Biez šłahbaŭma i pa pieradapłacie. Što źmienicca dla aŭtamabilistaŭ Biełarusi: novyja praviły płatnych parkovak
U Biełarusi rychtujecca abnaŭleńnie pravił karystańnia płatnymi parkoŭkami. Pryniaty novy ŭkaz, jaki rehuluje paradak apłaty i kantrolu za karystańniem parkoŭkami. Źmieny zakranuć usich aŭtamabilistaŭ, što parkujucca na vulicach haradoŭ. Što źmienicca dla kiroŭcaŭ, hienieralny dyrektar DA «Haražy, aŭtastajanki i parkoŭki» Andrej Zyranaŭ raspavioŭ «SB».
Pieršaje, što varta viedać: ciapier nieabaviazkova ŭstaloŭvać šłahbaumy na płatnych adkrytych parkoŭkach — heta spraščaje arhanizacyju takich miescaŭ.
Apłata pa-raniejšamu budzie ažyćciaŭlacca praz ARIP, SMS, USSD-zapyt ci servis «Apłaci». Ale važny niuans: płata za parkoŭku pavinna być uniesiena zahadzia, bo sistema pracuje pa pryncypie pieradapłaty. Kali vy apłacili paśla taho, jak užo spynilisia, — ličycie, što pieršy čas byŭ nie apłačany.
Dla kantrolu apłaty buduć dziejničać techničnyja srodki i śpiecyjalnyja prahramy. U vypadku nieapłaty apieratary atrymajuć danyja pra ŭładalnika mašyny praz MUS i mohuć vystavić pavyšany taryf dla parušalnikaŭ — da 1 bazavaj vieličyni (42 rubli). Kali i paśla hetaha apłata nie pastupić, sprava moža dajści da suda i prymusovaha spahnańnia.
«A naohuł, viadziecca praca pa źmienie pastanovy ab ździajśnieńni vykanaŭčych nadpisaŭ. Pry jaje ŭdałym zychodzie ŭ daŭžnika aŭtamatyčna śpišuć hrošy z rachunku», — tłumačyć śpiecyjalist.
Dla zručnaści kiroŭcaŭ u Minsku płanujuć stvaryć novuju infarmacyjnuju sistemu: u adnym dadatku možna budzie znajści ŭsie płatnyja parkoŭki, ubačyć najaŭnaść svabodnych miescaŭ, apłacić.
Ukaz taksama ŭdakładniaje, što parkoŭki kala kram, rynkaŭ, sacyjalnych abjektaŭ musiać być biaspłatnymi.
Akramia taho, mašyny MNS, milicyi, chutkaj dapamohi, pošty i samich apierataraŭ parkoŭki buduć parkavacca biez apłaty.
Narešcie, sistema parkoŭki budzie decentralizavanaj: miascovyja ŭłady atrymajuć paŭnamoctvy vyznačać praviły i taryfy ŭ svaich rehijonach.
Stajanka na adkrytaj parkoŭcy ŭ Minsku ŭ siarednim kaštuje adzin rubiel u hadzinu, na zakrytaj — dva rubli, čym bližej da centra i čym vyšejšy popyt — tym daražej. U miežach vulicy Zybickaj, Bahdanoviča i płoščy Svabody pieršaja hadzina kaštuje 5 rubloŭ, nastupnyja — pa 2.
Dla tych, chto parkujecca rehularna, praduhledžany abaniemienty: na miesiac u peŭnaj zonie — 35 rubloŭ, pa ŭsim horadzie — 80.
Kamientary