paviercie, my b nie chacieli płacić takuju vielizarnuju canu za vajnu. Irancy — nie vajaŭničyja ludzi i nie durni, prosta jany tak šmat pakutavali, što dasiahnuli miažy, i ŭsio, čaho jany chočuć, — heta narmalnaha žyćcia», — kaža jana.

Adnak jašče adna žančyna z Tehierana aścierahajecca taho, što moža čakać krainu, kali vajna skončycca, a ciapierašni režym zastaniecca pry ŭładzie.

«Navat kali vajna skončycca i my vyžyviem… Ja ŭpeŭnienaja, što cana budzie vielmi vysokaj i jašče doŭha ŭsio budzie horš, čym raniej. Asabliva kali jany zastanucca pry ŭładzie, — skazała jana. — Ja navat nie mahu skazać, chto voźmie ŭładu».

• 2
• 0
• 0
• 1
• 1
• 2
• 0
• 0