Chłopca, jaki ŭ Lebiedzievaj beściŭ Jeŭropu, asudzili za ŭdzieł u pratestach i ŭchileńnie ad vojska

Arciomu Vasiljevu 23 hady. Padobna, što naradziŭsia jon u Navapołacku, ale žyŭ u Viciebsku. Vučyŭsia ŭ Viciebskaj dziaržaŭnaj akademii vieterynarnaj miedycyny. Viadoma taksama, što jon muzyka i hraŭ u niejkich hurtach.

U 2022 hodzie, paśla pačatku vajny, Arciom vyjechaŭ za miažu i padaŭsia na ŭciakactva ŭ Niderłandach. Ale jamu niešta nie spadabałasia, i praź niekalki miesiacaŭ jon vyrašyŭ viarnucca ŭ Biełaruś. U vieraśni 2022 hoda chłopiec źniaŭsia ŭ prapahandysckim siužecie žurnalistki BT Ksienii Lebiedzievaj. Voś što jon tam kazaŭ pra pryčyny viartańnia:

«Adnapołyja kantakty, narkotyki — heta ŭsio prapahandujecca, unušajecca ludziam. Ułady, nasielnictva pierachodziać miežy i sprabujuć naviazać tabie kaštoŭnaści.

Na ŭłasnym dośviedzie pierakanaŭsia, što ŭsio nie takoje malaŭničaje, jak raspaviadajecca ŭ srodkach masavaj infarmacyi. Ja pierakanaŭsia, što nasamreč u toj krainie, ź jakoj ja pryjechaŭ, u jakoj naradziŭsia i vyras, davoli šmat značnych plusaŭ, i jana sapraŭdy znachodzicca na viaršyni jeŭrapiejskaha śvietu.

Pavialičyć

My žyviem jak niezaležny narod z ułasnym suvierenitetam, ułasnymi zakonami, ułasnaj movaj i kulturaj. Nam nie treba ni pradukty, ni vopratka, ni žytło — my ŭsio heta majem. Taksama ŭ nas jość u luby momant pierasiakać miažu i pierasiakacca ź inšymi kulturami, nas nichto ŭ hetym nie abmiažoŭvaje. I ja heta zrazumieŭ, znoŭ ža, u vyniku svaich pryhodaŭ, jakija adbylisia sa mnoj niadaŭna», — kazaŭ Arciom u intervju Lebiedzievaj.

U siužecie skazana, što hałandcy zabrali ŭ Vasiljeva pašpart. Heta standartna dla pracedury čakańnia biežanstva. Adnak chłopiec śćviardžaŭ, što pašpart jamu nie chacieli addavać, tamu, viartajučysia ŭ Biełaruś, «jamu daviałosia faktyčna niezakonna pierasiekčy miažu». Nasamreč heta hučyć niepraŭdapadobna — pracedura admovy ad biežanstva davoli prostaja, a dakumient na viartańnie zaŭždy možna atrymać u biełaruskim pasolstvie.

Miarkujučy pa ŭsim, Arciom praź niejki čas vyjechaŭ u Rasiju — novaja staronka Ukantakcie ŭ jaho pryviazanaja da rasijskaha numara. Vasiljeva zatrymali pamiž listapadam 2024-ha i krasavikom 2025 hadoŭ. U toj čas jaho vyklučyli z rasijskaj bazy vyšuku.

Pavialičyć

Nieviadoma, kali Arcioma asudzili, ale 13 červienia 2025 hoda jaho dadali ŭ milicejski śpis «ekstremistaŭ». Tam paviedamlajecca, što ŭstupiła ŭ siłu rašeńnie Navapołackaha haradskoha suda, jaki pakaraŭ Vasiljeva pa dvuch artykułach — «udzieł u dziejańniach, što hruba parušajuć hramadski paradak» (č. 1 art. 342 KK) i «ŭchileńnie ad pryzyvu ŭ armiju» (č. 1 art. 435 KK). Chłopcu pahražała da troch hadoŭ kałonii.

Chutčej za ŭsio, Arciomu prysudzili pazbaŭleńnie voli ŭ kałonii, ale tearetyčna heta moža być i chimija z nakiravańniem.

• 3
• 0
• 15
• 19
• 0
• 1
• 3
• 0