Ekanamičny rost Polščy asłabiŭ płany krainy na ŭviadzieńnie jeŭra zamiest złotaha
U toj čas jak Bałharyja pierajšła na jeŭra, polskija ŭłady ŭsio mienš bačać sens u chutkim dałučeńni da jeŭrazony. Na dumku ŭrada, ekanamičnyja vyniki krainy apošnich hadoŭ pakazvajuć, što zachavańnie nacyjanalnaj valuty pakul bolš vyhadnaje, čym pierachod na jeŭra.
U intervju Financial Times ministr finansaŭ Polščy Andžej Damański zajaviŭ, što arhumienty na karyść pierachodu na jeŭra značna asłabli, pakolki ekanomika krainy ciapier demanstruje lepšyja vyniki, čym bolšaść dziaržaŭ jeŭrazony. Va ŭrada, pavodle Damańskaha, źjaŭlajecca ŭsio bolš ekanamičnych źviestak i analityčnych padstaŭ, kab pakul zachavać nacyjanalnuju valutu.
Tema pierachodu na jeŭra maje ŭ Polščy doŭhuju i składanuju historyju. Jašče ŭ 2008 hodzie Donald Tusk abiacaŭ uvieści adzinuju valutu da 2012 hoda, adnak jeŭrapiejski daŭhavy kryzis prymusiŭ adkłaści hetyja płany. Paźniej nacyjanalna-kansiervatyŭnaja partyja «Prava i spraviadlivaść» pieratvaryła złoty ŭ simvał abarony dziaržaŭnaha suvierenitetu.
Siońnia ŭrad Tuska, jaki viarnuŭsia da ŭłady ŭ kastryčniku 2023 hoda, taksama nie śpiašajecca z valutnaj reformaj: pazicyi złotaha ŭmacavalisia, a bolšaść palakaŭ, pavodle apytańniaŭ, pa-raniejšamu vystupaje suprać jeŭra.
Pry hetym, jak padkreślivaje Damański, hałoŭnaja pryčyna adsutnaści ruchu ŭ bok jeŭra — nie palityčnaja, a ekanamičnaja. Jon pryznajecca, što jašče niekalki hadoŭ tamu bajaŭsia, što Polšča apyniecca «na druhim uzroŭni» ES pa-za jeŭrazonaj, ale ciapier ličyć, što kraina ŭžo ŭvajšła ŭ vyšejšuju ekanamičnuju lihu.
Farmalna krainy ES, jakija jašče nie pryniali jeŭra, abaviazanyja zrabić heta paśla vykanańnia kryteryjaŭ kanvierhiencyi — u pieršuju čarhu biudžetnaj dyscypliny i finansavaj stabilnaści. Adnak Damański nahadvaje: padača zajaŭki i kankretnyja terminy zastajucca palityčnym rašeńniem, i Varšava nie bačyć patreby śpiašacca.
Dla paraŭnańnia, Bałharyja, jakaja dałučyłasia da ES u 2007 hodzie, u hetym hodzie stała 21‑j krainaj jeŭrazony. Polšča ž robić staŭku na inšaje — pavieličeńnie svajoj vahi ŭ hłabalnaj ekanomicy. Urad zajaŭlaje pra namier damahčysia pastajannaha miesca ŭ G20. U hetym hodzie Polšča ŭžo zaprošanaja na samit «dvaccatki» ŭ Majami ŭ jakaści naziralnika ź inicyjatyvy administracyi prezidenta ZŠA Donalda Trampa.
Pavodle acenak MVF, letaś Polšča stała ekanomikaj abjomam kala 1 tryljona dalaraŭ i zaniała 20‑ie miesca ŭ śviecie. Arhanizacyja ekanamičnaha supracoŭnictva i raźvićcia prahnazuje rost VUP Polščy na 3,4% u 2026 hodzie, što źjaŭlajecca samym chutkim tempam siarod krain ES.
Pry hetym prablemy ź biudžetam zastajucca. Jeŭrapiejskaja kamisija čakaje, što deficyt polskaha biudžetu skarocicca z 6,8% VUP u 2025 hodzie da 6,3% u 2026-m. Adnak heta ŭsio jašče bolš čym udvaja pieravyšaje paroh na 3%, nieabchodny dla dałučeńnia da jeŭrazony, vyznačany Maastrychckim pahadnieńniem.
Damański śćviardžaje, što situacyja ź dziaržaŭnymi finansami pastupova palapšajecca, u tym liku dziakujučy mocnamu rynku pracy i rostu zarobkaŭ, što prynosić bolš padatkovych pastupleńniaŭ.
Niahledziačy na ekanamičnyja pośpiechi, urad Donalda Tuska vymušany dziejničać u atmaśfiery žorstkaha ŭnutranaha supraćstajańnia z prezidentam Karalem Naŭrockim, jaki pradstaŭlaje apazicyjnuju partyju «Prava i spraviadlivaść». Prezident nakładaje vieta na zakonaprajekty ŭrada i asprečvaje biudžet 2026 hoda ŭ Kanstytucyjnym sudzie. Damański papiaredžvaje, što takija dziejańni mohuć nanieści škodu kredytnamu rejtynhu krainy, pakolki mižnarodnyja ahienctvy ŭvažliva sočać za instytucyjnaj stabilnaściu ŭ Polščy.
Kamientary