Žyhar z «Biełpoła» raskrytykavaŭ tych, chto pryvioŭ Mielnikavu ŭ top apazicyi. Łatuška adkazaŭ

Uładzimir Žyhar kaža, što ŭ situacyi ź Mielnikavaj «usio prosta», tam było šmat čyrvonych ściažkoŭ.

«Toj, chto jaje pryvioŭ, pavinien byŭ całkam jaje pravieryć. Usie voś hetyja niuansy, što ciapier uspłyvajuć — što muž jeździŭ u Biełaruś, dzieci [jeździli ŭ Biełaruś] niešta jašče — usio heta treba było pravieryć tady. Tamu što ŭsio heta nie toje kab vyklikaje paranoju, jakaja časta byvaje ŭ biełarusaŭ (što tut ahient, tam ahient, chtości niešta spytaŭ — usio, ahientura). Heta situacyja, kali ŭ čałavieka voś takoje ŭ siamji.

Heta značyć, što ŭ hetaha čałavieka ŭžo jość miesca, na jakuju sistema moža ŭ niejki momant nacisnuć. Značyć, hety čałaviek nie moža, nie pavinien padymacca vyšej peŭnaha ŭzroŭniu ŭ ijerarchii», — kaža Žyhar. 

Pavodle jaho słoŭ, «Biełpoł» raspracoŭvaŭ dla Kaardynacyjnaj rady mietadyčku z rekamiendacyjami pa technicy biaśpieki, dzie byli zhadanyja padobnyja da kiejsa Mielnikavaj vypadki. Ale, jak vynikaje, hetyja rekamiendacyi nie byli vykananyja. 

Na zakid Žyhara adhuknułasia Nacyjanalnaje antykryzisnaje ŭpraŭleńnie, jakoj kiruje Pavieł Łatuška. Spačatku pres-słužba NAU pieradała svoj adkaz vydańniu «Lusterka». A kali tyja nadrukavali adkaz z uryŭkami, apublikavała jaho całkam na svaich resursach, padkreśliŭšy, što ličyć važnym apublikavać poŭny tekst.

«My vysoka cenim efiektyŭnaść i metanakiravanaść pracy takoj važnaj inicyjatyvy dla demakratyčnaha ruchu Biełarusi, jak BELPOL.

Nieadnarazova na ŭsich našych dvuchbakovych sustrečach z partniorami i ŭ publičnych kamunikacyjach, u tym liku ŭ zamiežnych ŚMI, my padkreślivali, što hetaja inicyjatyva ŭnosić značny ŭkład u našu ahulnuju metu — źmienu situacyi ŭ Biełarusi.

Razam z tym, my rasčaravanyja vykazvańniami adnaho z pradstaŭnikoŭ BELPOL, jaki zajaviŭ, što tyja, chto pryvioŭ Anžaliku Mielnikavu, pavinny byli jaje pravieryć.

Adkazvajučy na hety tezis, chočam adznačyć, što Anžalika Mielnikava prajšła pravierku inicyjatyvy «Kibierpartyzany», staršynioj fondu jakoj jana źjaŭlałasia.

Adnačasova, pa našaj inicyjatyvie, jana prajšła pravierku BYPOL, na bazie jakoha, u tym liku, była stvorana arhanizacyja BELPOL.

Anžalika Mielnikava taksama prajšła palihraf, arhanizavany toj ža inicyjatyvaj BYPOL.

Pry atrymańni polskaha hramadzianstva jana ŭ abaviazkovym paradku prajšła pravierku Ahienctva ŭnutranaj biaśpieki, Ahienctva raźviedki, Pahraničnaj słužby Polščy, Ahienctva kontrraźviedki i MUS Polščy.

Jakija dadatkovyja pravierki pavinna była pravieści kamanda NAU, zychodziačy z vyšejpieraličanaha? Prosim taksama ŭličvać, što NAU, jak i ŭsie našy demakratyčnyja inicyjatyvy, źjaŭlajecca hramadzianskaj, a nie vajskovaj arhanizacyjaj.

My spadziajomsia, što mierkavańnie spadara Uładzimira Žyhara źjaŭlajecca jaho asabistym mierkavańniem», — piša NAU.

«Davajcie dadzim prava śpiecsłužbam Polščy pravieści rasśledavańnie ŭ miežach kryminalnaj spravy «ab niezakonnym pazbaŭleńni voli Anžaliki Mielnikavaj» i zrabić adpaviednyja vysnovy», — dadaje pres-słužba. 

Anžalika Mielnikava, śpikierka Kaardynacyjnaj rady, pakinuła terytoryju Polščy i Jeŭrasajuza 26 lutaha 2025 hoda. Pavodle rasśledavalnikaŭ, za dzień da vyletu jana zabraniravała pražyvańnie ŭ piacizorkavym hateli na Šry-Łancy, dzie ŭžo byvała raniej. Z 28 lutaha pa 7 sakavika Mielnikava žyła ŭ tym hateli ź dziećmi.

7 sakavika Mielnikava ź dziećmi palacieła ŭ Dubaj, tam jejny śled hublajecca. 

Pavodle «Kibierpartyzanaŭ», u sakaviku z rachunku fondu Mielnikavaj byli vyviedzienyja vialikija sumy hrošaj, što pryznačalisia dla «Kibierpartyzanaŭ» i Kaardynacyjnaj rady — ahułam z rachunku vyvieli 150 tysiač dalaraŭ.

Paśla hetaha jana kantaktavała z paplečnikami z Kaardynacyjnaj rady praź videasuviaź, ale nie praz asabistyja sustrečy: kazała, što chvareje. 25 sakavika pierastała vychodzić na suviaź.

13 sakavika jejny telefon vykarystali dla dostupu da fajłaŭ Kaardynacyjnaj rady — ich spampavali. 

U mai stała viadoma, što Mielnikava mahła mieć ramantyčnyja adnosiny z mužčynam, jaki źjaŭlajecca ahientam śpiecsłužbaŭ Biełarusi.

Dzie žančyna znachodzicca zaraz — nieviadoma.

• 10
• 1
• 13
• 6
• 0
• 2
• 0
• 0